Жұма, 20 Қазан 2017
Алашорда 2085 9 пікір 10 Тамыз, 2017 сағат 09:04

Ғұмыр жұмбағы

(Басы мына сілтемеде)

«... Сен жақсылық, жамандықты жаратқан – Құдай, бірақ қылдырған Құдай емес, ауруды жаратқан – Құдай, ауыртқан Құдай емес, байлықты, кедейлікті жаратқан – Құдай, бай қылған, кедей қылған Құдай емес деп, нанып ұқсаң болар, әйтпесе – жоқ»  /Абай, 28-қарасөз/.

Өмірге келгеннен кейін жер басқан жұмыр басты әрбір пенде бақытты жарқын ғұмыр кешуге ұмтылады.  Адамның, өзінің ең бір артық жаратылысының қамын әуелден  ойлаған «артық ақыл иесі» Жаратушы - аса шексіз мейірімді, асқан шебер ғой. Өмір берді, өмір сүруге қажетті нәрсенің бәрін де асқан келісіммен жаратты.  Ой көзімен қарасаң, "керексіз жаралған бір тозаңы жоқ, тәртіпті таңғаларлық зор мәшине" етіп сұлулығына сөз жетпейтұғын бұл ғаламды  «кәмалатты шеберлікпен» жаратты. Сондықтан  жаратылыстың тұңғиық  тылсым сырына, Абайша айтқанда "көзге көрілген, көңілге сезілген ғаламды қандай хикметпенен жарастырып, қандай құдіретпенен орналастырған, ешбір адам баласының ақылы жетпейді".   Сұлу сөзді сүрелермен сабақтаған салиқа ойдың сардары Мәшһүр Жүсіп Жаратушы Иеміздің  дүниені  мінсіз өрнектегенін өз өлеңінде төмендегідей шумақтарымен таразылайды:

Құдайым жексенбі күн жер жаратты

Жер-суды әуел бастап бір жаратты.

Тау мен тас, ағаш пен шөп, көл мен өзен

Түріндей текеметтің түр жаратты.

 

Жерлерден аға берді бұлақ қайнап,

Гүлденіп бәйшешектер, бұлбұл сайрап.

Жексенбі, дүйсенбімен бұл екі күн

Жер жүзін тегіс қылды түгел сайлап.

 

Сейсенбі – жер, сәрсенбі күні көкті қылды,

Құдіретпен қылған ісін неше бөлді.

Көкті жерге  пар қылып жарастырып,

Ай мен Күн, жұлдыздан  перде  құрды.

 

Екі  күн  Жер, екі күн Көк жаратты,

Бір-біріне екеуін жұп жаратты.

Бір сағатта қылуға құдіреті бар,

«Пендеме» ғибрат болсын» деп жаратты.

 

Кітаптан көргенімді айтпан теріс,

Құдіреттің қылған ісі тіпті келіс.

Ырзық, несіп - қоректі ішіп - жейтін,

Жаратты бейсенбі күн бәрін тегіс.

 

Аспан биік, Жер төмен, тау-тас қатты,

Ат аяқты болғанда, құс қанатты.

Заһардан бал, тікеннен гүл шығарып,

Жұма күні  жаратты адамзатты.

 

Құдіретпен он сегіз мың ғалам болды,

Бәрі – қабық, маңызы адам болды.

Құдайдың құдайлықпен қылған ісі,

Жаралып алты күнде тәмәм болды.

Расында, дана Абайдың он жетінші қарасөзінде Сократ хакимнің Аристодимге айтқанындай  бұл ғаламның "келісті көрімдігіне һәм қандай лайықты жарастықты законімен жаратылып, оның ешбірінің бұзылмайтұғынын көресің. Бұлардың бәріне таңғажайып қаласың һәм ақылың жетпейді..." Енді, мейірімі шексіз, аса қамқор Алла тағаланың бұл  дүниені "өлшеуіне ой жетпейтұғын", "пенденің ақылына өлшеу бермейтұғын" осынша махаббатпен "мықты көркем законге" қаратып жаратудағы, соның ішінде, жалғыз-ақ  пендесін барлығынан артық, ірі жаратудағы мақсаты неде деп ойланарсың...

