Әйелдердің босануын жеңілдететін төсек жобасын жасаған астаналық Марат Сүлейменов Республикалық инновациялық бизнес жоспарлар NIF$50K байқауының жеңімпазы атанып, 7,5 млн теңге көлеміндегі қаржылай сыйлыққа ие болды. Бұл туралы кеше Республикалық инновациялық бизнес жоспарлар NIF$50K және Республикалық рационализаторлық ұсыныстар байқауының қорытындысын шығару кезінде мәлім болды.

Әйелдердің босануын жеңілдететін төсек жобасын жасаған астаналық Марат Сүлейменов Республикалық инновациялық бизнес жоспарлар NIF$50K байқауының жеңімпазы атанып, 7,5 млн теңге көлеміндегі қаржылай сыйлыққа ие болды. Бұл туралы кеше Республикалық инновациялық бизнес жоспарлар NIF$50K және Республикалық рационализаторлық ұсыныстар байқауының қорытындысын шығару кезінде мәлім болды.

Индустрия және жаңа технологиялар министрлігінің қолдауымен Техноло­гиялық даму жөніндегі ұлттық агенттігі ұйымдастырған қос байқауға қатысу­шылар көп болыпты. Аталған агенттіктің басқарма төрағасының орынбасары Әнуарбек Сұлтанғазиннің айтуынша, NIF$50K байқауы елімізде алғаш рет 2005 жылы өткізілді. Ондағы мақсат - еліміздегі инновациялық кәсіпкерлікті насихаттау және халықтың инновациялық белсенділігін арттыру болатын. Ол мақсат бүгінде орындалып келеді деуге негіз бар. Бұған биылғы байқауға 281 жобаның келіп түскені дәлел. Бұл өткен жылмен салыстырғанда 1,5 есеге көп екен. «Елі­міздің барлық өңірінен келген жоба­лар­дың арасында үздік деген 25 жоба ірік­теліп алынды. Міне, осы 25 жобаның автор­лары «Хабар» арнасындағы «Ин­новациялық форсаж» атауымен реалити-шоу форматында бағдарлама мен «Қа­зақстан» арнасында көрсетілген «Рационализатор.kz» бағдарламасының кейіпкері атанды» дейді ол. Айта кетейік, таңдалып алынған жобалардың басым бөлігі медицина, энергетика және өндіріс салаларын қамтиды екен.
Соның ішінде медицина саласы бойын­ша жасалған инновациялық ұсы­ныс топ жарып отыр. Жоба авторы Марат Сүлейменов ежелден бері қазақ халқы әйелді тікесінен тік тұрғызып немесе жүресінен отырғызып босандырғанын еске салды. «Соңғы жылдары бұл үдеріс заманауи перзентханаларға да енгізілді. Ал аталған төсек босанушы әйелдің қалауына сай тік тұрып босануға немесе төрт аяқтап тұрып босануға мүмкіндік береді. Менің туындымның өзіндік құны Еуро елдеріндегі баламаларынан 30 пайызға арзан» дейді акушер-гинеколог М.Сүлейменов.
Мараттан кейін аты озған Көкшетау қаласының тұрғыны Сағат Мұхамедин екінші орын мен 2,5 млн теңге жүлдеге ие болды. Ол өндірістік жылу алмастыру құбырларын қатты қалдықтардан тазарту технологиясын ұсынды. Жобаның жаңалығы сол, жылу алмастыру құ­быр­ларын тазартуда электрогидравликалық әсер қолданылады. Идея жылу энер­гетикасымен қатар, тамақ және химия өнеркәсібі саласына да пайдалы болмақ.
Үшінші орын мен 1 млн теңгеге «Орта және төменгі жастағы балаларға арналған мультимедиялық білім беру жүйесі» жо­басын ұсынған Әділ Нысанов пен Сабыр­ға Мұхамбетов ие болды. Олардың жоба­сының мүмкіндігі шектеулі балалар үшін тиімділігі зор дейді байқау қа­зылары.
Ал Республикалық рационали­затор­лық ұсыныстар байқауының биылғы жеңімпазы - жетісайлық Ибадулла Үм­бетаев пен Оразбек Биғараевтар болды. Олар «Топырақты 55-65 см-ге дейін терең қопсыту әдісі» жобасын ұсынып, «Жылдың үздік рационализаторлық шешімі» аталымында топ жарды. 1,5 млн теңге көлеміндегі қаржылай сыйлық қанжығаларына байланды. Бұл шешім бүгіннің өзінде оң нәтиже беріп, мақта өнімін 2 есеге арттырыпты. Оған қоса, шаруалар топырақ өңдеуде де үнемдеуге қол жеткізуге болады деп отыр. Мәселен, егер бұрынырақ себу жұмыстарынан алдын топырақтың әр гектарын өңдеуге 18 мың теңге жұмсалса, жаңа техноло­гия­ны қолдану шығын көлемін 12-13 мың теңгеге азайтуға мүмкіндік береді екен. Олар ұсынған инновациялық әдіс мақта егуші аймақтарға тән топырақтың сорлану мәселесін де шешетін көрінеді. «Біз бүгіндері мақта шаруашылығында осыдан 40-50 жылғы бұрынғы ескі тех­нологияларды пайдаланып келеміз. Соны жаңарту мақсатында, ең алдымен жерді терең қопсыту арқылы мақтаның өнімін көтеруді қолға алдық. Соңғы 2 жылдың ішінде нәтижесін берді» дейді Ибадулла Үмбетаев.
Бұл байқаудың екінші және үшінші орындарын «Атырау мұнай өңдеу зауыты» ЖШС қызметкері Айгүл Айтбайқызы мен «KSPstell» ЖШС Павлодар фи­лиалының директоры Вадим Савицкий мен бөлісті. Оларға сәйкесінше 1 млн және 750 мың теңге көлемінде сыйақы табыс етілді.
Ал «Кәсіпорындағы рационализа­тор­лық қолдаудың үздік жүйесі» аталымында «Қазақстан темір жолы» ұлттық компа­ниясы жеңімпаз атанды. Компания өт­кен жылы экономикалық тиімділігі 850 млн теңге көлеміндегі 1443 рацио­нали­заторлық ұсынысты енізген.

"Абай-ақпарат"