ازات پەرۋاشەۆ: «ەلىمە بولسىن» دەپ جۇرگەن قاراپايىم قازاقتىڭ بالاسىمىن»

الدىمەن وسى ينتەرنەت-كونفەرەنتسياعا قىزىعۋشىلىق تانىتىپ وتىرعان وقىرمان قاۋىمعا زور العىس بىلدىرگىم كەلەدى. ينتەرنەت پايدالانۋشىلاردىڭ اراسىندا ەلىمىزدىڭ بۇگىنى مەن بولاشاعىنا بەي-جاي قاراي المايتىن، قوعامدىق، ساياسي ومىرگە، سونىڭ ىشىندە «اقجول» پارتياسىنىڭ  تاعدىرىنا دا الاڭدايتىن جانداردىڭ كوپ ەكەنىن كورىپ وتىرمىن. سان الۋان پىكىر بار. ارينە، ءبىز ءوز اتىمىزعا ايتىلعان ورنىقتى لەبىزدەرگە دە، ورىندى سىنعا دا تۇسىنىستىكپەن قارايمىز. مەن ءوز تاراپىمنان جەكە باسىما، «اقجول» پارتياسىنا قاتىستى كەز كەلگەن سۇراققا شىنايى، اشىق جاۋاپ بەرۋگە دايىنمىن.

وسى ينتەرنەت-كونفەرەنتسيا «اقجول» پارتياسىنىڭ بولاشاق دامۋى، قازاق ۇلتىن توپتاستىرۋداعى پارتيانىڭ ءرولى جونىندەگى جالپىۇلتتىق ديسكۋسسيانىڭ باسى بولسىن دەپ قابىلدايىق.

- ازەكە، جاڭا قىزمەتىڭىز قۇتتى بولسىن! "اقجول" باسشىلىعىن قولعا الۋ تۋرالى شەشىمدى قابىلداۋ قيىنعا سوقتى  ما؟

- كەز-كەلگەن ازامات ءوز ۇرپاعىنىڭ، وتباسىنىڭ، ەلىنىڭ جاعدايىن ويلاپ، ويلاپ قانا قويماي وسى جولدا بار مۇمكىندىگىن جۇمساۋى كەرەك دەپ ويلايمىن. مەن دە وسىنداي نيەتپەن، ءوزىمنىڭ جيعان تاجىريبەم مەن ءبىلىمىمدى، ۇيىمداستىرۋشىلىق قابىلەتىمدى وسى ماقساتقا باعىتتاسام دەگەن وي بولدى.

ازات پەرۋاشەۆ: «ەلىمە بولسىن» دەپ جۇرگەن قاراپايىم قازاقتىڭ بالاسىمىن»

الدىمەن وسى ينتەرنەت-كونفەرەنتسياعا قىزىعۋشىلىق تانىتىپ وتىرعان وقىرمان قاۋىمعا زور العىس بىلدىرگىم كەلەدى. ينتەرنەت پايدالانۋشىلاردىڭ اراسىندا ەلىمىزدىڭ بۇگىنى مەن بولاشاعىنا بەي-جاي قاراي المايتىن، قوعامدىق، ساياسي ومىرگە، سونىڭ ىشىندە «اقجول» پارتياسىنىڭ  تاعدىرىنا دا الاڭدايتىن جانداردىڭ كوپ ەكەنىن كورىپ وتىرمىن. سان الۋان پىكىر بار. ارينە، ءبىز ءوز اتىمىزعا ايتىلعان ورنىقتى لەبىزدەرگە دە، ورىندى سىنعا دا تۇسىنىستىكپەن قارايمىز. مەن ءوز تاراپىمنان جەكە باسىما، «اقجول» پارتياسىنا قاتىستى كەز كەلگەن سۇراققا شىنايى، اشىق جاۋاپ بەرۋگە دايىنمىن.

وسى ينتەرنەت-كونفەرەنتسيا «اقجول» پارتياسىنىڭ بولاشاق دامۋى، قازاق ۇلتىن توپتاستىرۋداعى پارتيانىڭ ءرولى جونىندەگى جالپىۇلتتىق ديسكۋسسيانىڭ باسى بولسىن دەپ قابىلدايىق.

- ازەكە، جاڭا قىزمەتىڭىز قۇتتى بولسىن! "اقجول" باسشىلىعىن قولعا الۋ تۋرالى شەشىمدى قابىلداۋ قيىنعا سوقتى  ما؟

- كەز-كەلگەن ازامات ءوز ۇرپاعىنىڭ، وتباسىنىڭ، ەلىنىڭ جاعدايىن ويلاپ، ويلاپ قانا قويماي وسى جولدا بار مۇمكىندىگىن جۇمساۋى كەرەك دەپ ويلايمىن. مەن دە وسىنداي نيەتپەن، ءوزىمنىڭ جيعان تاجىريبەم مەن ءبىلىمىمدى، ۇيىمداستىرۋشىلىق قابىلەتىمدى وسى ماقساتقا باعىتتاسام دەگەن وي بولدى.

مەن ساياساتقا بوتەن ادام ەمەسپىن. ال، «اقجول» پارتياسىنا كەلۋىم ابدەن جان-جاقتى قارالىپ تالقىلانىپ، ءپىسىپ، جەتىلىپ بارىپ قانا قابىلدانعان شەشىم. «نۇر وتاننان» شىعىپ، «اقجولعا» كەلۋىم - مەنىڭ ءوز شەشىمىم. ونىمەن قوسا، «اتامەكەن» ۇلتتىق پالاتاسىنداعى اينالىسقان جۇمىستارىمنىڭ كوپشىلىگى دە ساياساتپەن، ساياسي شەشىمدەرمەن تىكەلەي بايلانىستى ەدى.

ونىڭ ۇستىنە قازىرگى تاڭدا ءبىزدىڭ قوعامدا شەشىمىن تاپپاي، قوردالانىپ جاتقان پروبلەما كوپ. اسىرەسە، ءبىزدى ەلىمىزدەگى مەملەكەت قۇرۋشى ۇلت بولىپ تابىلاتىن قازاق حالقىنىڭ ماسەلەسى الاڭداتادى. بۇگىن بازارداعى اربا تاسۋشى، ەڭ تومەن جالاقى الاتىن جۇمىسشى كىم دەسەڭىز، ول قازاق بولىپ شىعادى. وسى تۇرعىدا ءبىزدىڭ ۇلتتى الەۋمەتتەندىرۋ ماسەلەسى بۇگىندە وتە وتكىر. ەكىنشى، جاسىراتىنى جوق، جاھاندانۋ پروتسەستەرى دە جاقسىلىقتارىمەن قوسا، قازاقتىڭ تابيعاتى مەن بولمىسىنا، كەرى اسەرىن تيگىزىپ جاتىر. ءبىز ءۇشىن ءححى عاسىردا ۇلتتىق بولمىسى مەن ءتول مادەنيەتى مەن رۋحانياتىن جوعالتپاعان ۇلت بولىپ قالۋ ماسەلەسى دە وتكىر تۇر.

