Ашхабад: Мұғалімдердің айлығын тағы кешіктіріп жатыр
Ашхабадта мектепке дейінгі және орта мектеп қызметкерлерінің жалақысын тағы кешіктірді. Астанадағы орта мектептердің бірінің мұғалімінің Азаттық радиосы тілшісіне хабарлауынша, наурыз айының жалақысы әлі төленбеген.
"Сәуір аяқталуға жақын, ал бізге наурыздың айлығын әлі берген жоқ. Наурыз және сәуір айларына аванс төлемеді. Жұмыстан шыққан соң күнде банкомат тексереміз - ақша түспеген. Басшылық ақшаны картаға аударады деп отыр", - деді ұстаз.
Түркіменстанда мемлекеттік қызметкерлердің айлығы, зейнетақы және мүгедектердің өтемақысы, студенттердің шәкіртақысы, кейбір аймақтардағы шаруалардың табысы платик карталарға аударылады.
"Біз уәдеге тойдық. Жалақы әр айдың онына түседі дейді. Бірақ үлкен отбасыны уәдемен асырай алмайсың. Тамақтанудың өзі қиынға түсіп жатыр", - деп шағымданды астаналық ұстаз.
Түркіменстанда мемлекеттік мекемелердің жалақыларын өткен жылы көктемде де кешіктірген еді.
Aбай-ақпарат
