Стамбулдағы үйінің жанына халық жиналып, мемлекеттік төңкеріс жасамақ болғандарды өлім жазасына кесуін талап еткенде, көпшіліктің талабын елемеуге болмайды, деді Түркия президенті.

Эрдоған егер бүлікшілер тағы да жаңа шабуылдар жасамақ болса, азаматтарды биліктің заңды екенін қолдап, тағы да орталық алаңға шығуын сұрады. Ол бүлікті ұйымдастыруға Эрдоғанмен кикілжіңге келгеннен кейін, АҚШ-қа көшіп кеткен ислам дінін уағыздаушы Фетхуллах Гюленнің қатысы бар екенін тағы қайталады. Гюленнің өзі бұл бүлікке еш қатысы жоқ екенін айтып, Анкараның талап етіп отырған экстрадициялау жөніндегі америкалық соттың шешіміне бағынатынын да мәлімдеді.

Жексенбі күні Стамбулдың Сабих Гюльчен әуежайы мен Конья провинциясының ВВС базасында қауіпсіздік күштері мен бүлікшілер арасында әскери қақтығыс орын алды.

Операция кезінде мемлекеттік төңкеріс жасамақ болған 6 мың әскер мен судьялар қамауға алынды. Ұсталғандардың ішінде – бүлікті ұйымдастыруы мүмкін деген ВВС қолбасшысы Акин Озтюрк, Инджирликтегі НАТО базасын басқарушы генерал Бекир Эркан Ван бар. Бұл базаны АҚШ және оның одақтастары Сириядағы «Ислам мемлекеті» экстремистік ұйымына қарсы күресу үшін пайдаланады. Ұсталғандардың ішінде Эрдоғанның әскери кеңесшісі Әли Язиджи де бар.

Соңғы ресми мәлімет бойынша, 16 шілдеге қараған түні болған сәтсіз төңкеріс әрекетінде 290 адам қаза тапқан.