وسى جايتتار دا مەنى ساياساتقا ءباسىبۇتىن كەلۋگە يتەرمەلەدى. ءبىز پارلامەنتكە كەلسەك، قوعامداعى وسىنداي وزەكتى، اۋقىمدى ماسەلەلەردى شەشۋگە تالپىنىپ، تالقىلاپ قانا قويماي، ناقتى شەشىمدەر قابىلداۋعا ناقتى ىقپال ەتەتىن بولامىز.

- 2013 جىلى تولىق قازاق تىلىندە سويلەپ كەتە الامىز با؟

- ءتىل ماسەلەسى - مەملەكەتتىڭ، ۇلتتىڭ قاۋىپسىزدىگىنىڭ، دامۋىنىڭ، بولاشاعىنىڭ ماسەلەسى. ارىعا بارماي-اق، تمد ەلدەرىنىڭ اۋماعىنداعى مىسالداردى الىپ قاراڭىز. ءتىپتى الەمدەگى ءتۇرلى شيەلەنىس، قاقتىعىستاردىڭ وزەگىندە دە وسى ۇلت، ءتىل، ءدىن ماسەلەلەرى جاتىر.

قازاقستان بۇل ماسەلەدە ساۋاتتى، ورنىقتى جولدى ۇستاندى. تاۋەلسىزدىك جىلدارى مەملەكەتتىڭ ىرگەسىن مىقتادىق. قوعامداعى الەۋمەتتىك، ەكونوميكالىق جاعدايىمىز جاقساردى. وسى ۋاقىتقا دەيىن ءبىز ءتىل ماسەلەسىن ساياساتتاندىرعان جوقپىز. تاۋەلسىزدىك العان جيىرما جىلدىڭ ىشىندە ءبىز ەشكىمگە قىسىم كورسەتىپ، قازاق ءتىلىن بىلۋگە مىندەتتەگەن جوقپىز. بۇل پروتسەستى بارىنشا جۇمساق، ءارى ەشكىمدى ماجبۇرلەمەي ەرىكتى تۇردە جۇرگىزىپ كەلدىك. بۇگىنگى تاڭدا قازاق ءتىلىنىڭ مەملەكەتتىك ءتىل رەتىندە ءوزىنىڭ لايىقتى ورنىن الاتىن ۋاقىتى جەتتى. بۇل - قوعامنىڭ تالابى، قازاقستاننىڭ ءاربىر ازاماتىنىڭ پارىزى!

كەيىنگى كەزدە «2013 جىلى قالاي قازاق تىلىندە سويلەپ، ءىس جۇرگىزىپ كەتەمىز، بۇل مۇمكىن ەمەس» دەپ بايبالام سالۋشىلار پايدا بولدى. ولار بۇگىنگى كۇنگە دەيىن قازاق تىلىندە سويلەۋ قاجەتتىلىگىن مۇلدە سەزىنبەگەن، مۇلدە ەستىمەگەن، اسپاننان تۇسكەن جاندار سەكىلدى. قازاق تىلىنە قاتىستى وسىنداي پىكىرلەردى تۇبەگەيلى وزگەرتۋ كەرەك.  جەكە ءوز باسىم دا، «اق جول» پارتياسى دا وسى باعىتتا جان اياماي جۇمىس ىستەيتىن بولادى.

- قانشا جىلدان بەرى "اتامەكەندى" باسقاردىڭىز. قازاقستاندا كاسىپكەر بولىپ، ءىس جۇرگىزۋ وڭاي ما؟

- سوڭعى جىلدارى قابىلدانعان «يندۋستريالدى-يننوۆاتسيالىق باعدارلاما»، «بيزنەستىڭ جول كارتاسى-2020»، شاعىن جانە ورتا بيزنەستى دامىتۋ مەن قولداۋ باعدارلامالارىنىڭ بارلىعىنا دا ءبىز بەلسەنە ات سالىستىق. كەيبىر ماڭىزدى باعدارلامالارعا باستاماشى بولدىق.

«اتامەكەن» ۇلتتىق ەكونوميكالىق پالاتاسىندا قىزمەت ەتكەن ۋاقىت ىشىندە كاسىپكەرلەردىڭ الاڭسىز جۇمىس جاساۋى ءۇشىن كوپتەگەن كەدەرگىلەردى الىپ تاستادىق دەپ سەنىممەن ايتا الامىن. مەملەكەتتىك ورگاندار تاراپىنان بولاتىن ءتۇرلى تەكسەرۋلەردىڭ قاتارى قىسقاردى. ليتسەنزيا الۋ ءتارتىبى ەداۋىر جەڭىلدەتىلدى. سالىق كودەكسىن ءبىز ۇكىمەتتىك دەڭگەيدە ءبىر جىلدان استام ۋاقىت تالقىلاپ، كاسىپكەر مۇددەسىن قورعاۋعا باعىتتالعان ماڭىزدى ۇسىنىستارىمىزدىڭ قابىلدانۋى باعىتىندا بەلسەندى تۇردە كۇرەستىك. ۇسىنىسىمىزدىڭ بارلىعى قابىلدانىپ كەتپەگەنمەن، ماڭىزدى دەگەندەرىن جۇزەگە اسىرۋعا قول جەتكىزدىك. بىراق، بۇل بارلىق كەدەرگىلەر جويىلدى دەگەن ءسوز ەمەس. وكىنىشكە قاراي، ىسكەر ادامداردىڭ قىزمەتىنە تۇساۋ بولاتىنداي ءنورماتيۆتى، زاڭنامالىق كەدەرگىلەر جەتكىلىكتى.

اينالىپ كەلگەندە، شاعىن جانە ورتا بيزنەس، ياعني ورتا تاپ مەملەكەتتىڭ، قوعامنىڭ ساياسي-الەۋمەتتىك تۇراقتىلىعىنىڭ نەگىزى.  بىز وسى قاۋىمنىڭ اياعىنان تىك تۇرۋىنا مۇددەلى بولۋىمىز كەرەك. ءبىر-اق مىسال ايتايىن. دامىعان ەلدەردە شاعىن جانە ورتا بيزنەس ىشكى جالپى ءونىمنىڭ 70-80 پايىزىن بەرەدى. بىزدە بۇل مولشەر 30 پايىزعا دا جەتپەيدى. ونىڭ وزىندە، دامىعان ەلدەردەگى ورتا بيزنەس وكىلىنىڭ قارجى اينالىمى 1 ميللياردقا دەيىن جەتۋى مۇمكىن. ءبىز 5 ميلليون تەڭگەلىك اينالىمى بار كاسىپكەرلەردى وسى توپقا قوسىپ ءجۇرمىز.

