Бейсенбі, 22 Тамыз 2019
641 0 пікір 26 Маусым, 2019 сағат 17:53

Қызылордада ІV халықаралық интернет-форум өтті

Қызылорда облысының орталығында өткен халықаралық интернет-форумға Ресей, Татарстан, Сингапур және Қазақстан мемлекеттерінен сарапшылар келді, - деп хабарлайды Абай-ақпарт.

Мамандар өңірдегі білім беру және жұмыспен қамту саласының болашағы, жылдам өзгеретін заманауи еңбек нарығы жағдайындағы жаңа сын-қатерлер мен мүмкіндіктер, сияқты өзекті мәселелер талқылады.

Форум модераторы – Қазақстан Республикасы Президенті жанындағы Мемлекеттік басқару академиясының Ақпараттық технологияларды дамыту жөніндегі Вице-ректоры Әлия Мұхамеджанова.

Шараға қатысқан Қызылорда облысының әкімі Қ.Көшербаев:

– Біз төртінші Интернет-форумды адам капиталын дамытуға арнап отырмыз. Өйткені әлемдік тәжірибе көрсеткендей, қазіргі кезеңде мемлекеттің экономикалық өсуінің шешуші факторы - адам капиталын қалыптастыру мен дамытуға байланысты инвестициялар. Әлемде білім беруді дамытуға мемлекеттік шығыстар бұрыннан әлеуметтік шығындар ретінде есептелмейді. Себебі бұл - табыс әкелетін инвестиция. «Барлығын кадрлар шешетінін» түсінеміз, сондықтан облыстық бюджеттің 40% астамын білім беру саласына бағыттаймыз, - деп атап өтті.

Айталық, Сыр өңірінде "HackDay" жас IT-мамандардың бірінші өңірлік фестивалі ұйымдастырылды. Бүгінгі таңда облыс жастары "IT-эшелон" жобасы шеңберінде веб-бағдарламалау негіздері мен фронтенд-әзірлемелер бойынша ақысыз негізде білім алуда.

Форумға онлайн және офлайн режимінде ҚР Денсаулық сақтау вице-министрі Олжас Әбішев, "МИСиС" ҰТЗУ даму жөніндегі директоры Нұрлан Қиясов, BTSDigital білім беру жобаларының жетекшісі Саясат Нұрбек, Электрондық үкімет орталығының директоры/Сингапур ұлттық университетінің халықаралық бағдарламасының жүйелік ғылымдар институтының басшысы Ашок Кумар Ситхараман, "Иннополис" университетінің ректоры Александр Тормасов, сондай-ақ сандық технологиялар және адами ресурстарды дамыту саласындағы басқа да сарапшылар қатысты. Соныменқатар облыс әкімдігі интернет пайдаланушылары үшін әлеуметтік желілердегі (YouTube және Facebook) ресми аккаунттары арқылы онлайн трансляция ұйымдастырды.

Естеріңізге сала кетейік, 2016 жылы бірінші интернет-форум электрондық коммерцияны дамытуға, екінші (2017) - Байқоңыр қаласында кәсіпкерлікті дамытуға, үшінші (2018) – өңірде цифрландыруды дамытуға арналды. Айта кету керек, аталмыш форумдарды өткізу нәтижесінде облыста "Барс-Групп" татар компаниясымен бірлесіп "Электрондық балабақша" жобасы жүзеге асырылды. Бүгінгі күні жүйе 425 мектепке дейінгі білім беру мекемесіне енгізілді. Сондай-ақ, "Транстелеком" компаниясымен бірігіп тұрғынүй коммуналдық шаруашылық шығындарын оңтайландыруды көздейтін "е-Шаңырақ" зияткерлік ақпараттық жүйесінің пилоттық жобасы іске асырылды. Қазіргі таңда жүйе 6 көпқабатты үйге енгізілген, жыл соңына дейін тағы 170 үйді енгізу жоспарлануда.

Abai.kz

0 пікір