2020 جىل باستالعالى ءۇش جارىم اي عانا ءوتتى. جىل باستالعالى جاعىمسىز جاعدايلار از بولعان جوق. سونىڭ ءبىرى – covid-19 پاندەمياسى مەن مۇناي باعاسىنىڭ كۇرت قۇلدىراۋى، دوللاردىڭ كوتەرىلىپ، تەڭگەنىڭ قۇنسىزدانۋى ت.ب. ىندەتتىڭ جاپپاي تارالۋىنا بايلانىسى ەلدەگى كوپ قالا كارانتينگە جابىلدى. سايكەسىنشە، بۇل جاعدايلار ەلدەگى تۇتىنۋشىلىق نارىققا دا تەرىس اسەرىن تيگىزبەي قويمادى.

جۋىردا «kolesa.kz» سايتى covid-19 پاندەمياسى ەلىمىزدەگى كولىك نارىعىنا قالاي اسەر ەتكەنى تۋرالى شولۋ جاساپتى.

ۆاليۋتا باعاسىمەن بىرگە ەلدەگى اۆتوسالونداردا باعالار كوتەرىلدى. ال كارانتين باستالعانى ساتىپ الۋ مەن ساتۋ تەك ءىس جۇزىندە عانا جۇرگىزىلە باستادى. مامانداندىرىلعان حالىققا قىزمەت كورسەتۋ ورىندارى (سپەتس-تسون) جابىلدى. دەمەك، جاڭا كولىكتى ەسەپكە قويۋ دا مۇمكىن ەمەس دەگەن ءسوز. العاش رەت اۆتوكولىك ساتىپ الاتىن ادامدار ءۇشىن جالعىز تاڭداۋ قالدى. ول – قايتالاما نارىق (ۆتوريچنىي رىنوك). سەبەبى قولدان ساتىپ الىنعان اۆتوكولىكتەردى ساتىپ الۋشىنىڭ جانە ساتۋشىنىڭ ەتسق-سى بار بولعان جاعدايدا ونلاين تۇردە قايتا راسىمدەۋگە بولادى. ايتپاقشى، وتكەندە سول ەتسق-نى دا ونلاين بەرەتىن بولدى.

الايدا، بۇل مۇمكىندىكتى پايدالانىپ جاتقاندار شامالى كورىنەدى. 26 ناۋرىزدان 13 ساۋىرگە دەيىن «egov.kz» پورتالىنان 2 مىڭعا جۋىق كولىكتى قايتا راسىمدەگەن ەكەن. ال بۇرىن حقكو-تارى اشىق كەزدە، بۇل سان ايىنا 100 مىڭعا دەيىن جەتەتىن. ياعني، ايىنا 100 مىڭعا جۋىق كولىك تىركەلەتىن. ەگەر قازىرگى جاعداي وزگەرمەسە، وندا جاقىن ارادا كولىك نارىعىندا سۇرانىس ازايىپ، كولىكتەر باعاسى ايتارلىقتاي تومەندەيدى، دەپ بولجايدى ساراپشىلار.

«Toyota Camry»

«كolesa.kz» سايتىنداعى سۇرانىسقا ەڭ كوپ يە، بىرنەشە جىلدان بەرى رەسمي نارىقتا ەڭ كوپ ساتىلاتىن جانە حابارلاندىرۋلار سانى بويىنشا كوش باستاپ كەلە جاتقان كولىك ماركاسى – «Toyota Camry» ەكەن.

2018 جىلى شىققان جاڭا «Toyota Camry 70» ماركالى كولىكتىڭ ورتاشا قۇنى 2020 جىلدىڭ باسىنان بەرى وزگەرمەگەن. اقپان ايىنىڭ ورتاسىندا بولعان از عانا وزگەرىستى قوسپاعاندا، ول 0,6 % شەگىندە بولدى. ياعني، 12,5 ملن. تەڭگە دەڭگەيىندە، ال حابارلاندىرۋلاردىڭ باسىم بولىگىندە 12-14 ملن. شاماسىندا بولدى.

ال «Toyota Camry XV50» رەستايلينگى جىل باسىنان بەرى ناۋرىزعا دەيىن 0,1-دەن 0,6%-عا دەيىن قىمباتتادى. ەگەر ايدىڭ العاشقى كۇندەرى باعا - 9 ملن. تەڭگە بولسا، اي سوڭىنا قاراي 9,2 ملن.-عا دەيىن جەتتى. ءتىپتى «Toyota Camry 30» ماركاسى شامامەن 7,3%-عا قىمباتتادى.

