ورتالىق كوممۋنيكاتسيالار قىزمەتىندە اقپارات جانە قوعامدىق دامۋ ءمينيسترى ايدا بالاەۆانىڭ ونلاين رەجيمدە حالىققا ەسەپ بەرۋ كەزدەسۋى ءوتتى.

بايانداما بارىسىندا ايتىلعان ماڭىزدى جاڭالىقتاردىڭ ءبىرى - «اباي تۆ» جانە «ءال-فارابي» تەلەارنالارىنىڭ اشىلاتىنى ايتىلدى.

ءمينيستردىڭ ايتۋىنشا، وتاندىق مادەني مۇرالاردى ناسيحاتتايتىن «اباي تۆ» 30 ماۋسىمنان باستاپ ىسكە قوسىلادى. ال وقۋ-اعارتۋ باعىتىنداعى «ءال-فارابي» جاڭا وقۋ ماۋسىمىنان باستاپ كورەرمەن نازارىنا ۇسىنىلادى.

- قازىر جاڭا ەكى تەلەارنا اشۋ ماسەلەسى قاراستىرىلىپ جاتىر. «اباي تۆ»، «ءال-فارابي» تەلەارناسى. «اباي تۆ» تەلەارناسى ەرتەڭ - 30 ماۋسىمدا كورەرمەنگە جول تارتادى. ول «قازاقستان ترك» قۇرامىنا كىرەدى جانە وتاندىق مادەني مۇرالاردى ناسيحاتتايتىن ارنا بولادى. ەكىنشى تەلەجوبا «ءال-فارابي» تەلەارناسى، «حابار» تەلەارناسىنىڭ بازاسىندا جاڭا وقۋ جىلىنىڭ قارساڭىندا كورسەتىلە باستايدى. «ءال-فارابي» تەلەارناسى وقۋ-اعارتۋ تەلەۆيزيالىق پلاتفورما بولادى. 6-18 جاسقا دەيىنگى بالالار مەن جاسوسپىرىمدەرگە ارنالعان تەلەارنا بولادى. پاندەميا كەزىندە مۇنداي تەلەارنانىڭ وزەكتىلىگى ءبىلىندى، - دەدى بالاەۆا.

ءبىزدىڭ ەلدە مادەنيەت جانە عىلىم-ءبىلىم سالاسىندا حابار تاراتاتىن تەلەارنانىڭ ورنى وگەيسىپ تۇرعانى ءسوزسىز. وسى ولقىلىقتىڭ ورنىن تولتىرۋ ءۇشىن اتالعان ارنالاردىڭ اشىلعانى قۇپتارلىق، قۋانارلىق ءىس ەكەنى ءسوزسىز.

بىراق ەڭ ماڭىزدىسى دۇرىس باستالعان ءىس دۇرىس جولعا قويىلىپ، وڭ باعىتتا جۇمىسىن جالعاستىرسا دەيمىز. ايتپەسە، بۇعان دەيىن ۇرانمەن باستالىپ، ۇساقتالىپ اياقتالعان شارالار از بولعان جوق. ءبىز بۇل جەردە عۇمىرى قىسقا بولعان «مادەنيەت» ارناسى جايلى دا ايتىپ وتىرمىز.

عىلىم-ءبىلىم، مادەنيەت باعىتىنداعى ارنالاردى جەڭىل-جەلپى ويىن-ساۋىق ارنالارىمەن قاتار رەيتينگ دوداسىنا قوسپاعان ءجون. بىرىنشىدەن ول رەيتينگتى كىمدەردىڭ، نەگە سۇيەنىپ جاسايتىنى بەلگىسىز. ەكىنشىدەن عىلىم-ءبىلىمدى ويىن-ساۋىقپەن ءبىر قاتارعا قويىپ باعالاۋ ەش جونگە سىيمايدى. «مادەنيەت» سەكىلدى ارنالاردىڭ جابىلىپ قالۋىنا دا وسى «ادىلەتسىز» رەيتينگ ماسەلەسى سەبەپ بولعانى بەلگىلى. سول ءۇشىن عىلىم مەن ءبىلىمدى، مادەنيەتتى ءناسيحاتتايتىن ارنالاردى اشىلا سالىپ، جاعاسىنان الىپ، جاۋىپ تاستاۋعا تىرىسپاعانىمىز ءجون.

Abai.kz