Алланың басқа жан иесі хайуандардан, неше мың түрлі жансыздардан ақыл иесі инсанды артық, ірі жаратудағы мақсаты – адам арқылы шексіз шеберлігін танытқысы келуінде болса керек. Оның үшін адам баласының да Алла алдындағы айқын да ұлы миссиясы, ғұмырының мағынасы – әуелі, жаралысты, өзін жаратқан "ең түпкі Жаратушы – мінсіз Иесін" адаспай тануға талпыну деп білеміз.  "Махаббатпен жаратқан адамзатты, Сен де сүй ол Алланы жаннан тәтті..." Абай сөзі. Кемеңгер ойшыл адам Алланың ұлы махаббатпен жаратқан туындысы болғандықтан, оның қайтарымы Оған деген кіршіксіз  махаббатпен ғана өлшенетінін алға тартады.

Ендеше өмір берген Құдай, бәрін де берген, әрбір нәрсені  кез келгендікпен емес, "әрбір түрлі керекке бола жаратып һәм бір-біріне себеппен байланыстырып", орнымен жаратқан Құдай.  Бірақ, Абайдың 28-қарасөзінде жазылғандай  "бәрін қылушыға қылдырушы", яғни "бір антұрғанға еңбексіз мал берген", "бір Құдайдан тілеп, адал еңбек қылып, пайда іздеген кісінің еңбегін жандырмай, қатын-баласын жөндеп асырарлық та қылмай, кедей қылған, ешкімге залалсыз бір момынды ауру қылып, қор қылған, қайда бір ұры, залымның денін сау қылған", "түзікті бейішке шығарамын деп, бұзықты тозаққа саламын деп айта тұра, пендесінің біреуін жақсылыққа мейілдендіріп, біреуін жаманшылыққа мейілдендіріп, өзі құдайлық құдіретімен біреуін жақсылыққа бұрып, біреуін жаманшылыққа бұрып жіберіп тұрған бір  Құдай ма екен?!»  .  Егер Құдай болса, "осының бәрі Құдай тағаланың айыпсыз, мінсіз ғафур рахимдығына, әділдігіне лайық келе ме», яғни, адамды жаратылыс атаулыдан артық қылып махаббатпен жарата тұра, «өзі құдайлық құдыретімен» пендесінің бірін жаман, бірін жақсы жолға бұруы Оның сипаттарына, есімдеріне лайық іс пе? - деп үлкен сауал тастайды қайтадан. Әлбетте, жоқ дейміз. Өйткені, адамда өзге жаратылыс иелерінен ерекшелеп,  әрбір нәрсені шын таразылап, дәл бастырып тұратын "ақыл деген өлшеусіз бір жарық нұр"  бар ғой. Сондықтан да дана ақынның осы ғақлиясында айтылғандай не көрсек те, кім болсақ та Құдайдан демесек керек екен.  Ақыл иесі адам болған соң да Жаратушы жалғыз иеден  басқаның барлығы егіз жаратылғанын ескере отырып, қарама-қайшылықты екі жолдың бірін ақылмен таңдау өз еркімізде болмақ екен.

Сіз қалай ойлайсыз, оқушым?! Ең ұлы нығмет ақыл берілген ең артық жаратылыс адам ретінде біз қаншалықты деңгейде ақылымызды Абай айтқан ақылды адамның ісіне жұмсап жүрміз?! Санаңызда сіздің өміріңізден орын алуын қалайтын нәрселер жайындағы ойлар ғана қалыптасқан ба? Әлде, күңгірттік пен сенімсіздік, қорқыныш пен мақсатсыздық  басым ба?

Ой – таусылмас қуатты энергия десек, ақыл – энергияны сақтайтын қор. Ойыңыз неғұрлым биік әрі айқын болсын. Сонда ақылыңыз да соншалықты кеңейе әрі жақсы энергиямен байи түседі. Позитивті не негативті ойлаудың маңыздылығы сондай, ол мидың көлеміне, қатпарлығына, қабылдау жылдамдығына, 1 млрд-тан астам нейрондардың жұмысының артуына не кемуіне, ақылдың жандануына  зор әсерін тигізеді екен. Ғылымда біздің басымызда күніне 60 000-80 000-ға жуық ойлар туатыны да дәлелденген.

