Бүгін «Нұр Отан» партиясының Республикалық қоғамдық қабылдау бөлмесіне ҚР Парламенті Мәжілісінің депутаты Бақытгүл Қайыржанқызы Хаменова келіп, азаматтарды қабылдады, - деп хабарлайды Абай-ақпарат.

Кеше ғана Abai.kz ақпараттық порталы 59,900 АҚШ доллары ақшасын ШҚО Зайсан ауданына қарасты «Майқапшағай» кедендік бекеті тәркілеп алған жесір әйел Гүлжан Мәуітханқызының жанайқайын жазған еді. Осыдан кейін мерекелік көңіл-күйге қарамастан аталған мәселе күннің бас тақырыбына айналды. 

Бүгін міне, сол қандасымызды депутат Бақытгүл Қайыржанқызы арнайы қабылдады.

Гүлжан Мәуітханқызының қабылдауына келетінін естіген депутат Бақытгүл Қайыржанқызы гүл мен балкүлшесін ала келіпті.

Айдың-Күннің аманында адал ақшасынан айырылған ананың уәжін тыңдаған депутат ханым, қолынан келгенше, Заң аясында көмектесетінін, керек болса, қаржы жағынан да қол ұшын берітінін айтып, жарым көңіл Гүлжан Мәуітханқызын 8 наурыз мерекесімен құттықтады.