Мемлекет басшысы Қасым-Жомарт Тоқаев Қазақстандағы шетелдік  салымшылардың (инвесторлардың) 32-ші пленарлық сессиясының отырысына қатысты. 

Алқа-қотан жиында арнайы сөз алған президент Тоқаев әлемде болып жатқан саяси һәм әлеуметтік үдерістердің ел дамуына, оның экономикасына ықпалы жайлы әңгіме өрбітіп, Елбасы жолдауында айтылған Төртінші өнеркәсіптік революция, геосаяси ахуал мен экономикалық қарым-қатынас мәселелеріне тікелей әсер ететін факторларға тоқталды.

"Автоматтандыру және цифрландыру жұмыс күшінің құнын айтарлықтай түсіріп жіберді. Экономикалық өсім үшін ресурс ретінде арзан жұмыс күшін пайдаланатын елдер даму жолында елеулі проблемаларға кездесіп жатыр. Қазіргі кезеңде адам капиталының рөлі, әсіресе, білім саласында бірден өсіп барады. Сондықтан, адам капиталына салынған инвестиция елдің дамуына және қоғамның әл-ауқатының артуына септігін тигізеді", – деді Қазақстан Президенті.

Президент Қасым-Жомарт Кемелұлы Қазақстандағы адами капиталды дамыту мәселелеріне  де тоқталды. Президенттің айтуынша, қазіргі таңда маман әзірлеу, білікті кадрлар дайындау басты міндеттердің бірі. Еңбек нарығындағы сұранысқа сай білікті, кәсіби мамандарды әзірлеу үшін ең алдымен кадрлар дайындау жүйесінің сапасын арттыру маңызды.

Осыған қатысты Мемлекет басшысы қолға алынуы тиіс шараларға да жеке тоқталған. Атап айтқанда, кәсіби техникалық білім беру жүйесін жаңғырту, жоғары білім берудің кәсіпорындармен, бизнеспен байланысын күшейту қажет. Президент жоғары білім беру жүйесін жетілдіріп, шетелдік жоғары оқу орындармен академиялық байланыс орнатуға Шетелдік инвесторлар кеңесі өз үлесін қоса алатынын атап өтті.

"Кез келген компанияның басты байлығы – адам. Сондықтан кәсіпорынның кіріс мөлшеріне қарай қызметкерлерге сыйақыларды әділ үлестіру маңызды. Бұл – әлеуметтік жауапкершіліктің негізгі кілті. Бұл отандық кәсіпорындарға да, шетелдіктер қатысқан компанияларға да қатысты. Ұлттық табыстың әділ бөлінуі – әр мемлекеттің негізгі міндеті", – деді Қасым-Жомарт Тоқаев.

Қазақстан Президенті өз баяндамасында Елбасы Нұрсұлтан Назарбаевтың 5 институционалдық реформасында аталған арнайы мәселелерге де тоқталған.

"Біз Экономикалық ынтымақтастық және даму ұйымына кіретін елдердің өмір сүру сапасы жөніндегі стандарттарын енгізуді негізге алдық. Салық, кәсіпкерлік, зияткерлік меншік және қаржы саласындағы заңнамамызды дәйекті жетілдіріп келеміз. Қазақстан посткеңестік кеңістікте бірегей институт – «Астана» халықаралық қаржы орталығын құрды. Соның арқасында Қазақстан өзінің мақсатына – әлемнің озық 30 елінің қатарына қосылуға жақындап келеді", – деді Қасым-Жомарт Тоқаев.