Кеше:
- Уа, кімсіз?
- Ыбыраймыз.
- Жаймысыз?
- Жаймыз.
- Уа, қайдан келесіз?
- Сайлаудан келеміз.
Елге ойран сап
Ойнаудан келеміз.
Төске таққан шеніміз бар,
Патшаға жаққан ебіміз бар,
Құдайға шүкір,
Қойдан жуас,
Момақан ғана еліміз бар.
Біз бай,
Біз құдай!
Күш сынасса,
Жым болады.
Кім келеді сайма-сай!
Бүгін:
- Уа, кімсің?
- Ыбыраймын.
- Жаймысың?
- Жаймын.
- Қайдан келесің?
- Соттан келемін.
Соттан емес –ау, оттан келемін.
- Білдің бе?
- Білдім ғой.
- Қалай екен?
- Арыз берген малай екен.
- Солай ма екен?
- Солай екен!
- Не дейді?
- Ақы сұрайды.
- Қанша?
- Он мың сом.
- Он мың сом?
Нең қалады?
- Нем қалсын:
Қатын қалад,
Мен қалам.
- Шенің қайда?
- Тозған.
- Елің қайда?
- Күні озған.
- Енді не етпексің?
- Бітем!
- Бітсең, біт, мен де соныңды күтем.

Бейімбет Майлин

Abai.kz