Жұма, 29 Наурыз 2024
Билік 6687 0 пікір 30 Қараша, 2016 сағат 11:51

Әлемге, Ғарышқа, Болашаққа жол ашқан Тұңғыш!

«Ұлы Дала ұлағаттарын» оқығаннан кейін осы бір тұжырымға келген едік

Ел Тәуелсіздігіне – 25 жыл! Алайда, жер төсінің кіндігінен көтерілген зымыранның әп-сәтте, тіпті көзді ашып, жұмғанша ғарыш кеңістігіне шығатын бүгінгі шапшаң заманы үшін бұл жиырма бес жыл да сол қас-қағымдық сәт. Алайда тарихтың осы бір аса қысқа мерзімінде Қазақстанның халықаралық аренадағы орны, беделі мен абыройы дүние құрылығындағы талайғы бір ежелден қалыптасып, ертеден қуатты мемлекет болып орныққан елдерден кем түсіп отырған жоқ.

Елбасы Тәуелсіздігіміздің 25 жылында Қазақ елін бір ғасырдың еншісіне де сыя қоймастай тарихи жолдан алып өтті. Қазақ елі дүниенің төрт бұрышына ең әуелі Назарбаев есімімен, Назарбаев келбе­ті­мен танылды. Назарбаев қазақ елі үшін Әлем­ге, Ғарышқа, Болашаққа жол ашып берді!

«Егемен Қазақстан» газетінде жария­ланған Елбасының «Ұлы Дала ұлағаттары» толғауын қазақтың Тәуелсіздігін алып бер­ген, сол Тәуелсіздіктің ұлы жүгі ел мұра­тын тарихтың аса бір күрделі кезеңі­нің қайнап жатқан тұрлаусыз саясатының салқынына ұрындырып алмай, дауылы мен дауына түтетпей, оғына алдырмай, қасын дос етіп, жауын жанынан тапқызып, ұлтын ұлықтап, еңсесін көтеріп, есік­те қалған басын төрге сүйреп, өлгенін тіріл­тіп, өшкенін жағып, сөнген сананы жаң­ғыртып, түлетіп Әлемге, Ғарышқа, Бола­шаққа жол ашып берген және де өз халқының бағына біткен Нұрсұлтан Назарбаев сынды адамзаттың асып туған бір перзентінің саясаткер ретіндегі ғана емес, адами парасаттылығының ұлағаты деп таныдық та, сол түйген ойымыздың бір парасын қағаз бетіне түсірдік.

 

«Уақыттың бетіне ұялмай тура қарай аламыз!»

 Бірақ ең үлкен күш қару емес – татулық. Татулықты сұрап та, сатып та ала алмайсың. Оны саяси көре­ген­дік­пен ғана қалыптастыруға болады. Тәуел­сіздігін енді ғана алып, өшкені жанып, өлгені тіріліп отырған алагеуім шақ­та ел ішіндегі тыныштықты біз осы­лай қалыптастырдық. Демек, біз та­тулық, бірлік атты бірегей жасам­паздыққа сүйенген елміз.

Нұрсұлтан Назарбаев,

«Ұлы Дала ұлағаттары»  ой толғауынан.

(«Егемен Қазақстан»,

2 қараша, 2016 жыл)

Елбасы ел Тәуелсіздігінің 25 жы­лын­да көпэтносты мемлекет қалыптас­тырып, қазақстандықтар бір мақсат, бір мүдде үшін бірлік пен ынтымақты жағдайда өмір сүріп, еңбек етуді үйреніп, әлемге үлгі көрсетіп отырған елміз!

