Бүгін, яғни 15 қарашада  Бейбітшілік және келісім Сарайында ҚР Ұлттық Банкі «Қазақстан Тәуелсіздігіне 25 жыл: ұлттық валюта» атты конференция ұйымдастырды.

Конференцияға қатысушыларға арнап ҚР Мемлекеттік хатшысы Гүлшара Әбдіқалықова құттықтау сөз сөйледі.

Өз сөзінде Мемлекеттік хатшы конференция ел Тәуелсіздігінің 25 жылдығының салтанатты белесі қарсаңында өтіп отырғанын атап көрсетті.

«Мемлекет басшысының сындарлы көшбасшылығының арқасында Қазақстан тұтастай дәуірмен теңесетін жолдан өтті. Жарқын жетістіктер мен  толағай табыстардың 25 жылы – Елбасының көреген және сарабдал саясатының салтанатына айналды», – деді Г.Әбдіқалықова.  

Мемлекеттік хатшы «Елбасы Нұрсұлтан Назарбаевтың жалпыұлттық бірлік пен қоғамдық келісімнің бірегей үлгісі Қазақстанның жарқын жетістіктерінің шешуші факторына айналғанын, Қазақстан халқы Ассамблеясы оның басты ұйытқысы болғанын» айтты.

Мемлекеттік хатшы конференцияға қатысушыларды кәсіби мереке – Ұлттық валюта күнімен құттықтап, Мемлекет басшысының 1993 жылы төл теңгемізді енгізу туралы тарихи шешімі көреген, әрі тағдыршешті қадам болғанын атап өтті.

Іс-шара барысында ҚР Ұлттық Банкінің төрағасы Данияр Ақышев Тәуелсіздіктің 25 жылдығына арналған 10 мыңдық сувенирлік банкнотты және монетаны таныстырды. Басқосуда сондай-ақ, өзге де мемлекет және қоғам қайраткерлері, ғалымдар мен экономистер сөз сөйледі.

Абай-ақпарат

___________________