كورەيا رەسپۋبليكاسىنىڭ پرەزيدەنتى لي چجە ميون قاسىم-جومارت توقاەۆقا جانە قازاقستاننىڭ ۇلتتىق قاۋىپسىزدىك كوميتەتىنە الاياقتىق جاسادى دەگەن كۇدىككە ىلىنگەن وڭتۇستىك كورەيا ازاماتتارىن ۇستاۋعا جانە وتانىنا قايتارۋعا كومەكتەسكەنى ءۇشىن العىس ايتتى.

ءسوز 23 شىلدەدە قازاقستاندا ۇقك تاراپىنان ۇستالعان كورەيا رەسپۋبليكاسىنىڭ 14 ازاماتى تۋرالى بولىپ وتىر. كوميتەتتىڭ مالىمەتىنشە، ولارعا وتانىندا تەلەكوممۋنيكاتسيا جۇيەلەرىن پايدالانۋ ارقىلى ۇيىمداسقان قىلمىستىق توپ قۇرامىندا الاياقتىق جاسادى دەگەن ايىپ تاعىلىپ، ىزدەۋ جاريالانعان.

لي چجە ميوننىڭ حابارلاۋىنشا، كۇدىكتىلەر قازاقستانعا كامبودجا مەن ۆەتنام ارقىلى كەلىپ، وڭتۇستىك كورەيا ازاماتتارىنا قاتىستى داۋىستىق فيشينگپەن (voice phishing) اينالىسقان. ۇستالعاننان كەيىن شامامەن ەكى اپتا وتكەن سوڭ ولار وتانىنا قايتارىلدى، قازىرگى ۋاقىتتا پوليتسيا تەرگەۋ جۇرگىزىپ جاتىر.

«ۇستاۋدان باستاپ ەلگە قايتارۋعا دەيىنگى بۇكىل پروتسەستى وسىنشالىقتى جىلدام جۇرگىزۋ قازاقستان پرەزيدەنتى توقاەۆ پەن قازاقستاننىڭ ۇلتتىق قاۋىپسىزدىك كوميتەتىنىڭ بەلسەندى قولداۋى مەن ىنتىماقتاستىعىنىڭ ارقاسىندا مۇمكىن بولدى»، - دەپ جازدى لي چجە ميون X الەۋمەتتىك جەلىسىندە.

ءتىنتۋ بارىسىندا ۇستالعانداردان زاڭسىز ارەكەتتەردە پايدالانىلدى دەگەن بولجاممەن كومپيۋتەرلىك تەحنيكا، نوۋتبۋكتەر مەن ۇيالى تەلەفوندار تاركىلەندى.

سونىمەن قاتار، وڭتۇستىك كورەيا پرەزيدەنتى الداعى «كورەيا - ورتالىق ازيا» ءسامميتى شەڭبەرىندە قاسىم-جومارت توقاەۆپەن كەزدەسەتىنىنە ءۇمىت ءبىلدىردى.

Abai.kz