ماسەلەن، جاپونياداعى شاعىن جانە ورتا بيزنەستىڭ ىشكى جالپى ونىمدەگى ۇلەسى 90 پايىزعا جەتەدى. بۇگىنگى تاڭدا جاپونيا اسا ۇلكەن كۇيزەلىستەردى باستان كەشىرىپ وتىر. الەمدىك قارجى داعدارىسى، تسۋنامي، اتوم اپاتى ەلدى ەسەڭگىرەتىپ كەتكەنىمەن، ولاردىڭ ەكونوميكاسىنىڭ تۇراقتىلىعى ادامدى تاڭ قالدىرادى. بۇل - شاعىن جانە ورتا بيزنەستىڭ ىقپالىنىڭ قانشالىقتى ەكەندىگىنىڭ ءبىر عانا كورىنىسى.

كاسىپكەرلەر - ەلدەگى دەربەس، بەلسەندى، قوعامداعى ساياسي-ەكونوميكالىق تۇراقتىلىققا مۇددەلى ءارى سونى قامتاماسىز ەتە الاتىن الەۋمەتتىك توپ. «جالعىزدىڭ شاڭى شىقپاس» دەيدى. كاسىپكەرلەر دە جەكە باسى، دەربەس، ەركىن بولعانىمەن بەلگىلى ءبىر ۇيىمعا، بىرلەستىككە باسى بىرىكپەي، ماسەلە شەشىلمەيدى. «اتامەكەننىڭ» كۇندەلىكتى جۇمىسى سول كاسىپكەردىڭ الاڭسىز جۇمىس ىستەۋىنە، تابىس تاۋىپ، ەل ەكونوميكاسىنا ۇلەس قوسۋىنا جاعداي جاساۋ بولاتىن. ءبىزدىڭ پارتيانىڭ دا باستى مىندەتتەرىنىڭ ءبىرى وسى بولماق.

- سوڭعى كەزدەرى قاتتى جۇدەپ كەتتىڭىز؟ بۇل جۇمىستىڭ اۋىرلىعىنان با؟

- مەنىڭ دەنساۋلىعىم ءۇشىن الاڭداعانىڭىزعا راحمەت، ارينە. جانىڭ قالاپ ىستەيتىن جۇمىس بولسا، ونىڭ اۋىر-جەڭىلدىگى بىلىنبەيدى عوي.

راسىندا، قىرىق جاسقا دەيىن دەنساۋلىق ساعان قىزمەت جاساسا، قىرىق جاستان كەيىن سەن دەنساۋلىققا قىزمەت جاسايدى ەكەنسىڭ. مەن ەس بىلگەننەن بەرى سپورتتى جانىما سەرىك ەتكەن اداممىن. قازىر دە جۇيەلى تۇردە سپورتپەن شۇعىلدانام. كۇنىنە 5-7 شاقىرىمعا جۇگىرەم، 3 شاقىرىمعا سۋدا جۇزەمىن. ءسىز ايتقانداي مەنىڭ «جۇدەۋ ءتۇرىم» - مەنىڭ سپورتتىق قالپىم.

- ءسىزدى قازاق بوكسىنىڭ جاناشىرى دەيدى. باقىت سارسەكباەۆتىڭ بەيجىڭ وليمپياداسىندا جەڭىسكە جەتىپ، التىن مەدال يەگەرى اتانۋدا ءسىزدىڭ دە ەڭبەگىڭىز بار ەكەندىگىن وقىعام. وزگە دە بولاشاعىنان ءۇمىت كۇتتىرەر سپورتشىلارعا كومەك بەرۋگە دايىنسىز با؟

- جاستىق شاعىمدى بوكس الاڭىندا وتكەردىم دەسە دە بولادى. بوكستان كەڭەس وداعىنىڭ سپورت شەبەرىمىن. مەن باقىت سارسەكباەۆتى الماتىعا ءوزىم شاقىرتتىم. العاشقى ساتتەن-اق ونىڭ بويىنداعى ەنەرگيا مەن شەبەرلىكتى بايقادىم. بىراق ول كوپتەگەن ادىلەتسىزدىكتەرگە كەزىگىپ جۇرگەنىن ءبىلدىم. ءسويتىپ سويلەسىپ، ونى قازاقستانعا كوشىپ كەلۋگە ۇگىتتەدىم جانە بۇل شەشىمنىڭ دۇرىس بولعاندىعىن ۋاقىت دالەلدەپ بەردى. قولدان كەلگەنشە باقىتقا كومەك كورسەتىپ، جاردەم بەرۋگە تىرىستىم. بىرقاتار جارىستاردا كوزگە ۇرىپ تۇرعان ادىلەتسىزدىكتەردىڭ كۋاسى دە بولدىم. مۇنداي كەزدەرى باقىت ىزادان بارىنە قولىن ءبىر سىلتەپ، كەتىپ قالعىسى كەلەتىن. بىراق ونىڭ سپورتقا دەگەن قۇشتارلىعى ونى جەڭىسكە جەتەلەدى.

جالپى بوكس قازاقتاردىڭ ۇلتتىق سپورتىنا اينالدى دەسە دە بولادى. وسى ۋاقىتقا دەيىنگى ەلىمىزدىڭ الەمدىك سپورت دودالارىنداعى جەڭىستەرىنىڭ كوپشىلىگى وسى بوكسقا تيەسىلى. سوندىقتان، بوكستى مەملەكەت تاراپىنان، جەكەلەگەن ازاماتتاردىڭ تاراپىنان ۇنەمى قولداپ، قوشتاپ وتىرۋ كەرەك. مىسالى، مەنىڭ قامقورلىعىمداعى نۇرماتوۆ ءالىبي دەگەن باۋىرىمىز بوكستان دۇنيەجۇزىلىك اسكەري ويىنداردا جۇلدەگەر بولدى. قارىنداسىمىز سايدا حاسەنوۆا ازيا چەمپيونى اتاندى. بۇلاردان وزگە دە تالانتتى ءىنى-قارىنداستارىمىزعا مەيلىنشە كومەكتەسىپ تۇرامىن. ءوز باسىم   بولاشاعىنان ءۇمىت كۇتتىرەتىن جاستار بولسا، قولىمنان كەلگەنشە بارىنە كومەكتەسۋگە دايىنمىن.