Ал, сол ой қайдан шығады? Алпыс екі тамырымыздағы тоқтаусыз алмасып жататын қан, әуелі, жүрекпен байланыс жасайды екен-дағы, жүректен қайнап, миға барып, мидан бұрқырап ой болып шығады екен. Бірақ қандай болып шығады, мәселе сонда. Негативті не позитивті ойдың шығуына ішкен, жегеніміздің орасан зор әсері бар екендігі де өз алдына бір әңгіме.    Енді  ойыңыздың терең түбіне әділетті жүрекпен үңіліп көрдіңіз бе?  Басқа келген әрбір ойды аңдап, басқара, бағалай  аласыз ба?! Өйткені, сіздің сөзіңіз, іс-әрекетіңіз, қарым-қатынасыңыз ойлауыңыздың нәтижесі ғой. Бұл ретте:

«Жақсылық көрсем – өзімнен,

Жамандық көрсем – өзімнен,

Тағдыр қылды дегенді

Шығарамын сөзімнен», - дейді ұшқыр ойлы, жалынды ақын Сұлтанмахмұт. Бұл сөзден білінді: позитивті ойлай білу -  рухани әрі материалды, интеллектуалды бай,  толық адамша жарқын өмір сүрудің, жалпы, қоғамның байлығы болудың ең негізгі құпия кілті. Дана халқымыз мұны бір-ақ ауыз сөзбен "Ой түзелмей, бой түзелмейді",-деп қана нүктесін қойған.

Олай болғанда, ойыңа келген әр істі ғаділетті жүрекке сынату арқылы ақылмен ой бекіту, оны айтып, жазып қана қоймай, күнделікті мақсатты түрде жүзеге асыру, сөйтіп, тек жақсылыққа, ертеңіңнің бүгіннен де жарық болатынына  сену  немесе ғаріп қасар момынның біреуі болып барға шүкір, жоққа сабыр етіп, Құдайдың жаратқанынан артық іс болмас деп күйкі пенделікпен, күйбең пәруайсыздықпен күн  кешу   немесе орныңды таппай, «не болса сол бір баянсыз, бағасыз нәрсеге қызығып, құмар болып, өміріңнің қызықты, қымбатты шағын ит қорлықпен өткізіп» /15-ші сөз/ алып, байлауы жоқ баянсыз нәрседен пайда күту де  өзіңнің қолыңда. Хаким Абай айтпақшы "ұзақтай шулап, қарғадай барқылдап, ауылдағы боқтықтан ұзай алмай",   "ешнәрсеге көңілменен қарамай, көзбен де жақсы қарамай, көңіл айтып тұрса сенбей, көзбен көрген нәрсенің сыртын көргенге-ақ тойып қалып, сырын қалай болады деп көңілге салмай», жаныңды тәніңе билетесің, әлде, тәніңді жаныңа  бас ұрғызасың... Қалай десек те, ақыл иесі инсан ретінде жаратылыстың пайда болу себебіне үңілмесек, адамның бұл өмірге келгендегі мақсаты неде деп ойланбасақ қай жеріміз адам?  Адам мен өзге жаратылғандардың айырмасын білмей, рухани, интеллектуалды, физикалық әлемімізді күнделікті байытпасақ, сөйтіп, мына дүниеге теңіздің тамшысындай болса да пайдамызды тигізбесек ешнәрсе «білмейтін және білемін деп таласпайтын» хайуаннан қай жеріміз артық?! Абай атамыз 43-қарасөзінде қозғаған сіз ескере бермейтін дүниенің көрінбеген   сыры,  қуатты күш «сила притягательная однородного» бойыңызда бар емес пе?   Оны қолданбаған, ескеріп бақпаған адам адамшылықан шығады, хайуан болады, сондықтан "дүниенің көрінген һәм көрінбеген сырын түгендеп, ең болмаса денелеп білмесе, адамдықтың орны болмайды. Оны білмеген соң ол жан адам жаны болмай, хайуан жаны болады..." -деп оны  да түсіндірді ғой Абай ата 7-ші қарасөзінде.  Көзі ашық, көңілі ояу адам үшін бұл сөздерінің бәрі де анық өз суретімен ішіне жайғасар.

Әлем таныған Әуезовтен кейін, Абай туралы кім не айта алады?

Бүкіл ғұмырын Абайтануға арнаған, әдебиет айдынында еркін жүзген мүйізі қарағайдай корифейлерден кейін менің қосар үлесім  қандай болмақ?  Бірақ қоғам өзгеріп, жаңарған сайын, қоғамдық сана да өсіп, жаңа сипатқа ие болмай ма?!  « ... Мен бір жұмбақ адаммын, оны да ойла!...» - деп ұлы Абайдың  өзі айтып кеткендей  жаңа қырларынан танылуы әбден мүмкін ғой.

