ماۋسىمنىڭ 16-شى جۇلدىزىندا «التەرناتيۆا» ۇلتتىق زەرتتەۋلەر ينستيتۋتى «قازاقستاننىڭ ۇلتتىق مۇددەلەرى: قوعامدىق ولشەمى» اتتى دوڭگەلەك ۇستەل ۇيىمداستىردى. پوليتولوگ ا.چەبوتارەۆ ءسوز سويلەپ اشقان سوڭ، نۇرتاي مۇستافاەۆ، قانات نۇروۆ، تالعات ەسماعامبەتوۆتەر ۇلتتىق مۇددەنىڭ ماڭايىنا جولامايتىن ابستراكتىلى وي-پىكىرلەرىن شۇلدىرلەي جونەلدى.
«ۇلت تاعدىرى» قوزعالىسىنىڭ باسقارما مۇشەسى بولات دۇيسەنبى: «ۇلتتىق يدەيا – تاۋەلسىزدىك كەپىلى» اتتى ءوز تۇجىرىمىندا بىزدە ءالى كۇنگە ۇلتتىق يدەيانىڭ جوقتىعىن العا تارتقاندا عانا، نەگىزگى تاقىرىپقا ەر سالعانداي اسەر الدىق. «جەر حالىقتىق مەنشىكتە بولىپ، مەملەكەت تەك ونىڭ پايدالانىلۋ جاعىن رەتتەپ وتىرۋى كەرەك»،– دەپ تۇيىندەدى ويىن ساياساتكەر.
مەملەكەتتىك تىلدە سويلەۋدى ادەتكە اينالدىرعان «شاڭىراق» قوعامدىق بىرلەستىگىنىڭ توراعاسى، بەلگىلى  ساياساتكەر اسىلبەك قوجاحمەتوۆ قازاقتىڭ قانداي ۇلت ەكەنىن، ونى ءتۇرلى قوعامعا جىكتەپ وتىرعان شالا قازاق، كوسموپوليتتەردىڭ بەت-بەينەسىن جىلىكتەي كەلە، بيلىك باسىنداعىلاردىڭ وسى مەملەكەتتىڭ نەگىزىن قۇراۋشى قازاق ۇلتىنىڭ مۇددەسىنە شىن مانىندە قىرىن قاراپ وتىرعانىن تىلگە تيەك ەتتى.
تانىمال ساياساتتانۋشى ايدوس سارىم بولسا: «جەر مەن جەر بايلىعى قازاق حالقىنا قايتارىلماي، قازاق جەرىن مەكەندەگەن وزگە دياسپورالار دا جاقسى ءومىر سۇرمەيدى»،– دەگەن كوزقاراسىن بىلدىرسە، پوليتولوگ سەرىك ساپارعالي: «وزگەلەر قازاقتىڭ قوناقجايلىلىعىن، كەڭپەيىلدىلىگىن پايدالانىپ بايىپ جاتىر، ال  قازەكەڭ قايىرشىلىق قامىتىن جامىلىپ وتىر. ەندى وزگەلەر ءتىلىمىزدى ۇيرەنگىسى كەلمەيدى، مەنسىنبەيدى. ەڭ باستىسى، بۇگىنگى بيلىككە قازاقتىڭ قايىرشىلىق كۇن كەشۋى وتە قولايلى بولىپ تۇر»،– دەگەن وي ايتتى.

قۋانىش مۇقتاي   
«قازاقستان زامان» گازەتى 18 ماۋسىم 2009 جىل