14 ماۋسىم كۇنى كوروناۆيرۋس جۇقتىرعان بۇرىنعى دەنساۋلىق ساقتاۋ ءسينيسترى ەلجان ءبىرتانوۆ دەنساۋلىعى جاقسارىپ، ەمحانادان شىقتى. بۇل تۋرالى دەنساۋلىق ساقتاۋ ۆيتسە-ءمينيسترى اجار عينيات مالىمدەدى.

«ەلجان امانتايۇلى جاعدايىنىڭ جاقسارۋىنا بايلانىستى ەمحانادان شىعارىلدى. قازىر امبۋلاتوريالىق ەمىن جالعاستىرۋدا», - ۆيتسە-مينيستر دەدى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

25 ماۋسىم كۇنى ءبىرتانوۆ قىزمەتىنەن ءوز ەركىمەن كەتكەنىن، ىندەتىنەن تولىق ايىقپاعانىن، قوسىمشا ەم قابىلدايتىنىن ايتقان بولاتىن.

«قۇرمەتتى ارىپتەستەر، دوستار! بۇگىن مەن ءوز ەركىممەن قىزمەتىمنەن كەتۋ تۋرالى مەملەكەت باسشىسىنا ءوتىنىش جازدىم. وكىنىشكە وراي، مەن كوروناۆيرۋسپەن اۋىرىپ قالعاندىقتان جانە پنەۆمونيانىڭ اسقىنۋىنا بايلانىستى قوسىمشا ەم قابىلداۋىم كەرەك.

ەلدە ەپيدەميولوگيالىق جاعداي اسقىنىپ تۇرعان قازىرگىدەي كەزدە، بۇل سالاعا مينيسترلىك دەڭگەيىندە دە، وڭىرلىك دەنساۋلىق ساقتاۋ باسقارمالارى دەڭگەيىندە دە تولىق كۇشپەن جۇمىس ىستەيتىن باسشى كەرەك دەپ ەسەپتەيمىن.

ءبىزدىڭ دەنساۋلىق ساقتاۋ جۇيەسى بۇل تىعىرىقتان شىعادى دەپ سەنەمىن. ارقايسىمىزدىڭ ۋاقىتىمىز بەن قاجىر-قايراتىمىز كەرەك. بارلىق ارىپتەستەرىمە مىقتى دەنساۋلىق پەن سابىر تىلەيمىن. قازاقستاننىڭ دەنساۋلىق ساقتاۋ سالاسىن دامىتۋ ىسىنە از دا بولسا ۇلەسىمدى قوسۋعا مۇمكىندىك بەرگەن مەملەكەت باسشىسىنا العىس ايتامىن»، - دەپ جازعان ەدى ەكس-مينيستر.

پرەزيدەنت ەلجان ءبىرتانوۆتىڭ ورنىنا دەنساۋلىق ساقتاۋ ءمينيسترى قىزمەتىنە 25 ماۋسىمدا الەكسەي تسويدى تاعايىنداعان. تسوي مىرزا سودان بەرى كوروناۆيرۋسپەن كۇرەسكە بەل شەشە كىرىسىپ كەتتى. ەلدەگى ەپيدەميولوگيالىق احۋالعا بايلانىستى مينيستر تسويدىڭ 3 بولجام، 10 جوسپارى جاريالاندى.

سونىمەن قاتار، كۇنى كەشە مەملەكەتتىك كوميسسيا ەلدەگى ەپيدەميولوگيالىق احۋالدىڭ ءورشۋىن جانە كوروناۆيرۋس ينفەكتسياسىمەن سىرقاتتانۋشىلىقتىڭ ءوسۋىن ەسكەرە وتىرىپ، 5 شىلدەدەن باستاپ 14 كۇنگە شەكتەۋ شارالارىن ەنگىزۋ تۋرالى شەشىم قابىلدادى.

Abai.kz