«Ата Мекен» парламенттік фракцияның мүшелері Текебаевтың қамауға алынуының саяси астары бар деп мәлімдеп, арнайы комиссия құруды талап еткен. Талқылау барысында бірқатар депутаттар оның мәселесін қылмыстық іс қозғалған екі депутатқа қатысты құрылған комиссия аясында қарауды ұсынған. Осылайша, «Ата Мекен» фракциясының үш депутатының үстінен қозғалған қылмыстық істі бір комиссия қарайды.

Депутат Аида Саляноваға қарсы қылмыстық іс қозғалғаннан кейін Жогорку Кеңеште комиссия құру жөнінде 8 ақпанда шешілген. Енді комиссия бір айдан кейін қорытынды шығаруға тиіс.

Әзірге Бішкекте Өмірбек Текебаевты қолдауға арналған митинг аяқталды. «Ауа-райы өзгеріп жатыр. Алдын айтқандай, біздің акция Текебаев бостандыққа шықпайынша, жалғаса береді. Алайда арасында үзіліс болып тұрады», - деді Аида Салянова.

28 ақпанда Текебаев Бішкек қаласы Бірінші май аудандық сотының шешімі бойынша екі айға қамауға алынды. Ол ресейлік кәсіпкер Леонид Маевскийдің арызы бойынша ұсталған. Кәсіпкер 2010 жылы Текебаевқа «Мегаком» компаниясының акциясын иелену үшін бір миллион доллар бергенін айтқан.

Abai.kz