Осы қарапайым сұрақ мені мазалайды. Егер Құдай адамзатты әр түрлі нәсілге бөлсе, қарым-қатынас үшін әр түрлі тіл берсе, өлгеннен кейін сол өз ана тілінде сұралады деген шығар. "Құдай барлық тілді біледі! Оған қай тілде сөйлесең де, сені түсінеді, тек жүрегің таза болса болғаны" деген сөзді 50% ғана қабылдаймын. Әрине Жаратушы түрлі-түстіні, көптікті жақсы көреді делінген. Әйтпесе, барлығымыз бір тілде, бір нәсілде, бір дінде болар едік қой.

Жаратушы ұлт пен тілдерді жаратқаны хақ, алайда өзімнің логикалық тұжырымым бойынша, әр адам өзінің ана тілінде сұралатын сияқты. Кейбір "Critical Thinking" қасиеті дарымаған адамдардың "Құран араб тілінде түсті, яғни Құдай тек араб тілінде сұрайды, қабырда жатқаныңда Нәңкір мен Мүңкір келіп "мән раббук?" (Құдайың кім?), "мән набиук?" (Пайғамбарың кім?), "мән диннук?" (Дінің қандай?) деп сұрағанда, жауап беру керек" деген догматикалық сенімдері бар.