Алматы музейінде Қазақстанның Халық жазушысы, Қазақстанның Еңбек Ері, ақын әрі қоғам қайраткері Олжас Сүлейменовтің 90 жылдық мерейтойына арналған «Тауларды аласартпай, даланы асқақтату…» атты көрме ашылды. Бұл туралы қала әкімдігінің баспасөз қызметі хабарлады.

«Алматы музейінде Қазақстанның Халық жазушысы, Қазақстанның Еңбек Ері, ақын, мемлекет және қоғам қайраткері Олжас Сүлейменовтің 90 жасқа толуына орай «Тауларды аласартпай, даланы асқақтату…» көрмесінің салтанатты ашылу рәсімі өтті», — делінген хабарламада.

Көрмені Алматы әкімдігінің қолдауымен Қала музейлері бірлестігі ЮНЕСКО қамқорлығындағы Мәдениеттерді жақындастыру халықаралық орталығымен бірлесе ұйымдастырды.

Экспозиция Олжас Сүлейменовтің шығармашылық жолы мен қоғамдық қызметін кеңінен таныстырады. Ұсынылған жәдігерлердің арасында ақынның жеке заттары, қолжазбалары, марапаттары, кітаптары, архивтік құжаттары мен сирек кездесетін фотосуреттері бар.

Abai.kz