Қырғызстанда Серік Күдебаевтың ісі бойынша 5 адамға айыппұл салынды. Бұл туралы 24.kg хабарлады.

«Қазақстандық генерал Серік Күдебаевтың қашып кету фактісі бойынша қылмыстық істің бес қатысушысы сотталды», - делінген хабарламада.

Бұған дейін барлық айыпталушылар кінәсін мойындау туралы келісімге қол қойғаны нақтыланған.

«Іс бойынша төрт айыпталушы – қарапайым тұрғындар, тағы бірі – ҰҚКД Шекара қызметінің бұрынғы қызметкері екені белгілі. Істі республиканың Әскери прокуратурасы жүргізді. Тергеу аяқталғаннан кейін материалдар сотқа берілді. Алдын ала мәліметтер бойынша, барлық айыпталушыларға 350 мың сом айыппұл салынды», – деп хабарлады редакция.

Еске салайық, биыл сәуірде Алматы облысы ПД экс-басшысы Серік Күдебаев 10 жылға сотталды.

Сот үкімі шықпай тұрып, Қырғызстан арқылы Түркия асқан бұрынғы генерал ақыры түрік елінде жүрген жерінен ұсталып, елге әкелінді.

Ол Қаңтар оқиғасы кезінде  «ауыр зардаптарға әкеп соққан қызметтегі әрекетсіздігі» үшін айыпталған болатын.

Abai.kz