- ازات دەگەن اتىڭىز ءبىراز نارسەنى ايتىپ تۇر. ەگەر ەرتەڭ "اقجول" پارلامەنتكە كەلسە، بولاشاق دەپۋتاتتار تەك ساقىرلاعان بيزنەسمەندەر عانا بولا ما؟ ولاي دەيتىنىم ءسىز توراعا بولا سالىسىمەن ماجىلىسكە تەك اقشاسى بارلار عانا بارادى دەپسىز. ال سوندا "اقجولدىڭ" وتىمەن كىرىپ، كۇلىمەن شىعىپ، ناسيحاتتاپ جۇرگەن بەلسەندىلەرى، زيالىلارى اقشاسى جوقتىقتان دالادا قالا ما؟

يبراگيم

- «اق جول» پارتياسىنىڭ مۇشەلەرى تەك ساقىرلاعان بيزنەسمەندەر ەمەس قوي. پارتيانىڭ نەگىزىن قاراپايىم ەڭبەك ادامدارى، ءوز ەلىنىڭ پاتريوتتارى قۇرايدى. ەگەر ماجىلىسكە بارىپ جاتساق، كىمدەردىڭ دەپۋتات بولارىن سول پارتيا مۇشەلەرى شەشەدى. ءوز باسىم، «اق جول» پارتياسىنان دەپۋتاتتىققا ۇسىنىلاتىن ازاماتتاردىڭ ناعىز بىلىكتى، ءبىلىمدى، وتانشىل قايراتكەرلەر بولاتىنىنا نىق سەنىمدىمىن.

«ماجىلىسكە تەك اقشاسى بارلار عانا بارادى» دەگەن ءسوزدى تىم قارابايىر تۇسىنۋگە بولمايدى. ساياسي ۇيىم قۇرۋ، پارتيا باسقارۋ ويىنشىق نارسە ەمەس. كەز كەلگەن ساياسي ناۋقان، سايلاۋ دا سونداي. بۇل، بەينەلەپ ايتقاندا، قىمبات ويىن. ماسەلەن، پارتيانى قارجىلاندىرۋ، ونىڭ تولىققاندى جۇمىس ىستەۋىن قامتاماسىز ەتۋ - ءوزىمىزدىڭ موينىمىزدا. ءسىز ايتقانداي، ساقىرلاعان بيزنەسمەندەر «اقجولعا» ەرىككەننەن مۇشە بولىپ جاتقان جوق. ولاردىڭ كوبىسى، ءتىپتى دەپۋتاتتىق كرەسلونى دا ارماندامايدى. ولارعا تۇراقتى، قاۋىپسىز ەكونوميكالىق اۋا-رايى كەرەك. ال، ءوز كەزەگىندە، ولاردىڭ قولداۋ-كومەگىن ءبىز ەل مۇددەسىنە، ەلدەگى جاڭارۋ، جاڭعىرۋ جولىنا باعىتتاۋىمىز كەرەك.

- ازات اعا، مەن ەكونوميكا سالاسىندا وقۋدى جاڭا بىتىرگەن جاس مامانمىن. استانادا جۇمىس تابۋ قيىنعا سوعىپ جاتىر. ازداپ اتا-انام بەرگەن قاراجاتىم بار ەدى. سونى ءبىر ىسكە جۇمساعىم كەلەدى. دۇكەن نەمەسە كىشىگىرىم ءدامحانا جالداپ ءوز ءىسىمدى باستاسام دەگەن وي بار. بيزنەستە قاتەلىك جاساپ، بارىمنان ايرىلىپ قالماۋ ءۇشىن نە ىستەۋىم قاجەت؟ ەرتەڭگى كۇنى تەكسەرىستەن تەكسەرىس بولىپ، كاسىبىم تۇرالاپ قالماي ما؟

- ويىڭ وتە دۇرىس. ارينە، وقۋ بىتىرگەن جاستاردىڭ جۇمىس تاۋىپ، جاڭا ومىرگە ارالاسىپ كەتۋى وڭاي ەمەس. الايدا، تالابى بار، ءبىلىمدى جاس ءۇشىن ومىردەن ءوز ورنىن تابۋ قيىن ەمەس. وعان ءبىزدىڭ ەلدە بارلىق مۇمكىندىكتەر بار دەپ ويلايمىن.

قازىردە بيزنەستى اشۋ وڭاي، ونى دامىتۋ قيىن. ءىستى دۇرىس ۇيىمداستىرىپ، ءوز قۇقىڭىزدى جاقسى بىلسەڭىز، بار قيىندىقتى جەڭە الاسىز دەپ سەنەمىن. ال تەكسەرىس ماسەلەسىنە كەلەر بولساق، مەملەكەتتىك ورگاندار بۇرىنعىداي وزدەرى قالاعان ۋاقىتتا كەلىپ تەكسەرىس جاساي المايدى. ­وسى ماسەلەدە اقىل-كەڭەس العىڭ كەلسە، ءبىزدىڭ پارتيانىڭ باس كەڭسەسىنە نەمەسە كەز كەلگەن بولىمشەسىنە كەلۋىڭە بولادى.

- جاستىق شاعىڭىزدا بوكسپەن اينالىسىپسىز. وسى قابىلەتىڭىزدىڭ ومىردە كومەكتەسكەن ءساتى بولدى ما؟ ءوزىڭىزدى نەمەسە جاقىندارىڭىزدى قورعاۋ ءۇشىن بىلەك كۇشىن پايدالانعان كەزىڭىز بار ما؟

- بوكسقا قاتىستى پىكىرىمدى جوعارىدا ايتتىم. ءبىر عانا نارسە. سپورتتىڭ ارقاسىندا، بوكس رينگىندە بويىما سىڭىرگەن ەرىك، جىگەر مەن ماقسات، سوعان جەتۋدەگى جانكەشتىلىك ومىردە ءوز پايداسىن تيگىزدى دەپ ايتا الام. بوكستاعى قابىلەتىمدى كۇندەلىكتى ومىردە سيرەك، نەگىزىندە جاس كەزىمىزدە پايدالاندىق. بىلەكتىڭ كۇشىمەن ەمەس، اقىلدىڭ، نامىستىڭ كۇشىمەن دە قارسىلاستاردى جەڭۋگە بولادى عوي.

