Биыл 6 шілде күні «Асқақтай бер, Астана!» атты жыл сайынғы дәстүрлі концертке америкалық әнші Akon қатысады, деп хабарлайды Bnews.kz.

 Akon әлемдегі танымал әншілердің бірі. Жастардың сүйікті әншісі I Wanna Love You, Smack That, Belly Dance, Lonely, Right now сынды хит әндерді орындайды. Оның алғашқы Trouble атты альбомы осыдан 10 жыл бұрын жарық көрді, атап айтар болсақ, 2004 жылдың маусым айында тұсауы кесілді. Содан кейін оның жұлдызы жарқырап әлемдік чаттардың алдыңғы қатарынан көрінді. 2008 жылы екінші альбомы да сәтті шығып, жұлдыздың айы оңынан туды.

Қала күнінде «Асқақтай бер, Астана!» шоуының хэдлайнері америкалық R'n'B-әнші Akon болады. Астананың 16 жылдығына арналған концертте танымал әрі хит-шерулерді бастап келе жатқан отандық эстрада және шетелдік жұлдыздар өнер көрсетеді. Нақтырақ айтсақ, The Jigits, Ғалымжан Молданазаров, Қайрат Нұртас, "Пицца" тобы, Полина Гагарина, Blue тобы.

Естеріңізге сала кетейік, 2013 жылы түнгі би кешінің хэдлайнері «The Pussycat Dolls» тобының әншісі Николь Шерзингер болған еді. Бұдан сырт жыл сайын Астана күні қарсаңында әлемнің әр түкпірінен танымал әншілер мен опера жұлдыздары, би майталмандары шақырылуда. Бір анығы «мәртебесі» биік шетел жұлдыздары Астананы туған күнімен тегін «құттықтап» кетпейді.

Абай-ақпарат