Оқытары мен тоқытары да бар, сонымен бірге, өкінтері де бар көне тарихтың ескі қоламтасын қайыра үрлеудің енді қажеті де бола қоймас. Өткенге салауат айтып, келер күндеріміздің қайыры мен жақсылығын тілейік те, ұлы істерге ұмты­лайық. Қашан болсын өзінің жеке өмірінде де, мемлекеттік саясатта да «өн­бес дауды өспес ұрпақ қана қуар» деген қазақы дана­лықты жанына серік етіп келе жатқан Елбасының «Ұлы Дала ұла­ғат­тарындағы» жан мен ар таза­лы­ғының арқауын жалғап тұрған даналы­ғы­ның бір пара әңгімесін ойға салдық, еледік, ек­ше­дік, сабақ болар көп жайды көңілге де түйдік.

Даралап айтар болсақ, Тұңғыш Президентіміз «саясаттың ең басты ұста­нымы – бірлік» бола алатындығын зерделі зейінімен көкейіне тоқи білді де, Қазақстанның ішкі саясатын ынтымаққа ыңғайландырды. «Бірлігі жеткен ел озады, бірлігі кеткен ел тозады» деген сөздің сорабын дөп басып айтқан халқымыз. Бірлік – біздің барлық жеңістеріміздің қайнар көзі. Бірлік бар жерде – тірлік бар. Осыны әрдайым жадымызда ұстауымыз керек. Ата тарихымыздың тұжырымдарын есте ұстап, шежіре болып айтылар ұлттық ұлағатты, тарихи ақиқатты жас ұрпақтың жадына мықтап сіңіруіміз қажет. Жас ұрпақ жүрегіне сонда жол табамыз, сонда ғана болашағына бағдар бере аламыз», – деген Нұрсұлтан Назарбаевтың («Ұлы Дала ұлағаттары («Егемен Қазақстан», 2 қараша, 2016 жыл) бұл пайымында біздің елдің болашағының тағдыры ұштасып жатыр дер едік.

«Менің бар тілегім де, зар тілегім де елдің бірлігі мен тыныштығы» деп Тәуелсіз мемлекет құрудың алғашқы күнінен бастап бірлік атты адами ұғымды барлық қазақстандықтардың санасына сіңіре білген Елбасы сол бірлікті алын бас қамал деп таныды. Солайы солай болды. Бізді бүгінгі биігімізге де, бүгінгі абыройымызға да Елбасының осы бірлік атты ұстанымы жеткізді.

1992-ші жылы Тәуелсіздігіміздің бір жылдығына арналып өткізілген Қазақстан халқы форумында Елбасы Қазақстан халқы Ассамблеясын құру мәселесін айта келіп, аяғын енді-енді баса бастаған азат­ты­ғымыздың тағдыршешті бір қадамын жасаған да болатын. Міне, сол Ассам­блея Нұрсұлтан Назарбаевтың 1995-ші жыл­ғы 1 наурыздағы Жарлығымен Прези­дент жанындағы кеңес құрылып, ол ақыл­дасушы бір жүйеге айналды. Бұл қазіргі уа­қытта көпэтносты мемлекет құрудың әлем­дік тәжірибесіне айналып отыр және де Ас­самблея қабылдаған «Қазақстанның ел бір­лігі» Доктринасының тарихи мәні өзі­нің құндылығын ешқашан жоймақ та емес.

Алматы – Елбасының мәңгілік жүрек әні! Алматы – Елбасының әрдайым жанын жылытып, көңілін тербеп тұрар тал бесігі! Өзіңнің туған елің мен туған жеріңді сүюдің тамаша ғибратындай болып естілер «Біз Алатаудың бауырындағы Алматыға сыя алмай емес, Алматыны қия алмай кетіп барамыз» деген Елбасының(«Еуразия жүрегінде», 19-бет.) осы бір ауыз сөзінде ел Тәуелсіздіктің тал бесігіне айналған Алматыны ардақ­тау­мен бірге, сан ғасырлар бойы арман болған Тәуелсіздігіміздің бүгінгі және болашақтағы тағдыры үшін астананы Сарыарқаның сайын даласындағы Есілдің бойына әкелу керек еді. Тәуелсіздіктің тағдыры халқымыздың тағдыры! Алайда, қирап та күйреп қалған экономикасы бар сол кездегі Қазақстанның жағдайында ел астанасын көшірудің өзі ақылға да сыймағаны анық. Елбасы көңіл түйсігіне салды. Ойланды, толғанды. Ақыры талас­ты сан алуан пікірлерге де қарамастан батыл қадам жасады. «Бораны ұлыған, аязы қақаған Арқаға барсын, өзі де кейін қайтып келер» деген сәуегейлердің айтқаны келмеді. Назарбаевтың айтқаны айна-қатесіз болды да, бүгінгі Астана орнықты, төрткүл дүние сүйсініп отырған бүгінгі жаңа қала Астана салынды.