- ازات تۇرلىبەكۇلى، نەگە سىزدە تۆيتتەردە بلوگىڭىز جوق؟

- وسىدان 3 جىل بۇرىن «ودنوكلاسسنيكي» الەۋمەتتىك جەلىسىندە تىركەلگەن ەدىم. نەگىزگى ماقساتىم كوپتەن بەرى قارىم-قاتىناسىمىز ءۇزىلىپ كەتكەن سىنىپتاستارىم مەن كۋرستاستارىمدى ىزدەپ تاۋىپ، بايلانىستى قايتا جانداندىرۋ بولاتىن. الايدا، وعان مۇمكىندىك بولمادى. ۋاقىتتىڭ تاپشىلىعى قولبايلاۋ بولدى. سۇراعىڭىزعا راحمەت، بۇيىرتسا، سىزبەن تۆيتتەردە دە كەزدەسىپ قالارمىز.

- سونىمەن، پارلامەنت سايلاۋى  قاشان وتەتىن بولدى؟

- مەن بۇل تۋرالى ءوز پوزيتسيامدى بىلدىرگەم. پارلامەنت سايلاۋى ۋاقىتىندا ءوتۋى ءتيىس. سايلاۋ مەرزىمىنەن بۇرىن وتە قالعان جاعدايدا، ەلدەگى بارلىق ساياسي كۇشتەرگە، پارتيالارعا دا وڭاي بولماسى انىق. ەكىنشى جاعىنان، «اق جول» پارتياسى سايلاۋ قاشان وتسە دە، ساياسي ناۋقانعا بەلسەنە قاتىسۋعا جانە پارلامەنتتەن لايىقتى ورىن الۋعا دايىن.

- ازات تۇرلىبەكۇلى، قانشا جىلدان بەرى قوعامدىق قىزمەتتەردە بەلسەندى ەڭبەك ەتىپ، ءتۇرلى فورۋمدار مەن كونفەرەنتسيالاردا، ودان قالدى شەت ەلدە وتاندىق بيزنەستى كوركەيتۋ باعىتىندا تىنىمسىز ەڭبەك ەتتىڭىز، ەندى ماجىلىسكە دەپۋتات بولىپ كەلە قالساڭىز، ءىشىڭىز پىسپاي ما؟

- ءبارى دە ادامنىڭ وزىنە بايلانىستى. بىرەۋلەر پارلامەنتكە اتاق پەن شەن ءۇشىن، جاعداي ءۇشىن بارادى. بىرەۋلەر «كوپپەن كورگەن ۇلى توي» دەپ جۇگىرەدى. پارلامەنت - زاڭ شىعارۋشى ورگان، بيلىكتىڭ ءبىر تارماعى عانا ەمەس، حالىقتىڭ جانايقايىن جەتكىزەتىن جانە حالىققا قىزمەت ەتىپ، ەسەپ بەرەتىن ورىن بولۋى ءتيىس. بۇگىنگى تاڭدا دەپۋتاتتار وزدەرى زاڭ جازۋمەن اينالىسپايدى. تەك ۇكىمەتتەن كەلىپ تۇسكەن زاڭ جوبالارىن وزگەرتۋمەن اينالىسادى. وسىلايشا زاڭ شىعارۋشى ورگاننىڭ ءوز شەشىمدەرىن قابىلداتۋدا مۇمكنىدىگى شەكتەۋلى.  سونىمەن قاتار، دەپۋتاتتار زاڭ جوباسىنىڭ مازمۇنىن وزگەرتەتىندەي ۇسىنىستى ەنگىزە الماي جاتادى. "ۇكىمەتتىڭ كونتسەپتسياسىنا قارسى كەلەدى", دەپ ول ۇسىنىستار قابىلدانباي قالادى. «اتامەكەندە» قىزمەت ەتىپ جۇرگەندە دە وسىنداي جاعداي بىرنەشە مارتە بولدى.

سوندىقتان جاڭا پارلامەنتتە ونىڭ رەگلامەنتى مەن وكىلەتتىكتەرى عانا ەمەس، جۇمىس ءستيلى مەن بەت-بەدەلى دە بولەك بولۋى ءتيىس دەپ سانايمىن. «اقجول» پارتياسىنىڭ پارلامەنتكە بارا قالعان جاعدايدا اتقاراتىن شارۋالارى مەن جۇمىستارى قازىردەن-اق ساراپتالىپ، ناقتىلانىپ جاتىر. ياعني، ءسىز ايتقانداي ءىش پىساتىنداي ۋاقىت بولمايتىن سياقتى.

- اق جول قۇرامىنا ەنگەن كاسىپكەرلەر سىزگە سەنگەننەن كەلىپ وتىر ما؟ الدە سونداي تاپسىرما بولدى ما؟

- كاسىپكەرلەر تاپسىرمامەن جۇرەتىن ادامدار ەمەس. ولار ءوز ءومىرىن، ءوز كاسىبىن ءوزى جاساعان، ەركىن ويلى ازاماتتار. ولاردى ءبىر يدەيانىڭ توڭىرەگىنە توپتاستىرىپ، ءبىر ىسكە تارتۋ ءۇشىن ناقتى ءىس-قيمىل مەن ناتيجەلەرىن كورسەتىپ بەرۋىڭ شارت.

ءبىزدىڭ پارتياعا مۇشەلىككە نيەت ءبىلدىرىپ جاتقان كاسىپكەرلەر «اقجولدىڭ» ساياسي، ەكونوميكالىق تۇجىرىمداماسىن تولىق قولدايتىن، بەلسەندى ازاماتتار. قازىردىڭ وزىندە، مەنىڭ بىلۋىمشە، 1000-عا تارتا كاسىپكەر پارتياعا كىرۋگە ءوتىنىش بەرگەن. ەڭ باستىسى، «اق جول» پارتياسىنا مۇشەلىككە ءوتىنىش بىلدىرگەندەردىڭ باسىم كوپشىلىگى - شاعىن جانە ورتا بيزنەستىڭ وكىلدەرى.

ماقتانعانىم ەمەس، بىراق «اتامەكەندە» قىزمەت ىستەگەن ءبىراز جىلدىڭ ىشىندە مەن دە كاسىپكەرلەردىڭ قالىڭ ورتاسىندا ءجۇردىم. تانىس، ءبىلىس بولدىق. ولار ءبىزدىڭ  اربىر ىسكەر ادامنىڭ مۇددەسىن قورعاۋعا دايىن ەكەنىمىزدى جانە ول قولىمىزدان كەلەتىنىن بىلەدى.

