АҚШ президенті Дональд Трамп демалыс күндері гольф ойыны кезінде Сенаттағы республикалық көпшіліктің жетекшісі Джон Тьюнге Ресейге қарсы санкциялар туралы заң жобасын Конгресте ілгерілетуді сұрады, деп хабарлайды Ulysmedia.kz.

Бұл туралы бастаманың авторы, республикашыл сенатор Линдси Грэм мәлімдеді. CNN телеарнасының 19 қарашадағы кешкі хабарында Грэм Трамптың бұл өтінішін 16 қарашада, жексенбі күні айтқанын жеткізді.

Сенатордың айтуынша, шамамен екі сағат бұрын Ақ үйден президент әкімшілігінің бұл құжатты қолдайтыны туралы ресми мәлімдеме келген.

РЕСЕЙ МҰНАЙЫН САТЫП АЛАТЫНДАР

Аталған заң жобасын қазіргі таңда 80-нен астам сенатор қолдап отыр. Құжат Ресейден мұнай, газ, уран және басқа да өнімдерді сатып алатын елдерден келетін импортқа 500 пайыздық баж салығын енгізуді көздейді. Бұл бастаманы биыл сәуір айында сенаторлар Линдси Грэм мен Ричард Блюменталь ұсынған.

Грэмнің пікірінше, Конгресс бұл заңды қабылдау арқылы Ресей президенті Владимир Путинмен келіссөздер жүргізуде «қысым тетіктерін» иелене алады. «Егер сіз Путинді келіссөз үстеліне отырғызғыңыз келсе, онда 28 немесе 12 тармақтан тұратын жоспардың ешқайсысы нәтиже бермейді, егер Путин біз Украинаға әскери қолдау көрсетуді жалғастыратынымызға және арзан ресейлік мұнайды сатып алатындарды жазалайтынымызға сенбесе», — деді сенатор.

Abai.kz