بيىلعى كوكتەمدە «Qazaqstan» ۇلتتىق تەلەارناسىنداعى «شاڭىراق» حابارىنا قاتىستىم. كوپبالالى وتباسىلاردىڭ جاعدايى جايلى اڭگىمە قوزعالدى.

استاناعا اۋىلدان كوشىپ كەلگەن ءبىر وتباسىنىڭ وكىلى – جەتى بالا ءوسىرىپ وتىرعان ارداقتى انادان تەلەجۇرگىزۋشى: «بالالارىڭىز ءۇشىن مەملەكەتتەن ايىنا قانشا جاردەماقى الاسىز؟» - دەپ سۇرادى. ول: «170 مىڭ تەڭگەدەي،»- دەدى. ودان كەيىنگى سۇحبات بىلاي ءوربىدى:
- بۇل سوما وتباسىڭىز ءۇشىن جەتكىلىكتى مە؟
- ازداۋ عوي...
- جۇبايىڭىز جۇمىس ىستەيدى مە؟
- جوق... ول اۋىرىڭقىرايدى...
- مۇگەدەك پە؟
- جوق...

مەنىڭ ەسىمە استانادا تۇراتىن ءبىر تانىسىمنىڭ ءۇي سالۋىنا كومەكتەسىپ جۇرگەن، شەت ەلدەن كەلگەن ازامات ءتۇستى. «بىزدە ءبىر اي بويى تاڭ اتقاننان كەشكە دەيىن تىنىم الماي جۇمىس ىستەپ جۇرگەندە تاباتىنىڭ – 100 دوللارداي عانا. قازاقستانعا كەلىپ، جۇمىسقا جالدانىپ جۇرگەنىمىز سوندىقتان. مۇندا كەمىندە 300-400 دوللار تابىس تابامىن. ەلىمدە قالعان بالا-شاعاما اي سايىن 200-300 دوللار اقشا جىبەرىپ تۇرامىن،»-دەگەن ەدى ول.

اللاعا شۇكىر، ءبىزدىڭ ەلىمىز كەدەي ەمەس. بىراق، مەملەكەت ءوز مۇمكىندىگىنشە بەرىپ وتىرعان جاردەماقىنى ازسىناتىن بولساق، وندا جالقاۋ اعايىندارىمىزدىڭ «ەكى قولىنا ءبىر كۇرەك بەرىپ»، جۇمىس ىستەتۋدىڭ جولىن قاراستىرعانىمىز ءجون ەمەس پە؟ وسىنى ويلاپ، اتاۋلى الەۋمەتتىك كومەك كورسەتۋدىڭ جاڭا تەتىگىن ۇسىنىپ وتىرعان ۇكىمەت ۇسىنىسىن قولداۋ كەرەك دەپ بىلەمىن. اتاپ ايتقاندا، ەگەر ۇكىمەت كەلەسى جىلدان باستاپ مەملەكەتتەن جاردەماقى سۇراپ وتىرعان وتباسىداعى ەڭبەككە قابىلەتتى ازامات وزىنە ۇسىنىلعان جۇمىستان باس تارتاتىن بولسا، وندا سول وتباسىعا اتاۋلى الەۋمەتتىك كومەك كورسەتۋدەن التى ايعا دەيىن باس تارتۋدى ۇسىنىپ وتىر. ءبىز وسىنداي جاڭا نورما ەنگىزىلگەن زاڭ جوباسىن پارلامەنت ءماجىلىسىنىڭ بۇگىنگى جالپى وتىرىسىندا ماقۇلداپ، سەناتتىڭ بەكىتۋىنە جىبەردىك.

بۇل «جالقاۋلىق، شىركىن، جاقسى ەكەن، جاتىپ ىشەر اس بولسا» دەپ، بۇراۋ باسىن سىندىرۋعا ەرىنەتىن اعايىندارىمىزدىڭ بويىنداعى ماسىلدىق دەرتىنە ەم بولاتىن شىعار...

كارىباي مۇسىرماننىڭ facebook پاراقشاسىنان

Abai.kz