رەداكتسيادان: وتكەندە قۇندىز يبرايموۆا ەسىمدى قانداسىمىزدىڭ قازاقستان پرەزيدەنتىنەن اراشا سۇراپ جازعان ءۇشبۋ حاتىن جاريالاعان ەدىك. ايتىپ اۋىز جيعانشا، رەداكتسيامىزدىڭ ەلەكتروندى پوشتاسىنا جانابەكوۆا جاننا اتتى تاعى ءبىر قانداسىمىزدىڭ حاتى كەلىپ ءتۇستى.

اتالعان حات تا «ورالمان» ساناتىمەن باسپانا كەزەگىنە تۇرىپ، قازاقستان ازاماتتىعىن العان سوڭ كەزەكتەن شىعارىلىپ تاستالعان قانداسىمىزدىڭ تاعدىرى جايلى ەكەن. مۇندا ءبىر جاننا جانابەكوۆا عانا ەمەس، 87 قانداسىمىز پاتەر كەزەگىنەن قاعىلىپتى.

30 جەلتوقسان، 2019 جىلى «Abai.kz» سايتىندا قوعام قايراتكەرى اۋىت مۇقيبەكتىڭ پرەزيدەنت قاسىم-جومارت توقاەۆتىڭ اتىنا جازعان «قانداستارىڭىزدى باسپاناسىز تاستاماڭىز...»  اتتى «اشىق حاتى» جاريالانعان بولاتىن. 

قازاقستان  رەسپۋبليكاسىنىڭ

پرەزيدەنتى ق.ك.توقاەۆقا

قۇرمەتتى قاسىم-جومارت كەمەلۇلى!

مەن 2008 جىلى رەسەي فەدەراتسياسىنىڭ قورعان وبلىسىنان كەلىپ، قازاقستان رەسپۋبليكاسىنىڭ ازاماتتىعىن الدىم. جاسىم بيىل 37-دە. اكە-شەشەم قايتىس بولعان. ءبىر ءسىڭىلىم مەنىمەن بىرگە ورالعان. ول دا قازاقستان ازاماتى. قازىر تۇرمىسقا شىقتى. اعام مەن اپايىم رەسەيدە تۇرادى.

«ورالماندار» ساناتى بويىنشا نۇر-سۇلتان قالاسىنا باسپانا كەزەگىنە تۇردىم.

قازاقستان رەسپۋبليكاسىنىڭ ازاماتتىعىن العاندىعىم ءۇشىن، «ورالمان» مارتەبەم جويىلىپ، نۇر-سۇلتان قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ 2018 جىلى 05 جەلتوقسانداعى №02-41/260 بۇيرىعىمەن باسپانا كەزەگىنەن شىعارىلدىم.

اتالعان بۇيرىققا ساي، نۇر-سۇلتان قالاسى بويىنشا پاتەر كەزەگىنە تۇرعان 87 قانداسىمىز كەزەكتەن شىعارىلىپ تاستالدى. ال، وزگە وڭىرلەردە ولاردىڭ ءبىرازى سوتقا جۇگىنىپ، كەزەگىن قالپىنا كەلتىرگەن كورىنەدى.

ال، مەن دە سوتقا بەردىم. بىراق، سوت مەنىڭ ءوتىنىشىمدى قاناعاتتاندىرمادى.

ءسويتىپ، ون جىل كۇتكەن كەزەگىم كەلمەسكە كەتتى.

ەلگە ورالعان ون جىل ىشىندە مەن مەملەكەتتىك سەكتوردا، ونىڭ ىشىندە دەنساۋلىق ساقتاۋ سالاسىندا مامان رەتىندە جۇمىس ىستەدىم. كوپتەگەن مەديتسينالىق جانە الەۋمەتتىك جوبالارعا قاتىسىپ، كەشەندى مەديتسينالىق جانە الەۋمەتتىك قىزمەتتەردى ينتەگراتسيالاۋعا ءوز ۇلەسىمدى قوستىم. نۇر-سۇلتان قالالىق دەنساۋلىق ساقتاۋ باسقارماسىنىڭ العىس حاتتارىمەن ماراپاتتالدىم.

وكىنىشكە وراي، جالاقىم از بولعاندىقتان، العاشقى تولەم ءۇشىن اقشا ۇنەمدەۋگە مۇمكىندىگىم بولمادى. تابىسىمنىڭ كوپ بولىگى پاتەر جالداۋعا كەتتى...

قۇرمەتتى قاسىم-جومارت كەمەلۇلى!

قازىر مەن رەسپۋبليكالىق دياگنوستيكالىق ورتالىقتىڭ كلينيكاسىندا جۇمىس ىستەيمىن. ءوزىڭىز بىلەسىز، بۇل بيۋدجەتتىك مەكەمە ەمەس. مەن ءوز ماماندىعىمدى سۇيەم، ءوزىم سەكىلدى تۇرمىسى تومەن وتبسىلاردىڭ اۋىرعان-سىرقاعان بالالارىنا كومەكتەسكەندى جاقسى كورەم جانە وسى سالادان ەشقايدا كەتپەيمىن. سەبەبى، مەن ەلىمە ءوز ۇلەسىمدى قوسۋ ءۇشىن كەلگەم.

سوندىقتان، سىزدەن «ورالمان» ساناتىمەن باسپانا كەزەگىنە تۇرىپ، ازاماتتىق العان سوڭ شىعارىلىپ تاستالعان مەن سەكىلدى قانداستارىڭىزدىڭ ماسەلەسىن ءوز نازارىڭىزعا الىپ، قاتىستى زاڭنامالارعا تولىقتىرۋ ەنگىزۋگە، قۇقىعىمىزدى قالپىنا كەلتىرۋگە كومەكتەسۋىڭىزدى سۇرايمىن.

قۇرمەتپەن،

جانتاەۆنا جاننا جانابەكوۆا 

Abai.kz