قازاقستاندا 25 ادام عانا قازا تاپتى، بۇل جالپى اۋىرعانداردىڭ 1%-دە ەمەس. سوعان بولا توتەنشە جاعداي جاريالاپ، بۇكىل ەلدى ءۇيدى-ۇيلەرىندە قاماپ، بۇكىل ەكونوميكانى توقتاتىپ تاستاۋدىڭ نە قاجەتى بار ەدى دەپ كوپىرگەن داناگويلەر شىعا باستاپتى جەلىدە. نە دەيسىڭ بۇعان؟! ساناسىزعا سان ايتساڭدا ميىنا قونباس دەگەن راس ەكەن اۋ.

سول توتەنشە جاعداي مەن قاتاڭ كارانتيندىك شارالار دەر كەزىندە، ۋاقىتىلى ەنگىزىلمەسە بۇگىنگى جاعدايىمىز قالاي بولارىن ءبىر قۇدايدىڭ ءوزى ءبىلسىن. ۆيرۋس ەشتەڭە ەتپەس، باستىسى ەكونوميكا دەپ، بۇگىنگى كۇنى 60 مىڭعا جۋىق ازاماتىنان ايرىلعان اقش سياقتى بولار ما ەدىك، الدە كارانتيندى تىم كەش ەنگىزگەن يتاليا مەن يسپانيا ءتارىزدى اۋرۋ جۇقتىرعان جۇزدەگەن مىڭ ادامنىڭ ءومىرى ءۇشىن كۇرەسىپ، ونداعان مىڭىنان ايرىلار ما ەدىك؟

ايتپاقشى، پايىز دەمەكشى، اقش-تا 1ملن استام اۋىرىپ 57 مىڭى كوز جۇمدى. بۇل جالپى ساننىڭ 5.7% ءولدى دەگەن ءسوز. تاعى 14 000 اۋىر حالدە جاتىر. ەندى باسقا ەلدەردى قاراپ كورەيىك:

فرانتسيادا قازا تاپقاندار سانى - 14,2%

ۇلىبريتانيادا - 13,4%

يتاليادا - 12%

شۆەتسيادا - 11,9%

گوللانديادا - 11,7%

يسپانيادا - 10%

مەكسيكادا - 9,3%

قىتايدا - 5,6%

كانادادا - 5,6%

مەن قازىر تەك ەكونوميكاسى باقۋاتتى، كەز-كەلگەن قاۋىپ پەن كەساپاتقا توتەپ بەرۋگە قاۋھارى جەتەتىن ەلدەردى ءتىزىپ وتىرمىن. بۇلاردىڭ ىشىندە جالعىز گەرمانيا عانا بۇل كورسەتكىشتى 3,8% كولەمىندە ۇستاپ تۇر. جانە تۇركياداعى ءولىم 2,8% دەڭگەيىندە قالىپ وتىر.

ال جالپى الەم بويىنشا بۇگىنگى تاڭدا 3 ملن استام ادام ۆيرۋسقا شالدىعىپ ونىڭ 211 669 كوز جۇمدى. ورتاشا ەسەپپەن 7%. ويلاپ كورىڭىزدەر 100 ادامنىڭ جەتەۋى ءولىپ وتىر. وسى وتىرعان ارقايسىڭنىڭ كەم دەگەندە 100 تۋىسقانىڭ، 100 جورا-جولداسىڭ تاعى بار. ال ەندى سولاردىڭ جەتەۋى ايدالادان كەلگەن كەسەلدەن كوز جۇمسا قايتەسىڭدەر؟ COVID-19 قاۋىپ ەمەس دەڭدەر وسىدان كەيىن.

ال ەندى پاندەميا كەزىندە ءتارتىپتى قاتاڭ ساقتاپ، جاۋاپكەرشىلىك تانىتقان ەلدەردىڭ ادامي شىعىنىنا كوز جۇگىرتەيىك.

سينگاپۋر - 0,1%

بىرىككەن اراب امىرلىكتەرى - 0,7%

ساۋد ارابيا - 0,8%

وڭت. كورەيا - 2,5%

نورۆەگيا - 2,6%

جاپونيا - 2,8%

بىراق جاپونيا تەك توتەنشە جاعداي عانا جاريالادى. كارانتين ەنگىزگەن جوق. ونىڭ قاجەتى دە بولماپتى. كۋالاردىڭ ايتۋىنشا، بۇل حالىقتىڭ قوعامدىق مۇددەنى قۇرمەت تۇتاتىنى سونشا، توتەنشە جاعداي ەنگىزگەن بويدا، كارانتينسىز-اق ءۇش ساعات ىشىندە دالادا بىردە-ءبىر ادام قالماپتى. سەبەبى، ءاربىر جاپوندىقتىڭ ساناسىندا ءوزىم اۋىرىپ قالماسام دەگەننەن بۇرىن، اينالامداعىلارعا زيانىم تيمەسە ەكەن دەگەن تۇسىنىك باسىم ەكەن. مىنە تۇيسىك دەگەن قايدا جاتىر. سانا دەپ وسىنى ايت.

ءبىزدىڭ حالىق تا وسى كۇندەرى ۇلكەن جاۋاپكەرشىلىك تانىتتى. باسىم كوپشىلىگى ءماجبۇرلى تۇردە ەنگىزىلگەن شەكتەۋلەرگە تۇسىنىستىك تانىتىپ، ۇيدە بولۋعا تىرىسىپ باقتى. جانە سونىسىمەن اۋرۋدىڭ كەڭ ەتەك جايۋىنا جول بەرگەن جوق. ال ناۋقاس بولعانداردىڭ ىشىندە ءولىمنىڭ 1% اسپاۋى - ءبىزدىڭ اق حالاتتى ابزال جانداردىڭ ارقاسى. سولاردىڭ ەرەن ەرلىگى، ماڭداي تەرى دەپ بىلەم.

اماندىق بولسا، كەتكەن شىعىننىڭ، دۇنيە-مۇلىكتىڭ ورنى تولار. ال ادامي شىعىننىڭ ورنىن ەش نارسەمەن تولتىرا المايسىڭ. سوندىقتان ەل پرەزيدەنتى توقاەۆتىڭ "مەن ءۇشىن ءار وتانداسىمنىڭ ومىرىنەن قىمبات ەشتەڭە جوق" - دەگەن كەشەگى ءسوزى كوڭىلىمە قوندى. تەك بولاشاقتا دا بۇل ۇستانىم پرەزيدەنتتىڭ پريوريتەتىندە بولسا دەگەن تىلەك بار.

مۇحتار تۇمەنبايدىڭ الەۋمەتتىك جەلىدەگى جازباسى

Abai.kz