Қазақстан азаматтары заңды түрде Оңтүстік Кореяға барып, үш жыл жұмыс істей алады, деп баяндады Қазақстанның еңбек және халықты әлеуметтік қорғау министрлігі көші-қон комитетінің төрағасы Асқарбек Ертаев.

Асқарбек Ертаевтың айтуынша, осы айдан бастап қазақстандықтарды аталған елге жіберуге арналған Сапар орталығын ашу жұмыстары басталды. Орталықтың негізгі міндеті – Оңтүстік Кореяда жұмысқа орналасқысы келетін үміткерлерге тілдік курстарды оқыту, корей тілінің тестілеуі, біліктілігін арттыру. Нәтижесінде аталмыш орталық арқылы Қазақстан азаматтары Кореяда үш жылға дейін жұмыс істей алады.

– Тестілеу орталығы Алматыда әл-Фараби атындағы Қазақ ұлттық университетінің базасында ашылады. Аталған мекеменің қажетті материалдық-техникалық базасы, оқу аудиториясы бар. Заманға сай құралдармен жабдықталған. Тестілеу орталығының 500-ге тарта компьютер орыны бар. Қазақстан азаматтарын Қонаев көпбейінді колледжінде оқыту көзделіп отыр. Яғни, Оңтүстік Кореяға бармас бұрын олар оқытылады, – дейді Асқарбек Ертаев.

Abai.kz