Полиция 21 қаңтарда Астана – Петропавл тас жолында Van Hool автобусы тұрып қалғаны туралы мәлімет алған. Автобус Петропавл-Сарыағаш рейсіне шыққан. Қатты аяздан автобустың дизель отыны қатып қалған. Салонда 43 жолаушы болған. Екі жүргізуші - Оңтүстік Қазақстан облысының тұрғындары, қалғандары - Өзбекстан азаматтары.

Құтқару қызметі жолаушылар мен жүргізушілерді Шортанды ауданы Бозайғыр ауылында ұйымдастырылған жылы орынға жеткізді. Оларға тамақ пен төсек берілді.

Бұған қоса, дүйсенбіге қараған түні полиция қызметкерлері Бұланды ауданында бұзылып қалған Setra автобусындағы жолаушыларға көмектесті. Олар Мерке-Тюмень бағытымен шыққан. Салонда екі жүргізуші және 55 жолаушы – Тәжікстан азаматтары болған. Оларды жылы орынға жеткізді.

Қазақстанның Ақмола облысында қатты аязға байланысты барлық бағыттарға қоғамдық көліктер үшін жол жабылды. Полиция азаматтарды алыс жолға шықпауын сұрады.

Еске салайық, өткен аптада Самара – Шымкент тас жолында автобус өртеніп, 52 азамат қаза тапты. Олардың барлығы Өзбекстан азаматтары еді.

Abai.kz