Елбасы Нұрсұлтан Назарбаев тұрғындардың салауатты өмір салтын ұстанып, спортпен айналысу үшін барлық жағдай жасалу қажеттігін үнемі айтып келеді. Және, еліміздегі бұқаралық спортқа да мемлекет тарапынан үлкен көңіл бөлініп жатыр. Осыған сәйкес, Түркістан облысының  Шардара ауданында желкенді қайық спорты дамып келеді екен.

Шардаралық өрендер спорттың бұл түріне ерекше ықыласты. Бүгінде Шардара су қоймасындағы үйірмеде 60 бала жаттығып жүр. Көк теңізге жаны құштар жастар желкенді қайықты ұршықша иіреді. Білікті бапкерлер де балаларға білгенін үйретіп, бағыт-бағдар беріп отырады.

Мамандардың айтуынша, желкенді қайық спорты Шардара су қоймасында 1970 жылдары кең қанат жайып, жақсы дамыған екен. Бірақ кейін жабылып қалған. Енді қайта қолға алынып отыр.

«Кеше ғана Қапшағай су қоймасына балаларымыз жарысқа кетті. Жүлделі орынмен оралады деген ойдамыз. Өткенде балаларымыз жарысқа қатысып жеңімпаз атанды. Бұдан кейін Шардарада желкенді қайық спорты одан да жақсы дамиды деп үміттенеміз»,-дейді Шардара балалар мен жасөспірімдер спорт мектебінің директоры Абай Сатиев.

Abai.kz