«Елорданы Отанымыздың орталық бөлігіне көшірудің аса маңызды страте­гия­лық, саяси-әлеуметтік, қоғам­дық-руха­нияттық маңызы дау туғызбай­тын шындық еді» және де «Ал астананы көшіру – қалыптасқан тарихты заман талабына сай жаңаша жазып, бұрынғы ұстанымға басқаша тың парақтар қосу деген сөз» («Ұлы Дала ұлағаттары. («Егемен Қазақстан», 2 қараша, 2016 жыл) Елбасының осы бір пайымды пікірлері ойлаған жанға енді айту жеңілірек шығар. Ал, астананы көшіру мен жаңадан салу басталған сонау 1997 мен 1998 жылдар ел тағдыры қыл үстінде тұрды дейтіндей өте бір қиын да ауыр кезең болғандығы ұмытыла да қоймас.

Елбасы көреген де батыл, ерік пен жігері мол, қайтпас қайсарлығымен Қазақстанның шынайы қолбасшысы бола білді. Тарихтың сан аударылып түскен шаңының астына көміліп, ғасырлар бойы үні шықпай келе жатқан қазақты әлемдік тарих сахнасына алып шықты. Астананы құр салып қана қоймай, Нұрсұлтан Назарбаев тәуелсіз Қазақстанның Астанасын ХХІ ғасырдың әлемдік тарихын жасаушы Астанаға айналдырды! Оған куә – 2010-шы жыл! Еуропадағы қауіпсіздік және ынтымақтастық ұйымының (ЕҚЫҰ) Астана Саммиті әлемнің 56 дамыған дейтін мемлекеттерінің басын қосса, бұл Тәуелсіз Қазақстанның абыройын аспандатып асқақтатты. Әрине, әлемде Cаммит өткізуге әбден жарап та тұрған небір әйдік астаналар көп те, небір астаналар да бар! Бірақ әлемде Назарбаев біреу ғана! Ол – қазақтың маңдайына жазған, бағына біткен бізде ғана бар Назарбаев! Иә, әлемде өзге де президенттер бар! Алайда, Ұлы Даланың бір ұлы перзенті Нұрсұлтан Назарбаев адамзаттың жаңа дәуірінің саяси дүниесі мен келбетінің түбірінен өзгеруіне өз үлесін қоса келген және де Нұрсұлтан Назарбаев бір ұлттың, бір мемлекеттің мүдделері аясында ғана шектеліп қалмай, жалпы адамзаттың мүддесін ойлай келген өзінің адал ниетті даналығымен даралана келген планетарлық Тұлға болатын!

Бір ғана қазақ даласына қырық жыл бойы қырғын салған, бүкіл адамзатты үрей мен қауіптің уысында ұстап келген Семей ядролық атом полигонын жабуы және де Назарбаевтың ядролық қарусыз әлем құрудағы батыл әрі адами бастамасы қазір «Әлем. XXI ғасыр» манифесіне ұласып, ол Біріккен Ұлттар Ұйымының Қауіпсіздік Кеңесінің бас құжаты ретінде басшылыққа алынса, Елбасының «Уақыттың бетіне ұялмай тура қарай аламыз!» деуі әбден орынды!

