قر قورعانىس مينيسترلىگىنىڭ گەنەرالى جۇيەلى تۇردە پارا الدى دەگەن كۇدىكپەن ۇستالدى، دەپ حابارلايدى قازاقپارات.

«سىبايلاس جەمقورلىققا قارسى ءىس-قيمىل اگەنتتىگى قورعانىس مينيسترلىگىمەن بىرلەسىپ سىبايلاس جەمقورلىق قىلمىستارىن جاسادى دەگەن كۇدىكپەن قورعانىس مينيسترلىگىنىڭ كادر جانە اسكەري ءبىلىم بەرۋ دەپارتامەنتىنىڭ باستىعى، قر قورعانىس مينيسترلىگىنىڭ گەنەرال-مايورىن اشكەرەلەدى»، - دەپ جازىلعان حابارلامادا.

ۆەدومستۆو مالىمەتىنشە، قىزمەتتىك سالاسى مەن مىندەتى بويىنشا كاسىبي دايارلانعان اسكەري كادرلاردى ىرىكتەۋ مەن ورنالاستىرۋعا، ەسكەرتۋ-الدىن الۋ جۇمىستارىن جۇرگىزۋگە، ءوز قاتارلارىندا تازالىقتى قامتاماسىز ەتۋگە جانە جەكە قۇرامنىڭ ءىس-ارەكەتتەرىندەگى سىبايلاس جەمقورلىق تاۋەكەلدەرىن جويۋعا مىندەتتى جوعارى لاۋازىمدى شەنەۋنىك جالپى قامقورلىعى مەن قىزمەت بابىندا العا جىلجۋى ءۇشىن قول استىنداعىلاردان قوماقتى مولشەردەگى پارانى جۇيەلى الۋ كۇدىگىنە ىلىككەن.

«كۇدىكتى كىناسىن مويىندادى جانە قورعاۋشىنىڭ قاتىسۋىمەن ءىس جۇرگىزۋ كەلىسىمىن جاساۋ تۋرالى ءوتىنىش ءبىلدىردى. وسى جىلدىڭ 31 قاڭتارىندا كۇدىكتىگە قاتىستى ۇيدە قاماۋدا ۇستاۋ تۇرىندەگى بۇلتارتپاۋ شاراسى تاڭدالدى. كۇدىكتىنىڭ كىناسىنىڭ دارەجەسى تۋرالى تۇپكىلىكتى شەشىمدى سوت شىعارادى»، - دەپ اتاپ وتەدى جەمقورلىققا قارسى قىزمەتتەن.

Abai.kz