ҚР ҰЛТТЫҚ ҚАУІПСІЗДІК КОМИТЕТІНІҢ НАЗАРЫНА!

7 мамыр күні тайлы-тұяғымызбен әскери шеру өткізіп әлемге көрсетіп, мәз болдық. Не үшін? Мемлекеттің иесі екенімізді көрсету үшін, тәуелсіздікті паш ету үшін, мемлекетті қорғауға әзір екенімізді айналаға ұқтыру үшін!

Ал 9 мамыр күні Қызылжар қаласында есірген азаматтар жеңіл автокөлік шеруін рұқсатсыз өткізіп, тарихта қалған, егемен Қазақстанның тәуелсіздігін аяқасты еткен қызыл империя жалауын оңды-солды желбіретсе,

Оралда да автошеру жасаған белгісіз топ Ресейдің туын жалаулатып көшеге шықты. Бұл екі оқиғаны да тоқтатуға ешбір мемлекеттік органның батылы жетпеді...

Егер де осының орнына рұқсатсыз ел азаматтары митингіге шықса не болар еді? Осыған сәйкес заң бұзылған болып, қатысушылар қамаққа тоғытылар еді... Олар егемен елдің конституциясына сәйкес өз құқығын паш етсе де... Ал мына мемлекеттік тұтастығы мен Тәуелсіздікке қарсы акцияға қарсы 7 мамырда шерулеткен күштік құрылымның бір де бірі неге тырп етпеді? Неге Қазақ елінің заңы бұндай бассыздықты жібермейтіндей бап қарастырмады?

Сонда егемендіктің құны қанша болғаны? 5-6 автокөлік шеруінің шаңына да татымайтын болғаны ма?

Сырым Дат

Abai.kz