Еліміздің де, оның бүгінгі де келер ұрпақтарының да әлем алдындағы жүзі ашық та жарқын болғанға не жетсін?! Елбасы әлемге де, болашаққа да барар жолымызды сабырлы саясатымен салып берді. Біздің әрқайсымыз сол уақыттың бетіне ұялмай тура қарай алатындығымызбен бақыттымыз!

 

«Алла – адал ниетте, жүрегіңді таза ұста!»

Алла да, иман да – жүректе. Ең алдымен, жастар жүрегін таза ұстауы қажет… Жастарымызға айтарымыз: өз дініңді қадір тұт, өгей дінге бас ұрма. Әрине жас кезде еліктеу басым болады. Бірақ жат діни ағымға еліктеу, елігу қауіпті екенін ұмытпаған жөн!

 Нұрсұлтан Назарбаев,

 «Ұлы Дала ұлағаттары»

(«Егемен Қазақстан»,

 5 қараша, 2016 жыл)

 Елбасы ел Тәуелсіздігінің 25 жылында Астана қаласында 2003-ші жылдан бастап бес рет адам баласының өзі де, оның діні де жаралғалы сол әлемдік және дәстүрлі діндер лидерлерінің форумын өткізіп, өркениеттер тоғысы кезінде жаһандық жаңа қатерлер бой көтере бастаған тұста түрлі діндердің ізгілігі мен жасампаздығын, ғасырлар бойғы Құдай сөзін бітімгершілік пен келісімнің пәрменді де ықпалды құралы ретінде пайдалануға жасаған сауапты ісі адамзат тарихының ұлы оқиғаларының бірі еді.

 Аласапыранды заманның өкпек желі бізді де бетімізден қақпай қалып тұрған жоқ. Әлемнің әр түкпірін үрейде ұстап отырған түрлі радикалды діни жат ағымдардың ықпалы бізге де келіп жеткендей болып тұр. Тіпті, лаңкестік әрекеттер жасауға барып та қалғандар кездесті. Мұны діннен емес, сол дінді білместіктен көру керек. Елбасы бізге осыны айтумен, осыны ұғындырумен келеді.

Діни наным мен сенім бостандығы бізге Тәуелсіздікпен келді. Бұл орайдағы әркімнің ерікті құқы Конституциямызда көрініс тапты. Кешегі коммунистік жүйе Құдайға сыйынуға тыйым салып тастаған болатын. Алайда, соған қарамастан, өзіміз көрген жарықтық аталарымыз бен әжелеріміз жасырынып жүріп намаздарын оқыды, оразаларын ұстады, имандылықты жүректерінде сақтады.

«Кеңестік кезеңдегі қызыл террордың халықтарды қуғын-сүргінге ұшыратудағы зорлық-зомбылығын өз өміріндегі тұр­мыс­тық тауқыметтермен бірге бөліс­кен қазақ халқының сол кездегі жан дүниесіндегі үнсіз қарсылығы болатын. Қазақтардың босып келген халықтарды паналатуы мен адамгершілік қолын созуы сол нәубетке іштей қарсылығы болған шығар? Қара күшке қарсы қарапайым ақыл-парасатты қолдану ұлы күрес, имани майдан. Демек, біздің халқымыз – зайырлы жиһадтың үздік үлгісін көрсеткен жұрт. Бұл біздің бүгінгі ұрпақ үшін мәңгілік мақтан, өмірлік өнеге болса керек», – деген Елбасының бұл айтқандарында («Ұлы Дала ұлағаттары», «Егемен Қазақстан», 5 қараша, 2016 жыл) адам баласына жақсылық жасау жиһадтың имандысы деген ұғымды алға тартады.

