مەملەكەت باسشىسىنىڭ تاپسىرماسىنان كەيىن ۇكىمەت ءۇيسىز جۇرگەن كوپ قازاقتىڭ ماسەلەسىن شەشۋگە بەل شەشىپ، بىلەك سىبانىپ كىرىسىپ كەتكەن سىڭايلى. ولاي دەۋىمىزگە سەبەپ تە جوق ەمەس. قر ۇكىمەتى قازىر كوپ بالالى وتباسىلارعا پاتەر سالۋعا قارجى ىزدەستىرىپ جاتىر ەكەن. بۇل تۋرالى مينيستر جەڭىس قاسىمبەك مىرزا حابارلاپ ايتتى. 

استاناداعى شەتىن وقيعادان كەيىن كوپ بالالى انالار ۇكىمەت پەن جەرگىلىكتى باسشىلار (اكىمدىكتەر) كوپ بالالى انالاردىڭ تالاپ-تىلەكتەرىن، مۇڭ-مۇقتاجدارىن تىڭداعان ەدى. سودان بەلگىلى بولعانداي، كوپ بالالى وتباسىلاردىڭ كوبىنىڭ باستى پروبلەماسى - پاتەر بولعان. پرەزيدەنت پارمەن بەرىپ، ۇكىمەت كوپ بالالى انالاردىڭ ماسەلەسىن شەشۋگە كىرىسىپ كەتكەن ەكەن. قر يندۋستريا جانە ينفراقۇرىلىم ءمينيسترى جەڭىس قاسىمبەك استانادا القا-قوتان جيىن وتكىزىپ، كوپ بالالى وتباسىلاردى پاتەرمەن قامتۋ ءۇشىن جاڭا پاتەرلەر سالىناتىنىن ايتتى.

مينيستر مىرزانىڭ ايتۋىنشا، باسپاناعا مۇقتاج، ۇزاق جىلدار باسپانا كەزەگىندە تۇرعان كوپ بالالى وتباسىلاردىڭ پروبلەماسىن شەشۋدىڭ ءبىر جولى - پاتەردى جالعا بەرۋ. ياعني، ارەندالىق پاتەرلەر سالۋ. ول ءۇشىن بيۋدجەتتەن قوسىمشا قارجى ءبولىنۋى كەرەك.

"بيىل ونداي پاتەر سالۋعا قارجىنى كوبەيتپەكپىز، وسىعان دەيىن 25 ميلليارد تەڭگە بولىنگەن بولسا، ەندى بۇل ماقساتقا اكىمدىكتەرگە 35 ميلليارد تەڭگە بەرەمىز. سونىڭ ەسەبىنەن ءتورت مىڭ ارەندالىق پاتەر سالىنادى. ەگەر جىل سايىن 700 پاتەر سالىنىپ كەلسە، قازىر ونىڭ سانىن ەكى-ءۇش ەسە كوبەيتۋ كەرەك. ءبىز مينيسترلىك اتىنان وسىنداي ۇسىنىس ەنگىزەمىز", دەدى مينيستر.