قىرعىزستاندا سەرىك كۇدەباەۆتىڭ ءىسى بويىنشا 5 ادامعا ايىپپۇل سالىندى. بۇل تۋرالى 24.kg حابارلادى.

«قازاقستاندىق گەنەرال سەرىك كۇدەباەۆتىڭ قاشىپ كەتۋ فاكتىسى بويىنشا قىلمىستىق ءىستىڭ بەس قاتىسۋشىسى سوتتالدى»، - دەلىنگەن حابارلامادا.

بۇعان دەيىن بارلىق ايىپتالۋشىلار كىناسىن مويىنداۋ تۋرالى كەلىسىمگە قول قويعانى ناقتىلانعان.

«ءىس بويىنشا ءتورت ايىپتالۋشى – قاراپايىم تۇرعىندار، تاعى ءبىرى – ۇقكد شەكارا قىزمەتىنىڭ بۇرىنعى قىزمەتكەرى ەكەنى بەلگىلى. ءىستى رەسپۋبليكانىڭ اسكەري پروكۋراتۋراسى جۇرگىزدى. تەرگەۋ اياقتالعاننان كەيىن ماتەريالدار سوتقا بەرىلدى. الدىن الا مالىمەتتەر بويىنشا، بارلىق ايىپتالۋشىلارعا 350 مىڭ سوم ايىپپۇل سالىندى»، – دەپ حابارلادى رەداكتسيا.

ەسكە سالايىق، بيىل ساۋىردە الماتى وبلىسى پد ەكس-باسشىسى سەرىك كۇدەباەۆ 10 جىلعا سوتتالدى.

سوت ۇكىمى شىقپاي تۇرىپ، قىرعىزستان ارقىلى تۇركيا اسقان بۇرىنعى گەنەرال اقىرى تۇرىك ەلىندە جۇرگەن جەرىنەن ۇستالىپ، ەلگە اكەلىندى.

ول قاڭتار وقيعاسى كەزىندە  «اۋىر زارداپتارعا اكەپ سوققان قىزمەتتەگى ارەكەتسىزدىگى» ءۇشىن ايىپتالعان بولاتىن.

Abai.kz