Шахинұр Сәдуақас

Жалғасы бар

Abai.kz

9 пікір
Жазира 2017-08-26 22:31:36
Жарайсың Шахинұр!!! Қазақтың əрбір азаматы, азаматшасы өз ата бабасының ғұмыр тарихын оқып білсе, біздің елімізде кемеңгер ақыл ойы озық ұрпақ көбейер еді. Мұндағы пікір жазушылардың пікірін оқи отырып, қаншалықты қазағымның батысқа еліктеп бара жатқаны көрінеді ма дим. Сондағы сіздердің айтпағыңыз, бұл мақаланы оқи сала оның мəн мағынасына үңіліп қарамай бірден діншілдікке апарып тастап отырғандарыңыз ба, қалай? Демек 21 ғасыр қазақтың батысқа еліктеп, білгенін істеп, кафелер мен барларда қыздардың темекі шегіп, спирттік ішімдіктерді ішіп, шет елдің азаматтарына тұрмысқа шыққандығы болды ма? Одан қала берді ер азаматтарымыз қалаған уақытында кек алам деп, екіншісін пышақтап, немесе атып салып кетуі ме? Егерде біле білсеңіздер дінді шынайы дұрыс түсіне білетін болсақ, осы еліктеудің біздің түбімізге жетерін білер едіңіздер. Мен мұныммен дінді керемет білемін деп отырғаным жоқ. Дегенменде қазіргі қоғамда бахавизм мен сəлəфизмдік діндер де көбейіп кетті. Неліктен деп ойлайсыздар ма? Жоқ əлде сол қоғамды кінəлап отыра бересіздер ме? Шын мəнінде неге ұрпақтарымыз осы жолға түсуде деп ойланасыздар ма? Оның барлығы мына өзіміздің сол жолға итермелеуімізден. Қазақ өз баласына кішкентайынан дінді түсіндіріп, оны меңгерте алса, осы жолға ешкім де түспес еді. Əркім өз пейілі қандай болса, оның іс əрекеті де сондай болады. Сондықтан да бала тəрбиесінің, қоғамның дұрыс қалыптасуына мына өзіміз жауаптымыз. Осындай мақала жазып, оны халыққа ұсынған жастарды дереу бастырмалатып діншіл, қоғамнан қуу керек деген ойларды айтпас бұрын ойлану керек. Сіздер бірінші діншілдің кім екенін ажырата білулеріңіз керек. Бұл мақала діншілдікпен емес əдеби тілмен өте тамаша жазылған. Қазіргі қоғамда қазақтың сөздерінің түбінде қандай мағына жатқанын түсінбейтіндер өте көп. Бұрынғы ата бабаларымыз əрбір сөздің түп мағынасын түсіне білген. Егерде əдебиетімізді дұрыс түсініп оқи білсек, қазақтың əрбір сөзінде терең мағына жатқанын түсінер едік. Əркім өз ойының жеткенін ғана түсінеді. Мұндағы Шахинұрдың ойы бұл мақаладан да тереңде жатыр. Шахинұр əлі де терең үңіліп, түсіне білсең алар асуың алда. Адам алға ұмтылған сайын кедергілер көбейе береді. Сол кедергілердің барлығын жеңе білсең ғана алға жылжи бересің. Мұндай сынның болғаны да дұрыс. Адам сыннан сабақ алады. Мұндай кезде мұңаюдың қажеті жоқ. Қайта қуаны керек. Демек сенің оқырманың көбеюде деген сөз. Сын түзелмей, мін түзелмейді. Сынды тыңдай отырып, халыққа ойыңды қалай жеткізу керек екенін де түсіне білесің. Шахинұр саған қосар ақылым, əрбір жазылған пікірден, сенің мақалаңа тағы не жетпей тұрғанын түсіне біл. Халыққа қалай жеткізсең жүрегін жаулайтыныңды түсінуің керек. Бұл əлі кедергілердің алды ғана. Өмір түрлі жағдайлардан тұрады. Бірде күлесің, бірде жылайсың, сөйте жүре өмірдің небір соқтықпалы соқпалы кезеңдерінен өтесің. Сондықтан да соған төтеп беретін күш қайратың болу керек. Мұндай пікірлерге мұңаюдың қажеті жоқ. Қайта сабақ алу керек. Сен əлі талай көкпарларда оза шауып, биік шыңдардан көрінесің деп сенемін. Тек қана алға!!!
