Шымкент қаласының әкімі Ғабидолла Әбдірахымов қалалық әскери комиссариатта болды. Сапар барысында мекеменің жұмысымен танысып, әскери ұжымды Қазақстан Республикасы Тәуелсіздігінің 25 жылдық мерекесімен құттықтады. Қала әкімі ел егемендігін сақтаудағы әскери күштің ерекше рөлін атап өтті. Бұл туралы «Абай ақпарат» порталы Шымкент қаласы әкімінің баспасөз қызметіне сілтеме жасай отырып хабарлайды.

Мереке құрметіне орай қала әкімі аталған мекемеге жаңа «Нива» автокөлігінің кілтін табыс етті. Сонымен қатар, алдағы уақытта мекеме қызметкерлеріне арнап «Нұртас» шағынауданы аумағынан жаңа кеңсе ғимараты салынатындығын жеткізді. Қазіргі таңда осы мақсатта 1 гектар жер бөлініп, нысанның нобайы дайындалды. 

Іс-шара барысында әскери оркестрдің сүйемелдеуімен жауынгерлер спорттың жекпе-жек түрінен өнерін көрсетті.

Сондай-ақ, Шымкентте білімді еңбекпен ұштастырған  25 жас «Үздік жастар» сыйлығының иегері атанды. Олардың қатарында дәрігер, ұстаз, спорт шебері мен өнерпаздар, БАҚ өкілдері, ауыл шаруашылығы саласының мамандары  бар.

Мерекелік шарада жастарды  қалалық ішкі саясат бөлімінің басшысы Қанат Қалыбеков арнайы құттықтады.

 – Біздің  қала ұрғындарының 29 пайызын жастар құрайды. Биыл түрлі салалар бойынша  жеттістіктерге жеткен жастарға қала әкімінің премиясы алтыншы рет тапсырылып отыр. Ел ертеңі саналатын жастарға артылатын жауапкершіліктің жүгі салмақты. Біз сендерге сенеміз, – деді Қ. Қалыбеков.

Марапатқа ие болғандар арасында елдің намысын қорғап, көк байрақты көкке көтеріп жүрген  спортшыларымыз да бар. Соның бірі - 2016 жылы олимпиада ойындарының күміс жүлдегері Жазира Жаппарқұлова. Елдің үмітін арқалаған жастардың арасында «Қазақстан-Шымкент» телеарнасының редакторы Ақмарал Көпжасарова «Үздік жас қаламгер», «Айғақ» телеарнасының тілшісі Ұлдархан Уәлиханқызы Үздік жастар айдары»  номинациясы бойынша марапатталды.  Сондай-ақ  «Байдың  балалары» көңілді тапқырлар командасы  да  үздік деп танылды.  Марапат иелері «Үздік жастар» сыйлығы өздеріне артылған үлкен сенім, зор жауапкершілік деп біледі.

Abai.kz