Ресей билігінің жоғары лауазымды өкілдері өздерінің мәлімдемелері арқылы Ресеймен тарихи және мәдени байланысы бар Украина өңірлерін айрықша белгіледі.

Соғысты зерттеу институтының (ISW) есебіне сәйкес, оның артында Қырым мен оңтүстік-шығыстың төрт облысынан тыс неғұрлым кең аумақты қосып алу ойы жатыр.

Нақтырақ айтқанда, 30 маусымда Ресей президенті Ресей Федерациясының бақылауындағы өңірлерді дамытуға арналған кеңес өткізді, онда ол Украина аумағын қайта-қайта «Донбасс және Новороссия» деп атады.

Сондай-ақ, Кремльдің баспасөз хатшысы Дмитрий Песков Одесса мэрі Геннадий Трухановтың қаланың тәуелсіздік тарихы туралы мәлімдемесіне түсініктеме беріп, «Одесса тарихы Ресеймен тығыз байланысты» екенін атап өтті.

Ресей президентінің кеңесшісі Владимир Мединский өз кезегінде Днепрдің екі жағындағы, соның ішінде «Новороссия» және Қырым аумағындағы «ежелгі орыс жерлері» тұжырымдамасына сілтеме жасай отырып, орыстар мен украиндар «бір халық» деген пікір айтты.

ISW сарапшыларының пікірінше, мұндай мәлімдемелер Мәскеудің Украина аумағына ықпалын күшейтуге бағытталған бұрынғы бағытының одан ары да жалғаса беретіндігін айғақтайды. Сарапшылар 20 маусымда Ресей президентінің Ресей-Украина қарым-қатынастарын біртұтас халық ретінде, ал Украинаны Ресей тарихының бір бөлігі ретінде қарайтын пікірлерін еске салды.

Құжатта Ресей билігінің өкілдері Одессаны тарихи тұрғыдан Ресеймен байланысты қала деп атап, Украинаның барлық шығыс және оңтүстік бөліктеріне қатысты «Новороссия» терминін пайдаланатыны атап көрсетілген.

ISW сондай-ақ Херсон, Запорожье және Днепропетровск облыстары шегінде Днепрдің оң және сол жағалауларын толық бақылау қажеттігі туралы айтқан аумақтар әкімшіліктерінің жекелеген өкілдерінің мәлімдемелерін де еске салды.

Сарапшылардың пікірінше, мұндай реваншистік мәлімдемелердің тұрақты көрініс беруінің өзі – Ресей билігінің Украинаның белгілі бір өңірлеріндегі ықпалын нығайтуға және саяси қысымды жалғастыруға ұмтылысын көрсетеді.

Abai.kz