- كۇندەلىكتى تۇتىناتىن تاۋاردى (ازىق-تۇلىك، تۇرمىستىق تەحنيكا، كيىم-كەشەك) ساتىپ الۋدا قاي ەلدىڭ ونىمىنە باسىمدىق بەرەسىز. كەزىندە تەك قازاقستاندا جاسالعان ءونىمدى ساپاسى مەن باعاسىنا قاراماي ساتىپ الايىق، وسىلايشا پاتريوتتىق تانىتايىق دەپ ۇرانداتىپ ەدىڭىز...

- مەن «ءونىمدى ساپاسىنا، باعاسىنا قاراماي ساتىپ الايىق» دەپ ەشقاشان ايتقان ەمەسپىن. بۇلاي دەپ ەشكىم دە ايتپايتىنى جانە تۇسىنىكتى. نەگىزى بۇگىندە ءوز ەلىمىزدە شىعاتىن كوپتەگەن ونىمدەر باسەكەگە قابىلەتتى. ءسۇت، شوكولاد، ماي، شۇجىق سەكىلدى ونىمدەر ءدامى جاعىنان دا، ساپاسى جاعىنان دا شەتەلدىكىنەن ەش كەم تۇسپەيدى. باسقاسىن ايتاپاي-اق قويايىق، وسى استانانىڭ وزىندە «كوكشەتاۋدىڭ ەتى-اي، قاراوتكەلدىڭ، قورعالجىننىڭ قىمىزى-اي» دەگەندى كۇندە ەستيمىز. ءبىز جيھازدى دا وتاندىق وندىرىسشىلەردەن الامىز. كەڭسەمىزدى جابدىقتاۋدا الىستان اربالاماي، ءوز شەبەرلەرىمىزدىڭ قولىنان شىققان مۇلىكتى ساتىپ الدىق. مىسالى، «اتامەكەندە» جۇرگەندە، پالاتاداعى باسشى قىزمەتكەرلەردىڭ بارلىعى بەلگىلى  ماركالى  قازاقستاندا جاسالعان كولىكتەردى پايدالاناتىن.

ايقاي-شۋ نەدەن شىقتى؟ مەن ۋاقىتىندا ەلباسىنىڭ الدىندا ۇسىنىس ەنگىزىپ، «وتاندىق كولىكتى پايدالانايىق» دەگەندى دە ايتقانمىن. سول-اق ەكەن اقپارات قۇرالدارىندا مەنىڭ سىرتىمنان نەشە ءتۇرلى قۇيتىرقى ارەكەتتەر ۇيىمداستىرىلدى. ونى ۇيىمداستىرعان تاعى سول شەنەۋنىكتەردىڭ وزدەرى. ولار جىلى ورنىنان، جايلى كولىگىنەن ايىرىلعىسى كەلمەيدى. قاراڭىز، وتكەندە رۋدنىيدىڭ اكىمى 16 500 000 تەڭگەگە ءۇش كولىك، 24 796 000 تەڭگەگە تاعى ءبىر قىزمەت كولىكتەرىن الماقشى بولعان. سوندا شاعىن عانا قالانىڭ اكىمى قازاقستاندا 20-40 مىڭ دوللار تۇراتىن لايىقتى اۆتوكولىكتى مەنسىنبەي، 170 مىڭ دوللارعا «لەكسۋس» العىسى كەلگەن عوي. ماسقارا ەمەس پە؟ بۇل جوعارىدا ايتقان كاسىپكەرلەردىڭ، قاراپايىم جۇمىسشىلاردىڭ اقشاسى، سالىعى عوي.

مۇنى ايتىپ وتىرعانىم، كەزىندە وڭتۇستىك كورەيادا وتاندىق ءونىمدى قولداۋعا ارنالعان مەملەكەتتىك باعدارلاما قابىلدانعان. ولاردىڭ «كارىستىكىن عانا ساتىپ الايىق» دەگەن ۇرانى كەيىن كورەيا ەكونوميكاسىنىڭ نەگىزى بولدى.

ءيا، داعدارىس كەزىندە ءبىز دە بۇكىل قازاقستاندىقتارعا «وتاندىق ءونىمدى ساتىپ الايىق، وتاندىق وندىرۋشىلەردى قولدايىق» دەگەن ۇران تاستادىق. ول شارا بەلگىلى ءبىر دارەجەدە ءوز جەمىسىن بەردى دە. ەگەر وتاندىق وندىرۋشىلەرىمىزدى ءوزىمىز قولداماساق، ۇلتتىق ەكونوميكا ەشقاشان كوركەيمەيدى. قازاقستاندىق ءونىمدى ساتىپ الۋ ارقىلى ءسىز مىڭداعان كاسىپكەرگە قول ۇشىن بەرەسىز. ءسىزدىڭ وتاندىق تاۋارعا تولەگەن اقشاڭىز جەرلەستەرىڭىزدىڭ جالاقىسى، بيۋدجەتكە تۇسەتىن سالىق، ەل ەكونوميكاسىن دامىتۋعا قوسقان ۇلەسىڭىز بولادى. مۇنى بارلىعى تۇسىنگەنى ءجون.

- مادەنيەت مينيسترلىگىنىڭ ءتىل جونىندەگى زاڭجوباسىن ورىس شوۆينيستەرى توپەپ جاتىر، ءسىزدىڭ پارتيا نەگە ءۇنىن شىعارمايدى؟
الدە ول جوباعا قارسىسىڭدار ما؟ سايرا، جۋرناليست

- سايرا، مەملەكەتتىك تىلگە قاتىستى پىكىرىمدى جوعارىدا ايتتىم. ءبىزدىڭ بارىمىز دا، ارىمىز دا - انا ءتىلىمىز. اقپارات قۇرالدارىن شولىپ شىقساڭىز، مادەنيەت مينيسترلىگى دايىنداعان زاڭ جوباسى تۋرالى، اسىرەسە، «اق جول» پارتياسىنىڭ بەلسەندىلەرى ءوز پىكىرلەرىن اشىق ءبىلدىرىپ جاتىر. مەنىڭ بىلۋىمشە، مينيسترلىك دايىنداعان زاڭ جوباسى ازىرگە تەك تالقىلاۋ، پىسىقتالۋ ۇستىندە. قالاي بولسا دا، زاڭ ءبىزدىڭ ۇلتىمىزدىڭ، مەملەكەتىمىزدىڭ مۇددەسى تۇرعىسىندا دايىندالىپ، قابىلداناتۋى ءتيىس. ءتىپتى، ءبىز پارلامەنتكە بارىپ جاتساق، وسىنداي ۇلتتىڭ مۇددەسىنە جۇمىس ىستەيتىن زاڭداردى قابىلداۋعا ءوزىم باستاماشى بولامىن.