Дінді білместіктен адасып жатқан­даймыз. Бұл үшін кешегі құдайсыз қоғамнан шыққандарды жазғыра беруге де болмас. Тәуелсіздік алғаннан ке­йін мешіттер ашылып, жаңадан салына да бастады. Жастарымыз да, тіпті мектеп оқушыларына дейін мешіттерге бара бастады, намазға жығылды. Құран сүрелерін жаттай бастады. Қуандық! «Ана көшенің бұрыш-бұрышында қаптап тұрған сыраханаларға бармаса болды», – деп маскүнемдіктен ығыр бола бастағандықтан, «балаларымыз мешітке барып жүрсе, әйтеуір арақ ішпес» деп ойладық. Діннің де жат пиғылдысы болатынын білмедік. Оның үстіне шет елдерден ислам дінін уағыздаушылар келіп, шариғатқа сусап қалған халқымыз олардың айтқандарына имандай сенді, ұйыды, иланды. Олар ғасырлар бойғы халықтық кейбір салтымыз бен қалпымыздан шариғатқа қарсы жайларды тауып, соларды айта бастады. Тіпті домбыра тартып, ән айтуға да болмайды екен! Дүниеден өткен ата-бабаларымыздың аруағына арнап құран да оқуға болмайды екен! Сөйтіп, ең әуелі дінбұзарлар көбейіп кетті де, мұның соңы басбұзарлыққа әкеле бастады.

Елбасының «Ұлы Дала ұлағаттары» ой-толғауының «Дін мен дәстүр» деп аталатын бір парасындағы айтылатын пікрлер мен өсиеттерді біздің Қазақстан мұсылмандарының діни басқармасы өз уағыздарына енгізулері керек болар. Мемлекет басшысының дін мен дәстүр сабақтастығына қатысты ойлары, әсіресе, жастар арасында кеңінен насихатталуы қажет. Өйткені, Президентіміз айтып отырған біздің қоғамның «діни сауаттың аздығы, діни орындардың таза дінді жалған діннен ажырату бағытындағы дәрменсіз жұмыстарына» жетекші әрі көмекші құрал бола алары даусыз мәселе.

– Аруақты құрметтеу, бейіт басына барып дұға бағыштаудың, Наурызды қуана қарсы алып, жаңа туған аймен амандасудың дін алдында ешқандай да айыбы жоқ, – деп отырған Елбасы Нұрсұлтан Назарбаевтың осы бір аталы сөзіне тоқтағанымыз жөн ғой деп ойлаймыз. Елбасының осы аталық пікірін ата-бабамыздың сан ғасырлық салты мен дәстүрін, әдеті мен ғұрпын мансұқ етіп жүргендерге сабырмен жеткізіп, санасына сіңіру міндет болса керек.

Ислам дінінің қасиеті мен ізгілігін қорғауға келгенде Назарбаевтай белсене кірісіп, Назарбаевтай кесімді ойы мен пікірін айтып жүрген әлем мемлекеттерінің де, тіпті Араб елдері басшыларының арасынан да ешкім шыға қойған жоқ. 2011-ші жылдың 11-ші қыркүйегіндегі Америкадағы сауда үйі мен Пентагонға жасалған шабуылдан кейінгі ислам фундаментализмі дүниеге қатер төндіре бастады деп даурығулар басталған кезде Нұрсұлтан Назарбаевтың «Ислам әлемге емес, әлем ислам әлеміне қауіп төндіріп тұр», – деуі және де Елбасының 2006 жылдың қыркүйек айының 12-13-тері аралығында Астанада өткен Әлемдік және дәстүрлі діндер лидерлерінің II съезінде: «Құдайды іздеу» пердесін жамылып барша ұлы ұстаздар айыптайтын шын мәніндегі үрейлі әрекеттер жасалуда. Екінші жағынан, белгілі бір дінді агрессияшыл деп айыптаудың біржақты әдеті айқын әлпетке көшті», – дей келіп, осы заманғы саяси және экономикалық мүдделер діни қағидаттардан жоғары қойылып отырғандығына алаңдаушылық білдіргені де есімізде.