Aktas 2017-08-26 00:36:27
Оте тамаша жазылган коооп рахмееет
Калай булай 2017-08-26 00:31:56
Апырай: Бул автор карындасымыз 21 гасырда омир сурип жатыр, сиз кай гасырда омир сурип жатырсыз? Шамасы 20 гасыр орыс саясаты дин апин заманында журсиз ау шамасы
Апырай 2017-08-16 17:48:55
Мына автор қай заманда өмір сүріп отыр ? Мынадай уағызымен діншіл экстремизмге апаратын жолды насихаттайтыны қалай? Абайтанудағы "мүйізі қарағайдай корифейлер" дегені несі, олар мал ма, мүйізі бар? Осындай уағызшылардан оқу жылы таянып қалды оқу орындары жедел құтылуы керек. Бұлар дінді насихаттап, жастарды соқыр дін жолына салып қоюшылар.
Діншіл болма 2017-08-13 20:16:54
Дінді силаймын, бірақ әсіре діншілдік, әсіресе әзәзіл сияқты жұқалап сайрап, жастардың басын шырмайтын әрекеттерге, сұғанақ, зымияндық діншілдікке қарсылық көрсету керек. Конституция бойынша Қазақстан зайырлы мемлекет, дін мемлекеттен, мектеп /оқу орындары/ діннен ажыратылған. Сондықтан мұндай жазбалармен ешкімнің басын қатырмау керек. Бұл жерде Абайдың беделін жамылу, діни насихат жүргізу барып тұрған сорақылық. Ұлы Абайдың жазғандарын өз икеміне бұра тартып, кәмментәрій жасап күн көрушілер көбейді, оларға заң жүзінде тыйым салу керек. Евразия университеті діни оқу орыны емес қой, ректораты қайда қарап отыр ? Мынадай оқытушы студенттердің миын дін апиынымен уландыратын болса бұл қайда апармақ ?Діншілдік бүгінгі қоғамның жауы. Алғашқы жемісін көрудеміз. Дін әркімнің жеке басының ісі, ожданы ғана болуы керек. Жамандық жасама, жақсылық жаса, нашарға көмектес деген. Оны мынадай насихаттауға, абсолютке айналдыруға болмайды.
Шахинұр Садуақас 2017-08-11 08:42:51
Төкен ағай, мақалама жазған ой-пікіріңізге ықыласым ерекше. Алла разы болсын! "Қазақ Абайды оқығанмен түсінген емес" дегенмен келісуге тура келеді. Бір абайтанушы ғалым айтпақшы "Абайды танудан көрі Абай, Абай деген ұранның ығында жүрміз". Дегенмен Түсіну үшін Конфуций институтының əлемнің қаншама елінде ашылғаны сияқты, Қазақ жерінде Абай институтының ашылғаны дұрыс. Отбасы тəрбиесінде ата-ананың, əсіресе ертеңгі ана болатын қылықты қыздарымыз Абайды тоқу керек. Абай айтқан "Единицалар" осыдан шығады ғой деп ойлаймын.
Шахинұр Садуақас 2017-08-11 08:30:28
Бата, айтқаныңыз келсін. Аумин! Жақсы сөз де жақсы ойлаудың нәтижесі ғой. Пікіріңізбен толықтай келісемін. "Махаббатпен жаратқан адамзатты, Сен де сүй ол Алланы жаннан тəтті, Адамзаттың бəрін сүй бауырым деп,Және Хақ жолы осы деп əділетті" . Өзіңіз айтқандай осы жолдарға əр адам өзін сидырғанда ғана əр нәрсе жүйесін табатынына сенімім кәміл.
Бата 2017-08-11 00:30:28
