Ұлыбританияның беделді The Economist басылымында "Turkmenezuela: Turkmenistan finds a novel solution to mass emigration" (Түркіменстан халықтың жаппай эмиграциясын тоқтату үшін соны тәсіл ойлап тапты) деген тақырыппен мақала жарық көрді. Онда Түркіменстандағы экономикалық дағдарыс жайында айтылған.

Мақала авторы Германия банктерінің есепшотында Түркіменстан билігіне тиесілі 23 млрд доллардың жатқаны айтылған. Бірақ Халықаралық есеп жөніндегі банктер мәліметінде бұл ақпараттың қайдан алынғаны, нақты қожайындары кімдер, қандай есепшотта сақталғаны жайында айтылмаған.

2016 жылы Түркіменстан президенті Гурбангулы Бердімұхамедов Германияға ресми делегациямен барған. Мұнан бөлек "Түркіменстан хроникасы" басылымы flightradar24.com сайтына сілтеме жасап, маусым айында түркімен президентінің ұшағы Германияға үш рет ұшқанын жазған.

The Economist Германия банктерінде Түркіменстанның миллиардтаған доллары жатқанымен елде экономикалық дағдарыс етек алып тұр деп жазады. Сонымен бірге мемлекеттің халықаралық ақша аударымына, ақша айырбасына шектеу қойғанын да атап өткен.

Abai.kz