Міне, Елбасының ислам және өзге де дәстүрлі барлық ұлы діндердің «рухсыздық пен қанағатсыздықтың алдына қойылған ең берік қамалдардың бірі» деп тұжырым жасауы және де қасиетті қазақ топырағында, Астана қаласында 2003 жылдан бастап, әр үш жыл сайын, 2006, 2009, 2012, 2015 жылдары бес рет өткізілген шараны «діндер арасындағы дипломатияның тілі ізгілік пен имандылық екенін түсіндіруге барынша әрекет жасадық» деп байламды ой айтуы адам баласының ниетін түзеу мен жүрегін ізгілендіруге жасалған сауапты бір қадам болатын.

– Қазақстан өзінің Ата Заңында ашық жазылғанындай, зайырлы мемлекет. Дін мен мемлекет бір-бірінен тәуелсіз. Бірақ қандай дін болмасын, ол сол аймақтағы мемлекеттің дамуына өзінің теріс әсерін тигізетін болса, біз бұған жол бере алмаймыз. Біз үшін мемлекеттің тұрақтылығы, тыныштығы, береке-бірлігі ең басты құндылық», – деді Елбасы осы «Ұлы Дала ұлағаттарында».

Мемлекеттік мүддені, тәуелсізді­гіміз­дің тағдырын бәрінен жоғары қойып отыр. Ел тағдыры мен тәуелсіздік тағдыры жолында бірлік пен ынтымақ бәрінен де жоғары, бәрінен де қасиетті болуы керек деген Нұрсұлтан Назарбаевтың ұстанымы қазақстандықтардың басты ұстанымы болса етті деп ойлаймыз. Және де ақыл мен парасатқа жүгінейік. Тіршілігіміздегі сауапты ісіміз көп болсын, сол тіршілікке қиянат жасап, обалға қалып жүрмейік. Елбасының бізге айтар ғибраты да осы! Жүрегіңді таза ұста!..

 

«Өз Отанына өз баласы ренжи ме екен?!.»

 Ел тірлігі, көпұлтты Қазақстанның бірлігі мен тыныштығы жатсам-тұрсам көкейімнен кетпейтін маған жалғасып жатқан қазақ көшінің тағдыры тіпті де оңай сезіліп тұрмағанын айтқым келеді. Жырақтағы жұртың туған жерге жаутаңдап қарап отырса, кісінің жаны қалай жай табады?!

 Нұрсұлтан Назарбаев,

 «Ұлы Дала ұлағаттары»

ой толғауынан

 («Егемен Қазақстан»,

8 қараша,  2016 жыл.)

Елбасы ел Тәуелсіздігінің 25 жылында тағдырдың қилы-қилы кезеңдерінде көздерінен қанды жастарын сыға отырып, өз туған жерлерінен ауа көшіп, қиыр жайлап, тарыдай шашылып, кеткен өз бауырларымызды өз атажұртымызға қоныстандырып, қазақтың қайырлы ұлы көшін бастады!

Бұл Елбасы Нұрсұлтан Назарбаевтың құдайы бір сауапты ісі болатын! Олай деуіміздің негізгі бір себебі, ұлы көштің алғашқы легімен келген ақ сақалды ағаларымыздың әуежайдан түсе салып, көздеріне парлаған жастарын тыя алмай, қазақ жерінің топырағына маңдай­ларын тигізіп, сол қасиетті топырақ­ты сүйген­дерін де, табандарының өз атажұртына тигендіктері үшін бір Аллаға шүкіршілік айтып, Елбасы Нұрсұлтан Назарбаевқа жан жүректерінен шыққан ақ алғыстарын айтып, ақ баталарын берген адам жанын толғанысқа салар жайды да көзіміз көрген болатын.

