ҚР Ішкі істер министрі Ерлан Тұрғымбаевтің,
Алматы облысы әкімі Амандық Баталовтың,
Алматы облысы Ішкі істер департаментінің басшысы Мұрат Жәлелұлының назарына!

Өткенде Алматы облысы, Ақсу ауданы, Алтын арық (Қаракемер) ауылында тұратын інімнің алты сиыры (екеуін сойып әкеткен, төртеуі жоқ) жоғалғаны туралы жазып едім. Ауданның полициялары (жиырмадай) жабылып іздесе де, әлі дерек жоқ. Неге дерек табылмайды? Неге ұры ұсталмайды? Былтыр тағы төрт сиырын ұрлап кеткен, міне алтау. Бір жылда он сиыр жоғалту деген ауылдың қарапайым тұрғыны үшін, әрине оңай дүние емес.

Інім көп балалы отбасы. Бала-шағасының аузы аққа тиіп, айран-сүтке енді жарығанда ұрылардың тапа-тал түсте барымтасы мынау. Барымтаның заманы қайтіп келді ме, не болды өзі? Бұлар бұрынғы барымташылардан да жауыз, қаскөй. Туғалы тұрған сиырды қан жолдың бойында ішін жарып, әкете береді.

Шап-шағын Алтын арық ауылында бір жылдың өзінде бәленбай бас мал жоғалған. Соның біреуі табылып, бір ұры ұсталмаған. Масқара емес пе?! Қазірше алған дерегім бойынша бір жылдың ішінде ұрылардан зиян шеккендердің (бұдан да көп болуы мүмкін) тізімі:
Зият Шығысбек (бір сиыр)
Қазылхан Жеңіс (бір сиыр)
Қуанған Базар (бір сиыр)
Шәкен Үрістем (үш қой)
Сыдықова Назгүл (бір сиыр)
Шаймұқаммед Естемес (бір жылқы)
Пазылжан Парқат (екі жылқы)
Омаров Есенғали (бір жылқы)
Дәбей Күресбек (он сиыр)