Оның сөздерінше, аштық жариялаушылардың жағдайы нашарлап кеткен:

- Бәрінен де Бектұр Асановтың хәлі мүшкіл. Абақты дәрігерлері оның қан қысымы бірден төмендеп кетті дейді. Сол себептен дәрігерлер саясаткерге аштық жариялауды тоқтатпаса, салдары өте ауыр болуы мүмкін деп ескерткен. Біз де акцияны тоқтатуын сұрадық. Бірақ олар Мемлекеттік ұлттық қауіпсіздік комитеті (МҰҚК) басшысы Әбділ Сегізбаев қызметінен алынбайынша, аштық жариялауды тоқтатпаймыз деп отыр.

Жанар Ақаев саясаткерлердің денсаулығы жайында парламент қабырғасында көтеремін дейді.

МҰҚК басшысы Әбділ Сегізбаевтың отставкасын талап етіп, Бектұр Асанов 30 қаңтарда, Эрнест Карыбеков 31 қаңтарда, Кубанычбек Кадыров 1 ақпанда аштық жариялауды бастаған. Олардың бәрі 2016 жылы «билікті күшпен тартып алмақ болды» деген айыппен ұсталған.

Бішкектің Бірінші май аудандық соты оларды айыпты деп танып, Эрнест Карыбековті 20 жылға, Кубанычбек Кадыров пен Бектұр Асановты 12 жылға бас бостандықтарынан айыру жазасын берген. Дастан Сарығұлов болса 4 жыл шартты жазаға кесілген. Бұл шешіммен келіспеген саясаткерлер қайта шағымданған. Бірақ 2018 жылдың 7 ақпанында өткен келесі сот инстанциясы аудандық сот шешімін күшінде қалдырды.

Abai.kz