«Елге ел қосылса – құт» деп білген халқымыздың қасиетті қағидасын және қазақтың қасиетті топырағын басқызбай қойған зұлым саясаттың құрбаны болып, ішқұса болып жүрген қазақтардың шері мен мұңын ұға білген Елбасы тіпті Тәуелсіздігіміздің елең-алаң сәтінің өзінде, яғни 1991 жылдың 31 жел­тоқ­саны күні Қазақ радиосы арқылы шет елдердегі қандастарымызға үн қатып, сөз сөйледі. «Ол сөз жан жүрегімнен қайнап шыққан еді» деген Елбасының туған халқына деген таза да мейірімді жүрегінің айнасы болатын. Сонан соң іле 1992 жылы Дүние жүзі қазақтарының бірінші құрылтайы өткізіліп, сол Ұлы жиында Нұрсұлтан Назарбаев тағы да тебіреністі сөз сөйлеп:

– Тәуелсіз Қазақстан дәулетіне сәулеті сай қуатты мемлекетке айналар. Қазақ халқы әлемдік өркениетке қазіргіден гөрі қомақты үлес қосар. Даламызда да, қаламызда да шадыман тұрмыс, шат тірлік орнар. Бұйыртса, бүгінгі құрылтайға қатысқан қадірменді қонақтарымыздың өзі туған Қазақстанымыздың өсіп-өркендегеніне таяу жылдарда-ақ куә болады деп кәміл сенемін!, – дегенді айтып еді.

Елбасының дуалы аузынан шыққан осы бір ауыз сөздің тарихи ақиқатқа айналғандығын енді көз көріп, көңіл илана білді. Тәуелсіздіктің 25 жылында Қазақстанға 1 миллионға жуық бауырларымыз оралды. Ел ішінде «өзіміз жарымай отырғанда бауырсынып, соларды шақырып неміз бар еді?» деген қаңқу сөз де айтылмай қалмады. Алайда, Елбасы қандастарымызды өз атажұрттарына орналастыруды мемлекеттік саясат деңгейіне көтеріп, шынайы қамқорлық пен жанашырлық жасады әлі де жасап келеді. «Әрине, жаңадан жерсіну, бейтаныс ортаға бірден бейімделу оңай болмас. Кейде қиырдан келген қандастарымызды жайлы орналастыруда жекелеген жауапты адамдардың тарапынан болып жататын бойкүйездік пен тоғышарлық, жаныашымастық пен жағдайды бағалай алмаушылық кездесіп қалатынын жасыруға болмайды. Мұндағы түйткілдер –мемлекеттің қатесі емес, кейбір шенеуніктердің төрешілдігіне байланысты жағдайлар. Біз бұлардың бәріне сын көзбен қарап, түзетіп, көңілге түскен қаяуды жоюға күш салатын боламыз», – деген Елбасының («Ұлы Дала ұлағаттары», «Егемен Қазақстан», 8 қараша, 2016 жыл.) осы айтқандарын зерделі көңілмен саралай білейік.

«Көңілге түскен қаяуды», – дейді Елбасы! Мұны кім айта алар?! Мұны кім және де не үшін айтып отыр?! Атасы мен діні басқаларды бауырымызға басып жылыта білсек те, өзіміздің қандастарымызға келгенде тарылып, тасбүйрек бола қалғанымыз да кездеспей қалған жоқ. Кездесті, болды. Сонда да алыстан арып-ашып, ата­жұртым деп келгендердің көңілі­не қаяу түсірдік-ау дегенді ойладық па?! Елбасы сол біз түсірген қаяуды біліп, соған жаны ауырып отыр. «Көңілге түскен қаяу­ды жоюға күш салатын боламыз», – дейді тағы да! Осындай өз еліңнен, осыны айт­қан өз Елбасыңнан айналсаң болмай ма?! «Адалдық – жан тазалығы! Біздің Прези­ден­тіміздің туған халқы мен қазақ жерін ме­кендеп отырған барша ұлттар мен ұлыс­тарға деген жан тазалығы, адал сөй­лейтін пейілі мен адал көңілі – елдің бағы», – де­ген бұдан біраз жыл бұрын айтқан бір пікірі­міздің қайырадан бір ойға оралғаны болды.

