Елбасының «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан Халқына арнаған Жолдауы бойынша өткен актив жиында Түркістан облысының әкімі Ж.Түймебаев "Түркістан - туризм орталығына айналады" деп мәлімдеді.

Өңір басшысы Жансейіт Түймебаев бұл жиында негізгі алты бағыттан тұратын саяси құжаттың мәні мен мағынасына жеке-жеке тоқталып, оның қазақстандықтардың табысын арттыруға, әлеуметтік жағдайын жақсартуға, орта және шағын кәсіпкерлікті одан ары дамытуға, халықтың өмір сүруіне қолайлы әрі қауіпсіз қоғамдық орта құруға бағытталғанын жеткізді.

Жолдаудағы әрбір айтылған тармақтарды талқылаған жиында облыс басшысы өңірдегі атқарылып жатқан жұмыстарды да айтып берді. «Елбасы Жолдауындағы «Бизнестің жол картасы – 2020» бағдарламасының мерзімін 2025 жылға дейін ұзартуды жүктегені жаңадан құрылған Түркістан облысында да кәсіпкерлік саласының одан ары дамуына тың жол ашады» деді Жансейіт Қансейітұлы.

Облыс әкімі индустрияландыру, өнеркәсіп, құрылыс, тұрғын үй, туризм, агроөнеркәсіп сынды салалардың өңірдегі көрсеткішімен және өңірді дамыту жоспарларымен бөлісті. Әкімнің айтуынша, облыс орталығында тарихи этнотуризмді дамытуға барлық мүмкіндік бар. Түркістанның тариxи құндылықтарын сақтау, одан ары көркейту, Қожа Аxмет Яссауи кесенесі негізінде мәдени-руxани орталықты сақтау және әкімшілік-іскерлік орталықты құруға ерекше көңіл бөлінуде. «Жақын арада біз облыс орталығына келетін 1 миллионыншы туристті күтетін боламыз. Болашақта туризмді дамытуға бағытталған басқа да түрлі жолдардың нәтижесінде облысқа келетін туристердің санын 5 миллионға жеткізу межеленіп отыр. Ол үшін «Әзірет Сұлтан» қорық-музейінің даму жоспары түзілген. Жоспарға сәйкес бірінші кезекте Түркістанның ежелгі қоныстарының бірі – Күлтөбе қалашығы қайта жаңғыртылады. Әбілмәмбет хан мен Тәуке ханның ордалары, олардың жанындағы ортағасырлық үлгідегі мешіт және басқа да бірқатар нысандар толық қайта қалпына келтіріледі» деді әкім. Басқосуда мінберге бірқатар азаматтар шығып, ойларын ортаға салды. Сөз алған Қожа Ахмет Яссауи атындағы Халықаралық қазақ-түрік университетінің ұстазы, тарих ғылымдарының докторы Хазіретәлі Тұрсын: «Елбасы Жолдауы институционалды сипат алып, еліміздің саяси өміріне берік орнықты. Қазіргі кезде Елбасы Жолдауын алдағы күннен үлкен үміт күткен әрбір қазақстандық асыға күтетіндей сұраныс қалыптасты.

Өйткені Жолдау біздің алдағы уақытта игеретін жаңа биіктерімізді белгілеп қана бермейді. Сонымен бірге, біздің ертеңгі күнгі тұрмысымыз бен әлеу­меттік-экономикалық хал-ахуалымыздың қан­дай болатындығына да бағыт береді» деген про­фессор Хазіретәлі Маханұлы Жолдаудағы айтылған тармақтар бойынша бірқатар ұсыныс­тар айтты. Ордабасы ауданындағы «Бөрте Милка» кәсіпорнының құрылтайшысы, облыстық мәсли­хат депутаты Нұралы Әбішев, білім сала­сын­да 50 жыл еңбек еткен ардагер ұстаз, Сайрам аудандық қоғамдық кеңес төрағасы Амангелді Қабылбеков, Қазақстан өзбектері «Дустлик» қауымдастығының төрағасы Икрам Хашим­жа­нов және Қ.Яссауи атындағы Халық­аралық қазақ-түрік университетінің 4-курс студенті, «Түркістан студенттері альянсы» қоғам­дық бірлестігінің мүшесі Алуа Тұрсынхан да сөйледі. Әрбір баяндамашының айтқан ұсыныстары мен пікірлеріне қатысты облыс басшысы тиісті жауабын берді және айтылған мәселелер ескерілетінін жеткізді. «Қай бір қоғам, қай бір заман болсын – табысы артқан, өмір сүру сапасы жоғары деңгейге тек ынтымағы ырысты, бірлігі бекем халықтар ғана жете білген. Сондықтан бұл игі іске баршамыз бір кісідей атсалысады деген сенімдемін!» деген Ж.Түймебаев Жолдауда атап көрсетілген мәселелерді негізге ала отырып, тиісті деңгейде түсіндіріліп, насихатталуын облыстық ішкі саясат басқармасына, облыстық білім, отбасы, балалар және жастар істері жөніндегі басқармаы мен аудан, қала әкімдік­те­ріне, сондай-ақ «Нұр Отан» партиясы облыстық филиалына жүктеді.

Abai.kz