- اسسالاۋماعالەيكۋم، ازات مىرزا. ءسىز - قانجىعالى بوگەنباي باتىردىڭ، ونىڭ ىشىندە اتاقتى باپان ءبيدىڭ ۇرپاعى دەپ ەستىدىم. وسى مالىمەت راس پا؟

قايىربەك، استانا.

- قازاقتا «جەتى اتاسىن بىلمەگەن - جەتەسىز» دەگەن ءسوز بار ەمەس پە؟!. ول راس، قايىربەك، مەن - قانجىعالى بوگەنبايدىڭ توعىزىنشى، باپان ءبيدىڭ التىنشى ۇرپاعىمىن. سوندىقتان، مەن تۋرالى «قازاق پا» دەيتىن ءجونسىز سۇراققا مەنىڭ جەتى اتام ءوزىم دۇنيەگە كەلگەنگە دەيىن جاۋاپ بەرىپ قويعان. الايدا، قازاقتا «جۇزگە بولىنگەننىڭ ءجۇزى كۇيسىن» دەگەن دە ءسوز بار. ءوز باسىم جۇزشىلدىككە، رۋشىلدىققا، جەرشىلدىككە تۇپكىلىكتى قارسىمىن.

- ءسىزدىڭ ءپىرىڭىز بار ما؟

مەنىڭ ومىردەگى ءپىرىم دە، تىرەگىم دە - اكەم تۇرلىبەك. اكەم - تۇرلىبەك پەن شەشەم - ءماريام مەنىڭ ازامات، ادام رەتىندە قالىپاسۋىما ومىرلىك ۇلگى بولدى. وكىنىشكە قاراي، اكەم 1994 جىلى دۇنيە سالدى. اكەم بىلىكتى ينجەنەر، اشىق، ادال ازامات ەدى. شەشەم - ءماريام قاسكەلەڭدە، قورداي اۋدانىنىڭ ىرعايتى اۋىلىنداعى سوۆحوز-تەحنيكۋمدا اگرونوم بولىپ ىستەگەن. سول جەردە بىرنەشە الما باقتارىن جاساعان. بۇل باقتاردا وسىرىلگەن المانىڭ سورتتارىن باسقا جەردەن ەش كەزدەستىرمەيسىز. ءالى كۇنگە دەيىن سول جەردە  «ءماريام باعى» اتالاتىن باق بار. سول اۋىل - مەنىڭ تۋعان جەرىم. بۇدان سوڭ انام 20 جىلدان استام قازاق مەكتەبىندە ۇستاز، مەكتەپ ديرەكتورى بولىپ ىستەدى.

اتام - پەرۋاش ءامرين ءوز زامانىنىڭ كوزى اشىق، جوعارى ءبىلىمدى، زيالى ادامى بولعان ەكەن. ول كىسى وتكەن عاسىردىڭ 30-جىلدارى ەرەيمەنتاۋ اۋدانىنداعى مالتابار اۋىلىندا مەكتەپ سالعان. وكىنىشكە قاراي،  22 جاسىندا قۋعىن-سۇرگىنگە ۇشىراپ، اتىلىپ كەتتى. ءالى كۇنگە دەيىن اتامدى جۇرت ريزاشىلىقپەن ەسكە الادى.

- ءار باسشى جاڭا قىزمەتكە اۋىسقاندا وزىندىك ءتارتىبى مەن كومانداسىن الا كەلەدى دەيدى. ءسىز شە؟ "اقجولعا" "اتامەكەننەن" قانشا قىزمەتكەر الىپ كەلدىڭىز؟

- ارينە، مەن دە كوپ جىلداردان بەرى وزىممەن بىرگە كەلە جاتقان سەنىمدى سەرىكتەرىم بار. بىراق، مەن قايدا بارسام دا دوس-جارانىن، اعايىن-تۋىسىن تاسىپ جۇرەتىن ادام ەمەسپىن.

جاقىندا «اتامەكەندىك» ارىپتەستەرىمە دە جينالىس جاساپ، ءوز شەشىمىمدى ايتقانمىن. اۋىسسا، «اق جولعا» مەنىمەن بىرگە ەكى-ءۇش-اق ادام اۋىسادى. قالعان ورتالىق اپپاراتتاعى 60-تان استام قىزمەتكەرلەر ءوز ورنىندا قالادى. ولاردىڭ ءبىلىمى مەن تاجىريبەلەرى مەنەن گورى وتاندىق كاسىپكەرلەردىڭ قىزمەت ەتۋىنە قولايلى جاعداي تۋعىزۋعا قاجەتتىرەك دەپ بىلەمىن.

پارتياعا كوماندا جيناپ جاتقان جوقپىن. بۇرىننان كەلە جاتقان، پارتياعا ەڭبەگى سىڭگەن، پارتيانىڭ، مەنىڭ كوزقاراستارىمدى بولىسەتىن كەز كەلگەن اداممەن جۇمىس ىستەۋگە دايىنمىن.

- ازات اعا، اۋىز بەكىتتىڭىز بە؟ قاسيەتتى ورازا ايىندا ادامدار ءبىر-بىرىنە كەشىرىمدى، كەڭپەيىل بولۋ كەرەك دەيدى. بىرەۋگە قاتتى رەنجىگەن كەزىڭىز بولدى ما؟

- يا، اۋزىم بەرىك. ورازا تۇتۋ ءوزىمنىڭ مۇسىلمان رەتىندەگى، ادام رەتىندەگى مىندەتىم دەپ بىلەمىن. مەن بىرەۋلەرگە ايتۋ ءۇشىن، جارناما جاساۋ ءۇشىن ەمەس،  ءوزىمنىڭ ىشكى سۇرانىسىم بولعاسىن ۇستايمىن. ادال ءومىر ءسۇرىپ، ادال ءجۇرىپ-تۇرساڭ - سول مۇسىلماندىق. 1994 جىلدان بەرى اۋىز بەكىتەمىن.

نەگىزى مەن بىرەۋگە رەنجىپ، ونى ءوز ىشىمدە ۇزاق ۋاقىت ساقتاپ، كەك تۇتىپ جۇرەتىن ادامداردىڭ ساناتىنان ەمەسپىن. تەز قايتاتىن ادام سياقتىمىن. ال قاسيەتتى رامازان ايىندا بارشامىز دا ءبىر-بىرىمىزگە كەشىرىممەن قاراپ، قۇدايدان تەك جاقسىلىق تىلەۋىمىز كەرەك.

