نۇر-سۇلتان قالاسىندا «Nur Otan» پارتياسىنىڭ قولداۋىمەن قازاقتىڭ باس اقىنى ابايدىڭ 175 جىلدىعىنا ارنالعان رەسپۋبليكالىق اقىندار ايتىسى ءوتتى. «ادامزاتتىڭ الىبى – حاكىم اباي» اتتى اقىندار ايتىسىن قر مادەنيەت جانە سپورت مينيسترلىگى مەن رەسپۋبليكالىق اقىندار مەن جىرشى-تەرمەشىلەردىڭ وداعى ۇيىمداستىرعان.

جالپى بۇقارالىق سيپاتقا يە، قازاقتىڭ ءتول ونەرى، ۇلتتىق قۇندىلىعى سانالاتىن ايتىسقا «Nur Otan» پارتياسى العاش رەت قولداۋ كورسەتىپ وتىرعان جوق. وسىنى ايتقان ايتىس جاناشىرى ءجۇرسىن ەرمان «Nur Otan» باستاعان ساياسي ۇيىمدار، قوعامدىق ۇيىمدار مەن دەمەۋشىلەرگە اقجارما العىسىن جەتكىزدى.

«پرەزيدەنتىمىز بيىلعى جىلدى اباي جىلى دەپ جاريالادى. جاقىندا عانا ابايعا ارنالعان ءىس-شارالاردىڭ باستاۋىن ءوزى كەلىپ اشىپ بەردى. «اباي جانە XXI عاسىرداعى قازاقستان» اتتى ماقالاسىن ءبارىڭىز وقىعان شىعارسىزدار. بيىلعى كوپتەگەن شارالار ابايعا ارنالادى. اباي - ءبىزدىڭ قاعبامىز، قازاق رۋحانياتىنىڭ تەمىرقازىعى. ءبارىمىز بويىمىزدى دا، ويىمىزدى دا ابايعا قاراپ تۇزەۋىمىز كەرەك، - دەدى ءجۇرسىن ەرمان.

اباي مۇراسىن ارقاۋ ەتكەن بۇل ايتىسقا رەسپۋبليكامىزدىڭ وڭىرلەرىنەن جيىلعان 16 اقىن قاتىستى. ايتىستىڭ باستى ەرەكشەلىگى - اقىندار ساحنادا جەرەبە تارتۋ ارقىلى جۇپتالدى.

ال ايتىستىڭ باس جۇلدەسى «التىن دومبىرانىڭ» ەكى دۇركىن جەڭىمپازى مۇحتار نيازوۆقا بۇيىردى.

تاقىرىپقا تۇزدىق رەتىندە ايتا كەتەيىك، وسىعان دەيىن «Nur Otan» پارتياسىنىڭ قولداۋ كورسەتۋىمەن ەلىمىزدىڭ ونشاقتى وڭىرىندە الامان ايتىستار وتكەن. سولاردىڭ ءبىرسىپىراسى، اتىراۋدا ف.وڭعارسىنوۆانىڭ 80 جىلدىعىنا، قاراعاندىدا س.سەيفۋلليننىڭ 125 جىلدىعىنا، قوستانايدا ب.ءمايليننىڭ 125 جىلدىعىنا وراي جانە الماتى قالاسىندا «وتان وتباسىنان باستالادى» اتتى رەسپۋبليكالىق اقىندار ايتىسى.

«Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ ايتۋىنشا، اتالعان ءۇردىس بيىل دا جالعاسىن تاپپاق. بيىل «Nur Otan» پارتياسىنىڭ قولداۋىمەن ابايدىڭ 175 جىلدىعىنا وراي 20-عا جۋىق اقىندار ايتىسى وتەدى دەپ جوسپارلانعان. ودان بولەك، ءابۋ ناسىر ءال-ءفارابيدىڭ 1150 جىلدىعىنا جانە ۇلى جەڭىستىڭ 75 جىلدىعىنا ارنالعان اقىندار ايتىستارى ۇيىمداستىرىلادى.

Abai.kz