Жасыратыны жоқ, ішкі және сыртқы кейбір әсерлерден көштің біразырақ тоқтап қала жаздаған сәті де болды. Мұны да жасырмаймыз. Атажұртқа орал­ғандарға Қазақстан азаматтығын берудің де мерзімін созып алдық. Әйтеуір бөгесіннің бола бергені де анық. Кейін Елбасының айтуымен Парламент депутаттары бұл мәселені заңды түрде реттеді. Қазір азаматтық алуда еш бөгесін болып отырған жоқ. Бір түскен қаяу түзетілді, тігісі жатқызылды.

Сондай бір кезеңдерде, нақтылап айтар болсақ 2014 жылы Көкшетауда Баят Жанатұлы деген аса қадірлі жазушы ақ­сақалымыз қайтыс болып, марқұмды жер­леуге Монғолиядағы ағайындары мен жекжаттары келді. Қарсы алдық, күттік. Алыстағы қандастарымыздың жағ­дай­ларын сұрастырып, әңгіме-дүкен құрдық.

– Шеттегі ағайындар Қазақстан көшті тоқтатып тастады деп ренжіп жатқан жоқ­сыздар ма? – деді сол арада әлдекім.

– Жоқ шырағым! Ол не дегенің? Өз Отанына өз баласы ренжи ме екен?! – де­ген салиқалы ақсақалдың аталы сөзіне риза болдым. Кеңінен танысып, ныс­пысын сұрап, қойын дәптеріме аты-жөнін де, «өз Отанына өз баласы ренжи ме екен?» – деген сөзін де жазып қой­ған едім. Осы бір аталы сөзді айтқан адам – Моңғолия азаматы, қазақ Қызмет Оңғышұлы!

«Ағайынға арнап көп нәрсені айтқым-ақ келеді. Алайда, іштегінің бәрі сыртқа шыға бермейді ғой», – деген Елбасының осы бір жүрек түкпіріндегі жан сырын өзіміз саралайтын, өзіміз зерделейтін, өзіміз түсіне алатын жасқа жеттік. Ел Тәуелсіздігінің 25 жылында жақсыны да, жаманды да таныдық, көзіміз ашылды, көңілге көп жайды түйдік. Ол ең әуелі ел бірлігін сақтау! Жердің тұтастығын сақтау! Алауыздықты қойып, бірауызды болып Мәңгілік Ел болуды ойлау! Ұлымыз намыссыз, қызымыз қылықсыз қалмасынды ойлау! Тіліміз бен дінімізді таза ұстау! Ерінбей еңбек етіп, білім мен ғылымды меңгеру және де Қазақстанды әлемнің дамыған отыз мемлекетінің қатарына тұрғызу! Бұл дүниенің төрт бұрышында жүрген әр қазақ перзентінің ойлайтыны болуы керек.

Әлемдегі бар қазақ – бір қазақ! Елбасы Нұрсұлтан Назарбаев «Ұлы Дала ұлағаттарында» айтқан осы бір ауыз сөзі ұлттың ұраны, Мәңгілік Ел болуды мұрат етіп отырған халқымыздың бүгінгі де, келер ұрпақтарының да саналарында сайрап, жүректерінде жазылып тұруға тиісті болмақ керек!

«Әлемдегі бар қазақ – бір қазақ!..» Елбасының бұл ұлағаты дөңгеленген дүниенің жұмыр жерін басып жүрген әр қазақ баласының санасында сайрап тұрар сөзі болуы керек.

Жабал ЕРҒАЛИЕВ,

жазушы, Қазақстанның еңбек сіңірген қайраткері, Парламент Сенатының депутаты

АСТАНА

дереккөзі. "Егемен Қазақстан"

Abai.kz

0 пікір

Үздік материалдар

Алғыс айту күні

Алғыс айту күні және оның шығу тарихы

Жомартбек Нұрман 1562
Алашорда

Қожанов межелеу науқанында (Жалғасы)

Бейбіт Қойшыбаев 2257
Ғибырат

Қайсар рухты ғазиз жан

Мұхтар Құл-Мұхаммед 3535