Абайдың жұмбағы - Қазақ деген ұлттың жұмбағы, ол біздің Абай сөйлеген тілде сөйлейтін Сіз бен Біздің жұмбағымыз. Бұл жұмбақтың шешімі Жаратушыны сүйе білгенімізде, Жаратушының жаратқандарын сүйе білгенімізде, оның ішінде Адамзатты да, адамзат болған соң Қоғамды да, қоғам болған соң оның ішіндегі Әділетті сүйе білгенде ғана шешілмек. Қазақ ұлтының жұмбағы шешіліп жатса Ғұмыр жұмбағы, Адамзат жұмбағы шешіліп жататынына Сеніміміз мол. Менің айтайын дегенім Абай ол - Қазақ. Демек, осы бір Единицаға Абайдың тілімен сөйлейтін Сіз бен Біз өзімізді сидырғанда ғана әр нәрсе өз жүйесін таппақшы. Ол деген Тіршілік бола жатар, Ауыздың Бірлігін ойлайтын заман келді. Жан-жаққа тартқыламай, Сөзге тоқтап, Кешірімді бола отырып, Салт-дәстүрімізді сақтай отырып, Ұлт болып бірігуімізге Құдай-Тағала өзің жар болагөр деген батамды бергім келіп еді. Әумин!
Төкен 2017-08-10 21:28:41
"Қызды айтсам, қызықты айтсам, қыздырмалап, әр сөзін мыңға балап тыңдар едің" деп Абайдың өзі айтқандай қазақтың ой сөзді оқуға, оны талқылауға құлқы жоқ екені осы мақалаға пікір жазбауынан көрініп тұр.Жақында осы сайтта тағы бір автордың "Қазақ Абайды оқығанмен оны түсінген емес"деген мақаласы шықты, рас сөз.Мектепте тақылдатып, тақпақ етіп айтамыз, болды мағынасына үңілмейміз.Қашық бол, жолама деген бес іске кенедей жабысып елдің алдындамыз.Қарапайым адамнан мемлекет деңгейінде өтірік айту, мемлекет қазынасын мақтан үшін шашу,үлкен мақсатты іске жұмылмай еріншектік таныту,бір бірімізді дос көрмеу.Қырсыққандай көрсеткен бес асыл іске қарама қарсы жүреміз. Автордың позитивті ойлау дегені дұрыс, құптауға тұрады. Осы орайда оқыған бір тәмсіл еске түсіп отыр. Баяғыда өнеркәсібі дамыған, бай қалаға адамдар нан табуға жан жақтан келеді екен.Қалаға кіре берісте етік тігетін бір шал отырады.Жаяу -жалпылап келген адамдар аяқ киімін шалға жөндетіп әрі кетеді екен.Сонда келген бір жолаушы, "мен мына қалаға талап іздеп келіп едім, бұл қаланың халқы қалай өзі" деп сұрайды.Сонда шал "бұрынғы өзің тұрған жердегі адамдар қалай еді" деп сұрайды. -Мен тұрған жердегі адамдар нашар барлығы бас пайдасын ойлайтын, адамға қайыры жоқ адамдар еді" дейді жолаушы.Шал аз кем ойланып, -Сен бұл қалада да ондай адамды жолықтырасың дейді. Екінші келген жолаушы да осындай сқрақ қояды. Шал оған да қарсы сауалын қояды. -Мен тұрған жердегі адамдар мейрімді, біреуге жақсылық жасауға даяр қайырымды адамдар еді" дейді екінші жолаушы.Шал оған да -Сен бұл қалада да ондай адамды жолықтырасың дейді. Бұдан шығатын қорытынды әркім өз ойына, өз ұстанымына лайық адамдарды кездестіреді дегенге саяды.Біздеде де әр өңірдің адамдарына қасаң қағида қалыптастыфратындар бар, " шымкенттіктер пәлен-түген деп жатады. Іссапармен барып көргем, қазақылығы мол адамдары ақжарқын жақсы жер."Солтүстіктегілер суық орыстасып кеткен дейді.Суық ештеңесі жоқ, сол кең қолтық қазақ.Қазір инетте қазақстанда жасап, сырт елге көшкендер қазаққа алғысын жаудырып жатады.Бір кезде соларға көрсеткен жақсылықты бір-бірімізге көрсетуіміз керек .Дүниеге құл болып, жарысқа түскен мына заманда тот басқан жүрегімізді Абайдың құмқағазына сүйкеп тазартып отыруымыз керек сияқты.

Үздік материалдар

Рухани жаңғыру

Қанат Әбілқайыр. Қарыз бен Парыз

Abai.kz 7759
Қауіп еткеннен айтамын

Қазақстанда жүрген қытайлар кімге сүйенеді? 

Н.Қошаманұлы 15034