- ازەكە نەشە بالاڭىز بار، ولار نەمەن اينالىسادى؟

- ءتورت بالام بار. تورتەۋى دە قازاقى تاربيە الدى، وسى زامانعى ءبىلىم نارىمەن سۋسىندادى. مەن بالالارىمنىڭ ءوز ەلىنىڭ وتانشىل ازاماتى، پاتريوتى بولاتىنىنا سەنەمىن. جالپى ەر ادام ءۇشىن ەلىنىڭ، جاقىن-جۋىعى مەن وتباسىنىڭ اماندىعىنان ارتىق ەشتەڭە جوق. مەن دە ەل-جۇرت امان بولسا، بالالارىمىز بىزدەن گورى اقىلدى، ءبىلىمدى، باقىتتىراق بولسا ەكەن دەپ تىلەيمىن.

- ەل ءۇمىت ارتاتىن بىردەن-ءبىر تانىمال پارتيا -اق جول پارتياسىن ناعىز زيالىلار مەن كاسىپكەرلەر پارتياسى ەتۋ، ياعني حالىقتىڭ اۆانگاردىنا اينالار پارتياعا جەتكىزۋ قولىڭىزدان كەلە مە؟ ويتكەنى قازىر "نۇروتانعا" ەشكىم سەنبەيدى.

- «اق جول» پارتياسىنا دەگەن جىلى لەبىزىڭىز ءۇشىن ۇلكەن راحمەت. شىندىعىندا، كوپ ادامدار «اقجول» پارتياسىنىڭ ساياسي، يدەولوگيالىق ۇستانىمى تۋرالى ءجيى سۇراق قويادى. مەن بۇعان دەيىنگى سۇحباتتارىمدا دا ايتىپ ءجۇرمىن: «اقجول» پارتياسى حح عاسىر باسىنداعى «الاش» پارتياسىنىڭ، الاشورداشىلاردىڭ ءىزباسارى بولۋى كەرەك جانە يدەولوگيالىق، رۋحاني تۇرعىدان ەكى پارتيانىڭ ەش ايىرماشىلىعى جوق. ويتكەنى، الاشورداشىلاردىڭ تۇعىرناماسى - ساياسي ليبەراليزم بولدى. سول ۋاقىتتا قازاقتىڭ بارلىق كوزى اشىق، ءبىلىمدى، وقىعان ازاماتتارى «الاش» پارتياسىنىڭ توڭىرەگىنە توپتاستى. ءبىزدىڭ پارتيا دا وسى ماقسات-مۇراتتار جولىندا قىزمەت جاسايدى. ءبىر سوزبەن ايتقاندا، ءوزىن وتانشىل، ەلشىل زيالىمىن دەپ سانايتىن ازاماتتاردىڭ ناعىز ورنى - «اقجول» پارتياسى.

وتكەن ۇلت قايراتكەرلەرىنىڭ ماقسات-مىندەتتەرىن قازىرگى زامانعى قۇندىلىقتارعا، تالاپتارعا لايىقتاۋ، نەگىزدەۋ قاجەت. ۇلتتىڭ وتكەنى مەن بۇگىنىن، بولاشاعىن نە توعىستىرادى؟ ەلدىڭ ەرتەڭى جولىنداعى ارمان-مۇراتتاردىڭ جولىندا بار قازاق قالاي بىرىگەمىز؟ كەشەگى تاريحتان ساباق الىپ، كەلەشەككە نەندەي جاڭالىقتارمەن، جەتىستىكتەرمەن بارامىز؟ مەن دە وسى سۇراقتارعا جاۋاپ ىزدەپ ءجۇرمىن. وسى ساۋالدارعا الاڭ بولاتىن ءار ادام ماعان  دا جاقىن.

- قۇرمەتتى ازات تۇرلىبەكۇلى! «اقجول» پارتياسىنا وتكەلى بەرى، ءسىزدى، كوپ سىنعا الىپ جاتقان حالقىمىزدىڭ جايى بار. عالامتور الدىندا وتىرىپ، وزدەرى تارىنىڭ تۇيىرىندەي ەل ءۇشىن ءىس اتقارماسا دا، ءسىزدى قارالاۋدى ادەتىنە اينالدىرعاندار كۇننەن كۇنگە ءوسىپ كەلەدى. ولاردى مەن السىزدەر نەمەسە ءسىزدىڭ باسەكەلەستەرىڭىز دەپ بىلەمىن. مەن ءسىزدىڭ اتامەكەندەگى ەڭبەك جولىڭىزدى ءجىتى كاداعالاعانداردىڭ ءبىرىمىن. ءوز ويىم، ۋاقىتى مەن قارجىسىن تەككە شاشپايتىن بيزنەستىڭ ىرىسىنەن كىشىسىنە دەيىن باستارىن بىرىكتىرىپ، كاسىپكەر اعايىندارعا زاڭدى قۇقىقتارىن انىقتاپ، زاڭنامالىق تۇرعىدا ساۋاتتىلىعىن اشقان، ۇكىمەت پەن بيزنەس اراسىندا بولاتتان كوپىر جاساعان تۇلگا رەتىندە تانيمىن. تاعى ءبىر اۋىر قۇرىلىمدى كوتەرۋ موينىڭىزعا جۇكتەلگەن ەكەن. سىزگە سەنىپ، ءسىزدى قولدايتىندار بار، بەرىك بولىڭىز! باستاماڭىزعا ساتتىلىك تىلەيمىن! ءسىز، ءوزىڭىزدى جولىبولعىش اداممىن دەپ ەسەپتەيسىز بە؟

ءادىلحان، استانا قالاسى

- قۇرمەتتى ءادىلحان، شىنايى كوڭىلمەن ايتقان جىلى لەبىزدەرىڭ ءۇشىن ۇلكەن راحمەت! ومىرلىك جولدىڭ دا بىلمەيتىن وي-شۇڭقىرى كوپ قوي. ادامنىڭ ومىرلىك جولى - ونىڭ تابيعاتىنا، تاعدىرىنا، تالابىنا تىكەلەي بايلانىستى. مەن ءوزىمدى جولى بولعىش دەگەننەن گورى ومىردەن ءوز ورنىن تاپقان ادام رەتىندە سانايمىن.

قۇرمەتتى «اباي.kz» سايتىنىڭ وقىرماندارى! وزدەرىڭىزبەن از-كەم سۇحبات قۇرعانىما قۋانىشتىمىن. بۇل ءبىزدىڭ الەۋمەتتىك جەلىدەگى بايلانىسىمىزدىڭ باسى دا، سوڭى دا ەمەس. مەن ءاردايىم سىزدەردىڭ ساۋالدارىڭىزعا جاۋاپ بەرۋگە دايىنمىن. ەل امان، جۇرت تىنىش، ورازا ايى مۇباراك بولسىن!

سوڭى