Қазақстандықтарға Қытайға сапарлаудың жаңа ережелері туралы ескертілді...

2026 жылдың 15 қыркүйегінен бастап Қытайда елге кіру және шығу ережелері өзгереді.

FlyArystan авиакомпаниясы хабарлағандай, жаңа ережелер күшіне енгеннен кейін иммиграциялық бақылаудан өту кезінде құжаттарды тексеру процедуралары көбірек уақыт алуы мүмкін. Авиатасымалдаушы жолаушыларға әуежайға ұшу уақытынан кемінде үш сағат бұрын келуді ұсынады. Паспорттық және иммиграциялық бақылаудан өту үшін қосымша уақыт қарастырған жөн.

Сонымен бірге Қазақстан мен Қытай арасындағы визасыз режим өз күшінде қала береді. Қазақстан азаматтары бір сапар шегінде ҚХР аумағында визасыз 30 күнтізбелік күнге дейін бола алады.

Еске сала кетейік, бұған дейін қазақстандықтар Қытаймен шекарада сақал қойған ер адамдарды кері қайтара бастағанын немесе елге кірер алдында сақалын қыруды өтінгенін айтқан болатын. Олардың сөзінше, мұндай тексерулерге «Қорғас» өткізу пункті аумағында тап болған.

Abai.kz