«Дипломат ретінде Қазақстан халқын тереңірек білу үшін қазақ тілін жетік білуім керек» дейді Қазақстандағы АҚШ-тың жаңадан тағайындалған Төтенше және өкілетті елшісі Джордж Альберт Крол.

Nur.kz жазуынша, Елші бұл сөзін Ақордада мемлекеттік хатшы Гүлшара Әбдіқалықовамен кездесуі алдында БАҚ өкілдеріне сұхбат бергенде айтқан.

«Қазақ тілін үйренуге тырысып жүрмін. Қазақ тілі құлаққа өте жағымды, әуезді естіледі, өзіндік нәзіктігі бар. Мен дипломат ретінде Қазақстан халқын тереңірек білу үшін қазақ тілін жетік білуім керек. Өйткені, тіл — халықтың жан-дүниесі. Дегенмен, Қазақстан көпұлтты мемлекет болғандықтан орыс, ағылшын тілінде де еркін тілдесе беруге болады. Бірақ, қазақ тілін білу, түсіну дипломат үшін барынша маңызды», — деген жаңа Елші.

Елші өз сөзінде қазақ тілінде қате сөйлейтіндігінен ұялатындығын айтып, ол кемшілігін түзетуге тырысып жүргендігін жеткізді. Ол сөз соңында БАҚ өкілдеріне қарата қазақ тілінде: «Сіздерге және отбасыларыңызға зор денсаулық, мол бақыт, ұзақ өмір, еңбекте табыс тілеймін», — деген.

Абай-ақпарат