"Училище директоры Кенджа Иброхимов қол қойған бұйрықта "Ұлт лидерінің теледидардан көрсеткен жолдауын училищенің акт залында тыңдаудан бас тартқаны үшін жұмыстан шығару" деп жазылған", - деді 14 ақпанда Саида Рустамова.

"Шын мәнінде олай емес. Мен акт залына кіргенде, онда бос орын болмады. Әдейі жасаған жоқпын, жолдауды тыңдауға мүмкіндік болған жоқ".

Тәжікстан президенті Эмомали Рахмон өткен жылы 22 желтоқсанда жыл сайынғы жолдауын жариялады. "Мені жұмыстан шығарғанына келіспеймін, сол себепті президент әкімшілігіне және мәдениет министрлігіне арыздандым. Жауап күтіп жүрмін", - дейді Рустамова.

Училище директоры концертмейстерді жұмыстағы кемшілігі үшін шығардық деп отыр. "Ол басшылықтың нұсқауын орындамады, дөрекі сөйледі. Қызметкер ішкі тәртіпке бағынбай, басшылыққа дөрекі сөйлейтін болса, оны жұмыстан шығарады... Мен оның арызданғанын естідім. Арандатушы ғана осылай жасайды", - деді Кенджа Иброхимов.

Тәжікстанның мәдениет министрлігі би мұғалімінің арызын алғанын растады.

Abai.kz