5-14 маусым, 2018 ж. Гори (Грузия). Қазақстан Республикасы Мәдениет және спорт министрлігінің қолдауымен Жастар театры 5 -14 маусымы аралығында Грузия мемлекетінің Гори қаласында өтетін Халықаралық Комедия фестиваліне У.Шекспирдің «Асауға тұсау» қойылымымен қатысады. Спектакльдің қоюшы режиссері – Қазақстанның еңбек сіңірген қайраткері Нұрқанат Жақыпбай. 

Спектакль Грузия мемлекетінің Гори қаласында 2018 жылдың 6 маусымы күні сағат: 20.00 (Грузия уақыты бойынша) жергілікті халық пен фестиваль қатысушылары назарына ұсынылады.

Айта кетейік, Гори қаласында бесінші рет өткелі тұрған Халықаралық комедиялық театр фестиваліне Қазақстандық театр бірінші рет қатысқалы тұр.

Халықаралық, республикалық деңгейдегі фестивальдердің бірнеше мәрте Гран при жүлдегері атанып үлгерген «Асауға тұсау» қойылымы қазақ театр өнерінің көркемдік кеңістігінен алар орны айрықша.

«Асауға тұсау» - асау қызды ауыздықтау емес, кіршіксіз махаббатты шынайы түсінуден тұратын ерлі-зайыптылар арасындағы адал достықты жыр етеді. Сөзі өткір, өрмінезді Петруччио мен тапқыр әрі ақылды тентек Катарина екеуінің әзілді қақтығыстары қыз бен жігіттің айтысындай өте тартымды. Әзілқой Грумио, жылпос Транио, жұмсақ мінезді Баптиста тағы басқа кейіпкерлердің мінез-құлқы жалынды жастардың актерлік шеберлігіне ұласқанда, сахна көңілді көріністерге тола түседі. Жарасымды қалжыңымен баурап, көркемдік құдіретімен еліктіре түсер шығарма режиссердің ұтымды шешімімен сахнаға шықты.

Abai.kz