Оның сөзінше, Астанада кәмелет жасына жетпеген бес баласы өрттен опат болған шаңырақ тәрізді баспанаға мұқтаж көп балалы отбасыларының проблемасын шешу жолы – пәтерді жалға беру (аренда).
"Биыл ондай пәтер салуға қаржыны көбейтпекпіз, осыған дейін 25 миллиард теңге бөлінген болса, енді бұл мақсатқа әкімдіктерге 35 миллиард теңге береміз. Соның есебінен төрт мың арендалық пәтер салынады" деді министр.
Ол қазір көп балалы отбасыларына жалға берілетін пәтер құрылысына қосымша қаржы іздестіріліп жатқанын хабарлады.
"Егер жыл сайын 700 пәтер салынып келсе, қазір оның санын екі-үш есе көбейту керек. Біз министрлік атынан осындай ұсыныс енгіземіз" деді Жеңіс Қасымбек.
Министр елде 28 мың отбасы арендалық пәтер кезегінде тұрғанын айтты.
"Мұндай екі бөлмелі пәтердің орташа жалдау құны 8-10 мың теңге тұрады. Бұл әлеуметтік жағдайы төмендерге өте қолайлы баға" деді Қасымбек.
4 ақпанға қараған түні Астананың Көктал-1 шағын ауданында жеке үйдің ауласындағы уақытша баспана өртеніп, бір отбасындағы 2006, 2008, 2013, 2015 және 2018 жылы туған бес қыз бала опат болған. Қаза болған балалар 5 ақпанда жерленді. Жергілікті биліктің дерегінше, өрт балалардың ата-анасы жұмыста болған кезде болған. Отбасы көп балалы шаңырақ ретінде тіркеуде тұрған.
Сәрсенбі күні таңертең Астананың орталығына биліктен әлеуметтік проблемаларын шешуді талап еткен жүзден астам адам (негізінен көп балалы аналар) жиналған еді. Олар Қазақстан президенті Нұрсұлтан Назарбаевқа жазған үндеуінде көп балалы отбасыларын баспанамен қамтамасыз етуді, балаға мемлекеттен төленетін жәрдемақыны көбейтуді, тұрмыс жағдайларын жақсартуды талап етті.
Abai.kz
