ناۋقاستاردى تاسىمالداۋعا ارنالعان ارنايى كولىكتەردىڭ العاشقىلارى وسى اپتادا دارىگەرلەرگە بەرىلەدى.

Kaspi.kz كومپانياسى پاندەميامەن قارسى كۇرەسكە 100 جەدەل جاردەم كولىگىن سىيلايدى. اۋرۋحانالاردىڭ جەدەل بريگادالارىنا (اۋىرلىعى 4 ساناتتاعى جەدەل مەديتسينالىق شاقىرۋلار) ارنالعان ارنايى سانيتارلىق اۆتوكولىكتى وتاندىق ءاۆتووندىرۋشى «سارىارقااۆتوپروم» Chevrolet Damas ۇلگىسىنىڭ بازاسىندا جانە قازاقستان رەسپۋبليكاسىنىڭ دەنساۋلىق ساقتاۋ مينيسترلىگىنىڭ تەحنيكالىق ۇسىنىستارىنا ساي جاسايدى.

Kaspi.kz باسشىسى ميحايل لومتادزە بۇل تۋرالى بىلاي دەدى:

«بارلىعىمىز دەنساۋلىق ساقتاۋ سالاسىنا وراسان زور اۋىرتپالىق تۇسكەنىن كورىپ وتىرمىز، سوندىقتان ءبىزدىڭ كوماندا پاندەميامەن كۇرەستە العا شەپتە جۇرگەن دارىگەرلەرگە كومەك كورسەتۋدى باستى مىندەت دەپ سانادى. ءبىز دارىگەرلەردىڭ جانە دەنساۋلىق ساقتاۋ مينيسترلىگىنىڭ اۆتوكولىك جيناقتاماسى تۋرالى تالاپتارىن زەرتتەپ، جەدەل جاردەم كولىگىنە ارنالعان تەحنيكالىق تالاپتاردى ازىرلەپ، قازاقستاندا جىلدام جاساپ شىعارىپ، بۇكىل ەل اۋماعىنداعى سالالىق مەديتسينالىق مەكەمەلەرگە قىسقامەرزىمدە جەتكىزۋگە دايىندادىق. ارنايى جيناقتاماداعى العاشقى اۆتوكولىكتەر دارىگەرلەرگە وسى اپتادا بەرىلەدى».

ۆياچەسلاۆ كيم، Kaspi.kz ديرەكتورلار كەڭەسىنىڭ توراعاسى:

«ءبىز دارىگەرلەر بريگاداسىنىڭ شاقىرۋلارعا ۋاقىتىندا بارىپ، ادامدارعا كومەكتەسۋىنە مۇمكىندىك بولۋى ءۇشىن مەملەكەتكە 100 جەدەل جاردەم كولىگىن قايتارىمسىز بەرەمىز. وتاندىق ءاۆتووندىرۋشى «سارىارقااۆتوپروممەن» بىرگە شەتەلدە ەمەس، قازاقستاننىڭ ىشىندە جەدەل جابدىقتاۋعا بولاتىن كولىك ءتۇرىن تاڭدادىق. مۇنداي كولىكتەردىڭ جالپى قۇنى 1 ميلليارد تەڭگەنى قۇرادى. مەن قازىر بيزنەس مەملەكەتكە يىق توسىپ، پاندەميانى جەڭۋگە بايلانىستى مىندەتتەردى شەشۋگە بەلسەندى ۇلەس قوسۋى كەرەك دەپ ويلايمىن».

«Kaspi.kz ۇسىنعان ولشەمشارتتار مەن دەنساۋلىق ساقتاۋ مينيسترلىگىنىڭ ۇسىنىسىمەن مانەۆرگە وڭتايلى اۆتوكولىك تاڭدالدى، بۇل جەدەل جۇمىس ءۇشىن اسا ماڭىزدى. قازىرگى جاعدايدى ەسكەرە وتىرىپ ءبىز جاقىن ۋاقىتتا ناۋقاستاردى تاسىمالداۋعا ارنالعان مەديتسينالىق، سانيتارلىق، باكتەريتسيدتى جاراقتاردىڭ بارلىعىمەن، ونىڭ ىشىندە وكپەنى جاساندى تىنىس الدىرۋ اپپاراتى، ەكگ اپپاراتى، ۋلسوكسيمەتر مەن دەفيبريللياتورمەن جابدىقتالعان كولىكتەردى جاساپ شىعارامىز»، — دەدى «سارىارقااۆتوپروم» ديرەكتورى سىرىم سەمەيباەۆ.

قازاقستاننىڭ دەنساۋلىق ساقتاۋ مينيسترلىگىنىڭ مالىمەتىنشە ەل اۋماعىندا كۇن سايىن 1400 بريگادا مەديتسينالىق جەدەل جاردەم كورسەتەدى، ولار 26 000 شاقىرۋ قابىلدايدى. مينيسترلىك وكىلدەرىنىڭ ايتۋىنشا بۇل جەدەل جاردەم قىزمەتى مەن قازىرگى بار ينفراقۇرىلىم ءۇشىن ايتارلىقتاي سالماق ءتۇسىرىپ تۇر.

دەرەككوز - 7kun.kz

Abai.kz