Toyota-نىڭ تاعى ءبىر تانىمال مودەلى – «Toyota Land Cruiser Prado».  حابارلاندىرۋلار اراسىنان ەڭ كوپ ىزدەلگەن ماركا – 2007 جىلعى «Prado». بۇل كولىكتەردىڭ قۇنى 2020 جىلدىڭ باسىنان باستاپ تولقىن ءتارىزدى وزگەردى. 6-27 قاڭتار ارالىعىندا باعا 8,1-دەن 8,5 ميلليون تەڭگەگە دەيىن ءوستى. اقپان ايىندا 8,3 ميلليونعا ءتۇستى. 23 ناۋرىزعا قاراي باعا بىرتىندەپ ءوسىپ، 8,7 ملن. تەڭگەگە جەتتى.

«Hyundai Accent»

2015 جىلى ەلىمىزدە ەڭ كوپ ساتىلعان اۆتوكولىك «Hyundai Accent» بولدى. بۇگىن ساتىلىمدا 2014 جىلى شىققان سەداندار ءجيى كەزدەسەدى. ولاردىڭ ورتاشا قۇنى جىل باسىنان بەرى ءوستى. ەگەر قاڭتار ايىنىڭ باسىندا باعا كورسەتكىشى 3,8 ميلليون تەڭگە توڭىرەگىندە بولسا، بۇگىندە ول –  4 ميلليون، ياعني باعا 3,8 پايىزعا ارتتى.

«ۆاز-2114»

قازاقستان نارىعىندا سونداي-اق رەسەيلىك ءوندىرىستىڭ ەڭ تانىمال اۆتوكولىگى دە قىمباتتاپ كەتتى. جىل باسىنان بەرى 2013 جىلى شىعارىلعان «ۆاز-2114» كولىگىنىڭ ورتاشا باعاسى 1 475 300 تەڭگەدەن 1 510 200 تەڭگەگە دەيىن ءوستى. ايتا كەتۋ كەرەك، حابارلاندىرۋلاردىڭ جارتىسىنان استامىندا شەتەلدىك ەسەپتە تۇرعان اۆتوكولىكتەر كورسەتىلگەن، ولاردى ساتىپ الۋدى ءتيىمدى ينۆەستيتسيا دەپ ايتۋ قيىن.

«Daewoo Nexia»

تاكسي جۇرگىزۋشىلەرى ءجيى تىزگىندەيتىن وزبەك ءوندىرىسىنىڭ سەدانىن دا قىمباتشىلىق اينالىپ وتپەدى. 2020 جىلدىڭ قاڭتارىنان باستاپ 2012 جىلى شىعارىلعان «Daewoo Nexia» اۆتوكولىكتەرى 5%-عا قىمباتتادى.

ەسكى كولىكتەر

جيىرما جىلدان استام ۋاقىت جۇرگىزىلگەن اۆتوكولىكتەر ساناتىندا دا ورتاشا قۇننىڭ ءوسۋى بايقالادى. E34 شاناعىنداعى «BMW 525» ماركالى تەمىر تۇلپاردىڭ باعاسى 1 899 000-نان 2 085 600 تەڭگەگە دەيىن (+9.8 %) ارتقان.

«Volkswagen Passat» (B3) بيىلعى جىلدىڭ باسىندا ورتاشا ەسەپپەن 893 900 تەڭگەگە (1991 جىلى شىعارىلعان كولىكتەر) باعالاندى. ناۋرىز ايىنىڭ باسىندا باعا 916 500 تەڭگەگە دەيىن كوتەرىلدى، ال ءبىر ايدان كەيىن بىردەن 5%-عا – 962 500 تەڭگەگە دەيىن ءوستى.

ال قازاقستاندىق اۆتوپاركتە كەڭىنەن تانىمال «Audi 100» (1991 جىلعى C4 شاناعىندا شىعارىلعان اۆتوكولىكتەر) قاڭتار ايىنان باستاپ تەك 20 مىڭ تەڭگەگە عانا، ياعني 1,5%-عا قىمباتتاعان.

كورىپ وتىرعانىمىزداي، اقش دوللارىنا قاتىستى تەڭگەنىڭ قاڭتار ايىندا 382 تەڭگەدەن ءساۋىر ايىنىڭ باسىندا 448,52 تەڭگەگە دەيىن السىرەۋى جاڭا اۆتوكولىك نارىعىنا عانا ەمەس، سونىمەن قاتار قايتالاما نارىققا دا اسەر ەتتى. شىنىمەن دە، ەگەر كۋرس 17 %-عا وسكەن بولسا، كولىك باعاسى ايتارلىقتاي ازايعان. بىراق جاعداي كارانتيندى الىپ تاستاۋمەن جانە بۇرىنعى تىركەۋدى جاڭارتۋمەن وزگەرمەيدى، دەيدى ساراپشىلار.

دايىنداعان نازەركە التايقىزى

Abai.kz