مەملەكەت باسشىسى قاسىم-جومارت توقاەۆتىڭ تەلەارنا ارقىلى حالىققا جولداعان ۇندەۋىن تىڭدادىم. جۇقپالى ىندەت سالدارىنان جاقىنىنان ايىرىلعان جۇرتىمىز ءۇشىن، دەرتكە داۋا تاپپاي ەلەڭ-الاڭ كۇي كەشكەن ەلىمىز ءۇشىن بۇل كوڭىلگە مەدەۋ، جانعا جىگەر، ۇمىتكە قانات بىتىرگەن ۇندەۋ بولدى.

ءدال قازىر ءدارىحانالاردا ءدارى-دارمەك تاپشىلىعى بايقالادى. «اشىنعاننان شىعار اششى داۋىسىم» دەگەندەي، بۇل ماسەلەنى حالىق الەۋمەتتىك جەلىدە ءجيى كوتەردى، اششى داۋىسىن جەتكىزدى. وسى رەتتە  پرەزيدەنت ءوز سوزىندە: «قازىر مەملەكەتتىك ورگاندار ەلدى مەكەندەردى قاجەتتى ءدارى دارمەكپەن تولىق قامتاماسىز ەتۋدە. وسىعان وراي، ءتيىستى قور جاساقتالعان. توسەك ورىندارى دا، مەديتسينالىق قىزمەت كورسەتۋ ءىسى دە تولىعىمەن قامتاماسىز ەتىلەدى» دەپ اتاپ ءوتتى. راسىندا، بۇل – بۇگىنگى كۇننىڭ ماڭىزدى ماسەلەسى. اتالعان جاعداي دەر كەزىندە وڭ شەشىمىن تاپسا، ءبىزدىڭ العىستان باسقا ايتارىمىز قالماس ەدى...

بۇگىن ەلىمىزدىڭ باس ءمۇفتيى ناۋرىزباي قاجى تاعانۇلى دا جاماعاتقا جولداعان ۇندەۋىندە وسى ماسەلەگە ايرىقشا توقتالعان ەدى. باس ءمۇفتيدىڭ: «اسىل دىنىمىزدە قاجەت ۋاقىتتا قاجەت كومەكتى جاساۋ ۇلكەن ساۋاپتى امالدىڭ بىرىنە جاتادى. سىندارلى ساتتە ناۋقاس جاندارعا قاجەتتى ءدارى-دارمەكتى جەتكىزىپ، العىسىن الايىق. ءدارى-دارمەكتىڭ باعاسىن قولدان قىمباتتاتۋعا جول بەرمەي،  جاقسىلىق جاساۋعا اسىعايىق» دەگەن ءسوزىنىڭ جانى بار.

ال مەملەكەت باسشىسى ءدارى-دارمەكتىڭ باعاسىن بىرنەشە ەسە ءوسىرىپ، قالىپتاسقان جاعدايدى ءوز ماقساتىنا پايدالانعىسى كەلگەن الىپساتارلارعا ءتيىستى جازا بەرىلەتىنىن جەتكىزدى. سولار سىناق ساتىندە ادامنان اقشا ەمەس، العىس الۋدىڭ قانشالىقتى ساۋاپتى ءىس ەكەنىن بىلسە، تۇسىنسە ەكەن دەيسىڭ.

ق.توقاەۆ كۇردەلى جاعداي كەزىندە ەل اراسىندا كوپتەگەن جالعان اڭگىمەلەر تاراپ جاتقانىن، سونىمەن قاتار سول تەرىس اقپارات تاراتىپ جۇرگەن ارام پيعىلدى ادامداردىڭ ارەكەتتەرىن سىنعا الدى. راسىندا دا تەرىس اقپارات تاراتۋ زاڭ مەن شاريعاتتى بىلاي قويعاندا ادامگەرشىلىككە جات ارەكەت قوي.

اللا تاعالا قۇراندا: «ءاي مۇمىندەر! بۇزىق بىرەۋ حابار كەلتىرسە، ونى انىقتاڭدار. ايتپەسە بىلمەي ءبىر ەلگە كەسىرلەرىڭ ءتيىپ، ىستەگەندەرىڭە وكىنەسىڭدەر» دەيدى («حۋجۋرات» سۇرەسى، 6-ايات).

وسى رەتتە حالىقتى ۇرەيگە ەمەس، ۇمىتىنە قانات بىتىرۋگە، قايعىعا ەمەس، قۋانىشقا بولەۋگە شاقىرامىز. ەلىمىز امان، جۇرتىمىز تىنىش بولعاي. وسى سىناقتى سابىرمەن ەڭسەرىپ، جاقسى كۇندە جولىعۋدى جازعاي. ءامين!

Abai.kz