شىمكەنت قالاسىنىڭ اكىمى عابيدوللا ءابدىراحىموۆ قالالىق اسكەري كوميسسارياتتا بولدى. ساپار بارىسىندا مەكەمەنىڭ جۇمىسىمەن تانىسىپ، اسكەري ۇجىمدى قازاقستان رەسپۋبليكاسى تاۋەلسىزدىگىنىڭ 25 جىلدىق مەرەكەسىمەن قۇتتىقتادى. قالا اكىمى ەل ەگەمەندىگىن ساقتاۋداعى اسكەري كۇشتىڭ ەرەكشە ءرولىن اتاپ ءوتتى. بۇل تۋرالى «اباي اقپارات» پورتالى شىمكەنت قالاسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

مەرەكە قۇرمەتىنە وراي قالا اكىمى اتالعان مەكەمەگە جاڭا «نيۆا» اۆتوكولىگىنىڭ كىلتىن تابىس ەتتى. سونىمەن قاتار، الداعى ۋاقىتتا مەكەمە قىزمەتكەرلەرىنە ارناپ «نۇرتاس» شاعىناۋدانى اۋماعىنان جاڭا كەڭسە عيماراتى سالىناتىندىعىن جەتكىزدى. قازىرگى تاڭدا وسى ماقساتتا 1 گەكتار جەر ءبولىنىپ، نىساننىڭ نوبايى دايىندالدى. 

ءىس-شارا بارىسىندا اسكەري وركەستردىڭ سۇيەمەلدەۋىمەن جاۋىنگەرلەر سپورتتىڭ جەكپە-جەك تۇرىنەن ونەرىن كورسەتتى.

سونداي-اق، شىمكەنتتە ءبىلىمدى ەڭبەكپەن ۇشتاستىرعان  25 جاس «ۇزدىك جاستار» سىيلىعىنىڭ يەگەرى اتاندى. ولاردىڭ قاتارىندا دارىگەر، ۇستاز، سپورت شەبەرى مەن ونەرپازدار، باق وكىلدەرى، اۋىل شارۋاشىلىعى سالاسىنىڭ ماماندارى  بار.

مەرەكەلىك شارادا جاستاردى  قالالىق ىشكى ساياسات ءبولىمىنىڭ باسشىسى قانات قالىبەكوۆ ارنايى قۇتتىقتادى.

 – ءبىزدىڭ  قالا ۇرعىندارىنىڭ 29 پايىزىن جاستار قۇرايدى. بيىل ءتۇرلى سالالار بويىنشا  جەتتىستىكتەرگە جەتكەن جاستارعا قالا اكىمىنىڭ پرەمياسى التىنشى رەت تاپسىرىلىپ وتىر. ەل ەرتەڭى سانالاتىن جاستارعا ارتىلاتىن جاۋاپكەرشىلىكتىڭ جۇگى سالماقتى. ءبىز سەندەرگە سەنەمىز، – دەدى ق. قالىبەكوۆ.

ماراپاتقا يە بولعاندار اراسىندا ەلدىڭ نامىسىن قورعاپ، كوك بايراقتى كوككە كوتەرىپ جۇرگەن  سپورتشىلارىمىز دا بار. سونىڭ ءبىرى - 2016 جىلى وليمپيادا ويىندارىنىڭ كۇمىس جۇلدەگەرى جازيرا جاپپارقۇلوۆا. ەلدىڭ ءۇمىتىن ارقالاعان جاستاردىڭ اراسىندا «قازاقستان-شىمكەنت» تەلەارناسىنىڭ رەداكتورى اقمارال كوپجاساروۆا «ۇزدىك جاس قالامگەر»، «ايعاق» تەلەارناسىنىڭ ءتىلشىسى ۇلدارحان ۋاليحانقىزى ۇزدىك جاستار ايدارى»  نوميناتسياسى بويىنشا ماراپاتتالدى.  سونداي-اق  «بايدىڭ  بالالارى» كوڭىلدى تاپقىرلار كومانداسى  دا  ۇزدىك دەپ تانىلدى.  ماراپات يەلەرى «ۇزدىك جاستار» سىيلىعى وزدەرىنە ارتىلعان ۇلكەن سەنىم، زور جاۋاپكەرشىلىك دەپ بىلەدى.

Abai.kz