Қазақстанның әйгілі ауыр атлеті Илья Ильин спорт саласында сіңірген еңбегі үшін берілетін ресми спорттық зейнетақының иегері атанды.

Бұл туралы оның жұбайы Татьяна мәлімдеді.

"Ендеше, сені де, өзімді де құттықтаймын! Енді мен – зейнеткердің әйелімін! Өткен аптада Ильяға зейнетақысы туралы бұйрыққа қол қойылды", – деді кәсіпкер әйел Instagram желісінде бөліскен видеосында.

Өз кезегінде ауыр атлет 37 жасында қалай зейнеткер атанғанын түсіндірді.

"Менің білуімше, 2022 жылы Президенттің қолы қойылған бұйрық шыққан. Соған сәйкес елдегі әрбір әлем чемпионы мен Олимпиада чемпионы 20 жыл еңбек өтілі болғаннан кейін ай сайын 100 АЕК алады (432 500 теңге. – ред.). Осы айда менің 20 жыл еңбек еткенім туралы бұйрыққа қол қойылды, енді мен спорттық зейнеткермін... Яғни ресми түрде зейнеткер атандым", – деді Илья Ильин.

Abai.kz