Abai.kz قىزمەتىنەن كەتسىن دەگەن مامراەۆ باستىق بولدى
جاقىندا عانا قىزىلوردا وبلىسىنا اكىم بولىپ تاعايىندالعان گۇلشارا ابدىقالىقوۆا وعان دەيىن پارلامەنت ءماجىلىسىنىڭ الەۋمەتتىك-مادەني دامۋ كوميتەتىنىڭ ءتورايىمى بولاتىن. ابدىقالىقوۆا اكىم بولىپ كەتكەن سوڭ، ونىڭ ورنىنا دەپۋتات بەيبىت مامراەۆ سايلاندى.
«كوميتەت توراعاسى لاۋازىمىنا بەيبىت بايماعامبەتۇلى مامراەۆتىڭ كانديداتۋراسىن ۇسىنامىن. ب. بايماعامبەتۇلىن جاقسى بىلەسىزدەر، بۇعان دەيىن كوپتەگەن جاۋاپتى قىزمەتتەردى ابىرويمەن اتقاردى. سوڭعى بىرنەشە جىل بويى ءماجىلىس دەپۋتاتى، سونىڭ ىشىندە وسى الەۋمەتتىك-مادەني دامۋ كوميتەتىنىڭ حاتشىسى بولىپ، ماڭىزدى زاڭداردى قابىلداۋعا ءوز ۇلەسىن قوسىپ كەلەدى. وسى سالادا ءبىلىمى دە، تاجىريبەسى دە مول. سوندىقتان اتالعان كوميتەتتى باسقارۋ ءۇشىن بەيبىت بايماعامبەتۇلى لايىقتى دەپ ەسەپتەيمىن», – دەدى ءماجىلىس توراعاسى نۇرلان نىعماتۋلين.
كوميتەت توراعاسى قىزمەتىنە كىرىسكەلى وتىرعان بەيبىت مامراەۆ تا ءبىزدىڭ وقىرماندارعا جاقسى تانىس. تۇراقتى اۆتورىمىز اۋىت مۇقيبەك «دەپۋتات مامىراەۆ. جاسالماعان كەلىسىم. جاردان ۇشقان باپ...» جانە «مامىراەۆ ماجىلىستەن كەتسىن!» اتتى ماقالالارىندا دەپۋتات مامراەۆتىڭ زاڭ جوباسىن تالقىلاۋ بارىسىنداعى سولقىلداقتىعىنا سىن ايتقان بولاتىن.
Abai.kz
