Келесі аптадан бастап аумағы 800 шаршы метрден аспайтын дүкендер қайта ашылады. Автосалондар, кітап және велодүкендер, мұражайлар, кітапханалар мен мұрағаттар, хайуанаттар және ботаникалық бақтар жұмыс істейді. Бұл туралы "Неміс толқыны" хабарлады.

Дегенмен елде кейбір шектеулер 3 мамырға дейін сақталады. Меркель тұрғындарға қоғамдық орындарда медициналық маска тағып жүруге кеңес берді.

Германияда 4 мамамырда мектептер, шаштараздар жұмыс істей бастауы мүмкін, бірақ ірі қоғамдық іс-шаралар, діни қызметтер тамыздың аяғына дейін өткізілмейді. Барлар, кафелер, мейрамханалар, кинозалдар мен ән алаңқайлары да әзірге жабық тұр.

Германияда 127 мың адам коронавирус жұқтырған, жұқпалы дерттен 3200-ден астам адам қайтыс болған.

Бұның алдында Еуропадағы бірқатар ел шектеулерден бас тарта бастады. Данияда сейсенбіден бастап мектептер мен кейбір балабақша ашылды. Австрияда шағын дүкендер жұмыс істеп тұр, ал 1 мамырдан бастап спорттың кейбір түрлерімен далада шұғылдануға рұқсат. Италияда кітап дүкендері мен балаларға арналған киім дүкендері жұмыс істей бастады.

Францияда қатаң карантин шаралары 11 мамырға дейін созылды. Бельгияда мұндай шаралар кемінде 3 мамырға дейін сақталады.

Abai.kz